• Әхбаратлар еқими
• 08 Ақпан, 2024

Әлгә әҗри сиңгән әр

Һаятта биз көплигән адәмләр билән тонушимиз, арилишимиз. Шундақла бәзидә өмүрниң буйруғиға беқинип орун йөткишимизгиму тоғра келиду. Бирақ киндик қенимиз тамған туғулған йеримиз билән шу жутта биллә яшиған жутдашлиримиз бизниң жүригимиздә мәңгүгә қалидекән. Бүгүнки күндә Чонҗа йезисида истиқамәт қилсамму, бир тәрипим ана жутум Дардамтуға тартип туриду. Жутдашлиримни көрсәм, қериндишимни көргәндәк бешим көккә йетиду. Һә, уларниң утуғини аңлисам, пәхирлиништин хошаллиғимиз қин-қинимға патмай кетиду. 
Җүмлидин мән шундақ пәхирлинип һәм мәғрурлиниш билән әскә алидиған жутдашлиримниң бири – Исрайил Бәкриев. Исрайил Смитоғли Дардамту йезисида, көпбалилиқ аилидә дунияға кәлгән. Һәр иккимиз малчи аилисидә мал беқип чоң болдуқ. Яйлиғимиз йеқин җайлашқан болғанлиқтин, икки аилә йеқин арилишатти. Шуниңға яриша, Исрайил иккимизму йеқин дост болуп кәттуқ. Бизниң яйлиғимиз «Қош тону», Исрайилниң яйлиғи «Байора» дәп атилатти.
Чоң болуп, һәрхил йәрләрдә ишлидуқ. Шу вақитлардики комсомол бригадисида ишләп, 1972 — 1974-жилларда Кеңәш армияси сепидә Вәтән алдидики борчимизни өтидуқ. Исрайил йезилиқ һакимийәт йенидики «һәрбий үстәл» бөлүмини башқурди. Кейин Москва шәһириниң йенидики Звенигород шәһиридә пропорщикларни тәйярлайдиған курсни түгитип, «прапорщик» унвани билән «2534 һәрбий» бөлүмигә взвод командири болуп ишқа орунлашти. 
Ишбиләрмәнлиги билән көзгә чүшкән Исрайил шәрәплик әмгәк йолида Тохта-базар наһийәси, Тохта-базар йезисида 2072 һәрбий бөлүмидә 1983-жилғичә старшина болуп хизмәт қилди. 1994-жили Миллий бехәтәрлиги комитетиниң һәрбий институтини тамамлап, 1995-жили Таҗикстандики ҚҖ әркин һәрбий күчлири тәркивидә, Таҗик-Авған чегара күзитиниң взвод командири болуп, чоң мәсъулийәтниң һөддисидин чиқти. Бир сөз билән ейтқанда, у 1978-жилдин 2003-жилғичә 2534 һәрбий бөлүмидә чегара башлиғи болуп, аброй билән һөрмәтлик дәм елишқа чиқса, 2003 — 2006-жиллар арилиғида 2534 һәрбий бөлүми КЭС комендат хадими болди. Кәсиптики әрлиги етиварға елинип, онлиған медальлар билән мукапатланди. У вәтәнпәрвәрлиги, өз ишиға болған садақити арқилиқ елимизниң тәрәққиятиға өз үлүши қошти. 
Шәхсий һаятида Исрайил рәпиқиси Мукарәм Тохмәтова билән аилә қуруп, икки қизиға заманға лайиқ тәлим-тәрбийә берип чоң қилди. Кейин улардин нәврә сөйүп, бова болуш бәхтини һис қилди. Балилириму өзи охшаш әлгә хизмәт қилидиған шәхсләрдин болуп йетилди. Амал қанчә, бу күндә орни бөләк жутдаш аримизда йоқ. 2015-жили униңдин мәңгүгә айрилип қалдуқ. Бирақ униң йезилиқ һакимийәттики ветеранларниң рәсимлириниң арисиға илинған сүритигә қарап, пат-пат әскә елип туримән. Башқилар тәрипидин Исрайилниң намиға ейтилған яхши пикирләрни аңлиғанда, көңлүм су ичкәндәк болиду. Униң яхши һәрбий хадимла әмәс, адәмгәрчилиги жуқури, көңли очуқ инсан болғанлиғини мәмнунлиқ билән тилға алимән. 

                Абдуразақ ТОХТИБАҚИЕВ, 
Чонҗа йезилиқ Ақсақаллар кеңиши 
рәисиниң орунбасари
Алмута вилайити,
Уйғур наһийәси