• Әхбаратлар еқими
• 15 Ақпан, 2024

Ярайсиз, Ясмина!

Сиз «керлинг» дәп атилидиған спорт түри һәққидә аңлиғанмедиңиз? Ахирқи вақитта елимиздә аммибаплиққа егә болуватқан бу оюн – қишлиқ Олимпиада оюнлириниң бир түри һесаплиниду. «Муз үстидики шахмат» атилип кәткән ушбу оюнниң саламәтликкә пайдиси зор. Болупму әқил-ойниң яхши, тез тәрәққий етишигә тәсир қилидиған көрүниду. Қаримаққа оңайдәк билингини билән, тәртип-қаидиси алаһидә керлингниң тарихи әсли ХVI әсирдә Шотландиядин башланған болуп, 1998-жилдин башлап Олимпиада оюнлириниң қатариға қошулди. 

Сабирәм ӘНВӘРОВА, 
«Uiğur avazi»

Керлингни әң демократиялик оюн десәкму болиду. Чүнки 16 яштин 60 яш арилиғидики спортчилар команда тәркивигә кирип, оюнға қатнишалайду. Қазақстанда Керлинг федерацияси жигирмә жилдин бери иш елип бармақта. Мошу вақит арилиғида он алтә талланма команда тәшкилләнди. Хош, мәзкүр мақалимизниң қәһримани Ясмина Злавдунова Қазақстан Керлинг федерациясиниң Алмута шәһири бойичә яшлар (юниор) командисиниң әзаси. 
Ясмина Радулинқизи һазир 14 яшта. 2021-жилдин башлап Керлингқа қатнишип, көплигән утуқларни қолға кәлтүргән яш спортчи яхши көрсәткүчләрни көрситип, 2022-жилниң үмүт ейидин башлап Қазақстан Жумһурийитиниң спорт чевәрлигигә үмүткар болди. 
– Ясмина өйүмизниң тунҗиси. Кичик вақтидин спортқа қизиқиду. Момиси «Алматы аренида» клинингта бригадир болуп ишләтти. Шу вақитта момиси билән биллә ишқа берип, керлинг оюнини көрүп, қизиқиши ойғанди. Он икки йешидин тартип керлинг билән мәшиқлинип келиватиду. Шундақла федерациядә керлинг билән бирқатарда питанг вә воллейболғиму қатнишиду. Бош вақтида қәғәздин һәрхил буюмларни ясап, қолһүнәргә қизиқиду. Мәктәпичилик «Баһар» ансамблиниң тәркивидә уссулғиму қатнишиду, – деди Ясминаниң аниси Зарина һәдә. 
Биз сөһбәтлишишкә барған пәйттә Ясмина Хәшкиләң шәһиридики чемпионатқа қатнишишқа кәткән екән. Қизини һәртәрәплимә қоллап, келәчигидин чоң үмүт күтиватқан ата-аниси униң мәшиқләндүргүчиси билән мәктәптики устазлириға алаһидә миннәтдарлиғини йоллиди. 
Яш керлингчиниң бөлмисигә қоюлған кубок, медаль, дипломлар бирдин диққитимизгә чүшти. Өткән жили Ясмина ҚҖ Мәдәнийәт вә спорт министрлигиниң спорт вә тәнтәрбийә ишлири комитети уюштурған ІV Қишлиқ яшлар оюнлирида І дәриҗилик дипломға муйәссәр болди. Шундақла ҚҖниң Керлингтин ХХІІІ чемпионаттида Алмута командисиниң тәркивидә болуп І орунға еришти. Мукапатларниң арисида Тунҗа Президентимизниң, Керлинг спорт федерацияси президентиниң қоли қоюлған дипломларму бар. 
Ясминаниң келәчәктә техиму чоң утуқларни қолға кәлтүрүшигә тиләкдашлиқ билдүрүп, ата-аниси билән хошлаштуқ. Униң келәчәктә Олимпиада оюнлириға қатнишип, хәлқимизниң, елимизниң махтинишиға айлинишини үмүт қилимиз.