• Әхбаратлар еқими
• 08 Ақпан, 2024

Балиларниң келәчиги – дөләтниң келәчиги

Растимни ейтсам, Қазақстанда он сәккиз яшқичә болған балиларға пул бөлиниду, дегән йеңилиқни аңлиғанда, башта қаттиқ ишинип кәтмигән едуқ. Болупму бу ишниң әмәлгә ешишиға йоқ дегәндә бирқанчә жил сәрип қилиниду, дәп ойлидуқ. Амма йеңи жил йеңилиғи билән кирип кәлди. Президентимиз ейтқандәк, «Миллий фонд – балиларға» лайиһиси әмәлгә ешип, Қазақстанда Миллий фондниң инвестициялик кириминиң бир бөлүги балиларға аҗритилишқа башлиди. 
 Дәсләпки төләмләр февраль ейида чүшүп, ойлимиған йәрдин һәммимизни хошал қиливәтти. Миллий фондтин балиларға бөлүнидиған хираҗәтни келәчәктә уларниң баш-паналиқ болуши яки билим елиши үчүн ишлитишкә болидекән. Бизгә охшаш көпбалилиқ ата-анилар үчүн бу чоң йеникчилик болари һәқ. Һәрбир бала дунияға өз рисқиси билән туғулиду дәймиз. Шундақла балилиримизниң барлиғиниң җәмийәттин өз орнини тепип, әлгә ярамлиқ қиз-жигитләрдин болуп әр йетишини халаймиз. Тоғриси, балиниң келәчиги үчүн, биринчи новәттә, ата-аниси җавапкәр. Уларниң заманға лайиқ билим елишиға зәмин яритиш бизниң борчимиз. Шуңа, балилиримизниң келәчигини ойлап, әндишә қилишимиз тәбиий. Мана, әнди дөләтниң ғәмхорлуғида шу әндишимиз бесилип, көңлүмиздә үмүт оти пәйда болди. Чүнки балилиримизниң келәчигигә капаләтлик қилидиған хираҗәт  улар 18 яшқа толғичә Миллий фондта сақланмақчи. 
Мән бәш балиниң аниси. Тунҗа оғлум он сәккиз яштин ашти. Он сәккиз яшқа толмиған төрт балам бар. Кәнҗә қизим әндила 3 яшқа кириду. Шу җүмлидин Қазақстанда һазир 18 яшқа толмиған 6,5 миллион бала баркән. Балилар — дөлитимизниң әң чоң байлиғи. Уларниң келәчиги – дөләтниң келәчиги.  Демәк, балилиримизниң билими үчүн бөлүнгән пулни – әлниң тәрәққиятиға қуюлуватқан мәбләғ дәп чүшәндуқ. 
Арзигүл КЕБИРОВА, 
Дардамту оттура мәктивиниң муәллими, 
көп балилиқ ана 
Алмута вилайити,
Уйғур наһийәси