• Дидар ғенимәт
  • 31 Мамыр, 2013

Жигирмә жилдин кейин баш қошти

Мәлумки, Әл-Фараби намидики Қазақ миллий университети җумһурийитимиздики әң чоң алий оқуш орунлириниң бири болуп һесаплиниду. Мәзкүр билим дәргаһида бүгүн ондин ошуқ факультет бар, уларниң арисида Журналистика факультетиниң егиләйдиған орни алаһидә. Өткән һәптидә әйнә шу факультетниң қазақ бөлүмини 1993-жили тамамлиғанларниң учришиши болуп өтти. Униңға университет оқутқучилири билән студентлар вә сабиқ курсдашлар қатнашти. Учришишқа қәдәм тәшрип қилғанларниң арисида қазақ бөлүмидә тәһсил көргән бәш нәпәр уйғур пәрзәндиму болди. Ейтмақчи, улар бу күнләрдә һәрхил саһаларда паалийәт елип бериватиду. Җүмлидин Ершат Әсмәтов — «Уйғур авази» гезити баш муһәрририниң орунбасари — җавапкәр катип лавазимида ишләватиду. У Қазақстан Журналистлар иттипақиниң лауреати, Қазақстан хәлқи Ассамблеясиниң әзаси. Алимҗан Абләсәнов — Уйғур наһийәсиниң Кичик Дехан йеза округида селиқ инспектори. Пәрһат Бақиев болса, Үрүмчи шәһиридики «Ширәли» хәлиқара сода ширкитиниң логистика, импорт-экспорт бөлүминиң мудири. Минәмҗан Асимов болса, узун жиллар давамида ҚазМУниң журналистика факультетида паалийәт елип барди. Һазир у тиҗарәт билән шуғуллиниватиду. Бәхитҗан Разиев — Панфилов наһийәсиниң Яркәнт шәһиридики Х.Һәмраев намидики уйғур оттура мәктиви мудириниң оқуш ишлири бойичә орунбасари. Һәр жили болидиған Учумкарлар күни даирисидә өткән мәзкүр чарә-тәдбир улуқ әллама Әл-Фараби билән академик Ө.Жолдасбековниң хатирисигә орнитилған ядикарлиққа гүл қоюш әнъәниси билән башланди. Шуниңдин кейин учришишқа тәклип қилинған меһманлар вә оқутқучилар билән студентлар Ө.Жолдасбеков намидики Студентлар сарийида давамлашқан тәнтәнилик кәчкә қатнашти. Кәчни университет ректори, академик Ғалым Мутанов киришмә сөз билән ачқандин кейин, университетниң Учумкарлар ассоциацияси тәрипидини чүширилгән видео-клип көрситилди. Журналистика факультьетини 1993-жили тамамлиғанлар өзлири тәһсил көргән билим дәргаһиниң бәш әлачи студентиниң һәр қайсисиға 100 миң тәңгидин мәхсус стипендия тапшурди. Сабиқ курсдашлар шундақла студентлиқ дәвирниң әң қизиқ дәмлирини өткүзгән университетниң 5-ятақханисини зиярәт қилип, хатирә сүпитидә дәм елиш бөлмисигә юмшақ җиһаз соға қилди. Андин кейин улар Т.Қожакеев намидики мәҗлис залида баш қошуп, учумкарларниң әслимә-хатирилирини өз ичигә алған «Қолтаңба» китавиниң тонуштуруш мәрасимини өткүзди. Учришишта «Қазақ энциклопедиясиниң» баш мудири, Қазақстан Җумһурийити Миллий пәнләр академиясиниң мухбир-әзаси, филология пәнлириниң доктори, профессор Бауыржан Жақып, журналистика факультетиниң декани, филология пәнлириниң доктори Өмирхан Әбдиманов сөзгә чиқип, мәзкүр баш қошушни уюштурған сабиқ шагиртлириға миннәтдарлиғини изһар қилди вә уларниң паалийитигә утуқ тилиди. Андин кейин новәт билән сөзгә чиққан сабиқ курсдашлар өз сөзлиридә бүгүнки күндә қол йәткүзгән утуқ-муваппәқийәтлиридә устазлириниң әмгәк-әҗриниң бар екәнлигини һечқачан унтумайдиғанлиғини чоңқур миннәтдарлиқ билән тилға елип, уларға мустәһкәм саламәтлик, узақ өмүр тилиди. Шәмшидин АЮПОВ.

824 рет

көрсетілді

2

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Бәхитжан

14 Тамыз, 2020

есил студентлиқ дәвир!

Бәхтишат

14 Тамыз, 2020

уйғур жигитлири билән биллә уйғур қизлириму болдиғу дәймән...

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы