• Әхбаратлар еқими
• 02 Мамыр, 2024

Көтирәңгү кәйпият

Һәммимизгә мәлумки, елимизниң бирқатар вилайитидә орун алған тәбиий апәтниң зәрдавидин авам хәлиқ хелә аваригәрчиликни тартип кәлмәктә. Көплигән йеза-кәнтләр су астида қелип, адәмләр панасиз қалди. Шуниң ақивитидин талада қалған адәмләр бехәтәрлик җайларға вақитлиқчә көчирилди. Җүмлидин мәктәп оқуғучилириниң бир топи Әмгәкчиқазақ вә Талғир наһийәлиригә қарашлиқ «Тау-Жаңашар», «Тау-Туран» лагерьлириға орунлаштурулди.

Мәшүр САСИҚОВ,
«Uiğur avazi»

Талғир наһийәси Гүлдала йеза округи һакиминиң орунбасари Меруерт Азилкияшеваниң «Тау-Турандики» балиларниң һалидин хәвәр елип келиш тәшәббусини биринчиләрдин болуп, ушбу йезидики ханим-қизлардин тәркип тапқан «Назугум» топи қоллап-қувәтлиди. Уларға Әлаевлар аилиси қошулди. Гүлдалалиқлар жиғилған мәбләққә татлиқ-турум, мевиләрдин сирт, 100 данә чапан, 100 данә баш кийим, һәрхил кийим-кечәкләр, шахмат-шашкилар билән поңзәкләрни сетивелип, балиларға тарқитип бәрди. 
Шундақла кичик достлар алдида сехирчилар билән нахшичи-уссулчилар өз һүнәрлирини намайиш қилип, уларниң кәйпиятини техиму көтиривәтти. 

***
Алмута вилайәтлик билим башқармисиниң рәһбири Салтанат Беспаеваниң ейтишичә, мошу жилниң 10-үмүт күни педагоглар Ғәрбий Қазақстан вилайитидин кәлгән 70 оқуғучини Алмутида қарши елип, уларни Әмгәкчиқазақ наһийәсигә қарашлиқ «Тау-Жаңашар» оюн-мәшиқ лагериға, ақтөбилик 100 оқуғучини болса, Талғар наһийәсигә қарашлиқ «Тау-Туран» лагериға орунлаштурди.
Балиларға роһий вә маддий ярдәм көрситишни мәхситидә вилайәттики мәктәпләр акцияләрни уюштурмақта. Җүмлидин өткән шәнбә күни И.Саттаров билән Жаңашаруа оттура мәктәплириниң устазлири билән оқуғучилиридин тәркип тапқан пидаийлар топи «Тау-Туран» оюн-мәшиқ лагериға берип, изгү-соваплиқ ишларни әмәлгә ашуруп кәлди. Мәзкүр билим дәргаһлириниң мудирлири Әзимҗан Мәрүпов билән Алия Азнибақиева алди билән мәктәпләрдә «Биз – бир әл» мавзусида акция уюштуруп, униңдин чүшкән мәбләққә балиларға һаҗәтлик озуқ-түлүк вә кийим-кечәкләрни алған. 
Бизни лагерьниң баш тәрбийичиси Темирлан Санауаров күтүвалди. Бу күни кичик достлиримизға ихчам әдәбий-музыкилиқ салам йоллидуқ. Атап ейтқанда, музыка пәниниң муәллими Қарлығаш Оңалбаева билән яш талантлар Әрмидин Ярмуһәмәтов, Айзере Айдынқызы йеқимлиқ нахшилардин чашқа чашса, жуқарқи синип оқуғучилири Гүлназ Турсунҗан, Сумбат Абилһемит көңүл тәвритәр шеирларни ипадилик оқуп бәрди.
Шуниңдин кейин тәнтәрбийә пәниниң муәллимлири Ришат Имрәмзиев, Бәхтишат Һосманов, Қутлушҗан Мәһәмәтов, Асхат Әбишев оқуғучилар арисида миллий оюнлар мусабиқисини өткүзди. 
Ахирида ғалип чиққан командилар билән йәккә оюнчилар медаль вә пәхрий ярлиқлар билән тәғдирләнди. 

Абдулҗан АЗНИБАҚИЕВ, 
И.Саттаров намидики оттура мәктәпниң муәллими