• Әхбаратлар еқими
• 02 Мамыр, 2024

Дөләт рәһбири шәнбиликкә қатнашти

Өткән шәнбә күни Президент Қасым-Жомарт Тоқаев «Таза Қазақстан» җумһурийәтлик экологиялик акцияси даирисидә уюштурулған умумшәһәрлик шәнбиликкә қатнишип, пайтәхттики «Улытау» аллеясидә көчәтләр тикти. 
 Президент билән биллә пидаийлар, «Ассамблея жастары» тәшкилатиниң вәкиллири, елимизниң илим, креатив индустрия, мәдәнийәт, спорт саһасидики актив яшлар вә алда өтидиған V көчмәнләр оюнлириға қатнишидиған спортчилар, Президентлиқ яшлар кадр резервиниң әзалири иштрак қилип, 430 көчәт тикти. 
 Қасым-Жомарт Тоқаев яшлар билән болған сөһбәт давамида җәмийәттә экология мәдәнийитини қелиплаштуруш, тәбиәтни асраш муһим екәнлигини қәйт қилди.
— Һәқиқәтәнму, елимизни аватлаштуруш – чоң дөләтлик әһмийити бар иш. Бу бүгүн чиқип, әтиси унтуп кетидиған бирқетимлиқ иш әмәс. Мәзкүр иш изчиллиқ билән жүргүзүлиду. Туғулған йеримизни таза тутушимиз лазим. Бу – умуммиллий мәсилә. Қазақстанимиз таза болуши һаҗәт. Паскина әлгә меһман сүпитидә, инвестор сүпитидә һечким кәлмәйду. Бирақ, әң алди билән, Қазақстанниң таза, көркәм болғини биз үчүн, йәни хәлиқ үчүн керәк. Бу күндилик һаят тәризигә айлиниши лазим. Шундақла бу иш пайтәхт яки чоң шәһәрләрнила әмәс, кичик шәһәрләрдә, наһийәләрдә вә йезилардиму дайим уюштурулиду. Пүткүл Қазақстанни таза тутуш өзимизгә, яшларға бағлиқ. Мән яшларға ишинимән. Шуңлашқа яшларға чоң үмүт билән қараймән, —деди Дөләт рәһбири. 
 Шуниң билән биллә Президент қанун вә тәртип үстүнлүги һәммигә бағлиқ екәнлигини ейтип, вандализм билән қәтъий күришишниң һаҗәтлигигә диққәт бөлди.
— Биз елимиз билән махтинишимиз лазим. Мәйли у коча, һойла яки өйләрниң подъези болсун, һәммигә яхши қаришимиз шәрт. Вандаллар билән қәтъий күришиш керәк. Шундақла уларниң қанун алдида қаттиқ җазалинидиғанлиғини ейттим. Һәрнәрсиниң чеки бар. Әпсус, һәммини бузувелип, кейин кәчүрүм сорайду. Елимиздә тәртип болуши керәк. Қанунға риайә қилиш һаҗәт,— деди Қасым-Жомарт Тоқаев. 
 Андин Президент Ботаникилиқ бағни арилап, умумшәһәрлик шәнбиликкә қатнишиватқан турғунларға, пайтәхтниң коммунал егилиги мәһкимилириниң хадимлириға миннәтдарлиқ билдүрди. 
 Шәнбилик давамида Дөләт рәһбиригә Астана шәһирини аватлаштуруш плани тонуштурулди.
 Шәһәр һакими Жеңис Қасымбекниң ейтишичә, бийил 1,1 миллион йешил көчәт, шуниң ичидә шәһәр территориясигә 35 миң, пайтәхтниң йешил бәлбеғи территориясидә 200 миң түп көчәт тикиш мәхсәт қилинмақта. Шундақла шәһәрдики 170 җәмийәтлик орунни, шуниң ичидә Есил дәриясиниң бойини, Ақбулақ қирғиғини, Триатлон парки, Течлиқ вә разимәнлик сарийи, ЭКСПО әтрапини аватлаштуруш ишлири давамлишиду. 
 Астана шәһириниң һакими пайхтәхтни аватлаштуруш концепцияси қобул қилинғанлиғини ейтип, мошу һөҗҗәткә мувапиқ көчәтләрни 3 жилғичә пәрвиш қилиш вәзиписи жүкләнгәнлигини һәм көпжиллиқ дәрәқләрни тикишкә әһмийәт берилидиғанлиғини ейтти.
 Униңдин ташқири, Президентқа «Мыңжылдықтар аллеясини» тәрәққий әткүзүш һәм Дуниявий көчмәнләр оюнлириға тәйярлиқ җәрияни һәққидә һесават берилди.