- Йеңилиқлар
- 22 Ақпан, 2013
Әзиз «Күмүч ейиқ» мукапитини йеңивалди
Өткән һәптиниң ахирида бийил 63-қетим өткән «Берлинале — 2013» хәлиқара кинофестивали өз ишини йәкүнләп, ғалиплар ениқланди. Мәзкүр фестивальға бийил дәсләпки қетим Ш.Айманов намидики «Қазақфильм» киностудияси қатнишип, режиссер Эмир Байғазинниң «Уйғунлуқ савақлири» («Уроки гармонии») фильми «Әң яхши операторлуқ әмгәк» номинацияси бойичә ғалип аталди вә фильмни чүшәргән уйғур жигити, талантлиқ оператор Әзиз Җанбақиев фестивальниң «Күмүч ейиқ» мукапитиға сазавәр болди.
Қазилар топи бийил кинофестивальға иштрак қилған 400 фильмниң ичидин 19 фильмни мукапатлиқ орунларға лайиқ дәп тапқан. Җүмлидин кинофестивальниң Баш мукапити — Гран-При Данис Тановичниң «Төмүр-тесәк жиққучиниң һаятида йүз бәргән вақиә» намлиқ һөҗҗәтлик фильмиға буйрупту. «Алтун ейиқ» мукапитиға румыниялик Калин Питер Нецерниң «Бала мәвқәси» фильми еришти. «Әң яхши режиссерлуқ әмгәк» номинациясигә америкилиқ Дэвид Гордон Гринниң «Көчкүнни бойсундурғучи» фильми лайиқ дәп тепилди. Иранлиқ Джафар Панахи «Йепиқ пәрдә» фильми «Әң яхши сценарий» номинацияси бойичә ғалип аталди.
Кинофестивальда мукапатни елиш үчүн сәһнигә көтирилгән уйғур жигити Әзиз Җанбақиев ушбу фильмниң режиссери Эмир Байғазинға, продюсери Анна Качкоға вә «Қазақфильм» киностудиясиниң рәһбири Ермек Аманшаевқа өзиниң миннәтдарлиғини инглиз тилида изһар қилди.
Өз новитидә бизму Әзиз Мәһәммәтҗан оғлини бу чоң утуғи билән тәбрикләймиз.
Бәхтишат СОПИЕВ.
63243 рет
көрсетілді21142
пікір