• Йеңилиқлар
• 07 Маусым, 2013

Ширәм қериндаш

Мән гайида һәмширә дегән сөзниң мәнаси — «һәм ширәм туққиним» дегини болса керәк, дәп ойлап қалимән. Ағриқханида йетип чиққанлар бу пикримгә җәзмән қошулиду. Давалиғучи дохтур ағриғиңни ениқлап, 2-3 күндә бир һалиңни сорап қойиду. Һәмширә болса, әтидин-кәчкичә бешиңда пәрванә. Бәзидә йеқин туққиниңму улардәк җанға арам берәлмәйду. Раст, бу уларниң кәспий пәрзи, мәҗбурийити болар. Лекин шу кәсипкә җан-дили билән берилип, уни адил бәҗа қилиш башқа гәп. Шундақ ширәмләрниң бири синипдишим — Гүлнарәм Исмайилова. Чонҗа мәктивидә биллә оқуған биз тәғдир тәқәзаси түпәйли һазир Алмутиниң Ақбулақ мәһәллисидә жутдаш болуп қалдуқ. Шәһәрниң чирайлиқ, сөләтлик кочилиридин сирт, әгир-тоқай, ғимсилириму тола. Биз илгири әшундақ халта кочиларда  пат-пат учришип қалаттуқ. — Һой, бу сениң ишиң йоқму? Әтидин кәч киргичә кочидин кирмәйсән. Ериң жугач охшимамду, — дәп һәзиллишимән. — Өзәңчу? Өзәң немигә қаңғип жүрисән? — Гезитқа муштири топлап… — Һә, мән сениң әшу келәчәк муштирилириңни давалап жүримән. Гүлнарәм меһнәткәш чоң аилидики 9 пәрзәнтниң бири. Дадиси Әхмәт һаяттин әтигән кәтти. Гүнәм чоң апимиз һазир 83 яшта. Биз мәктәпни түгәткән жили у Алмутидики шипаханиларниң биригә аддий ройхәткә алғучи болуп ишқа орунлашти. Ишләп жүрүп, һәмшириләрни тәйярлайдиған училещиниң кәчки курсида оқуди. 1983-жилдин бери мошу шәһәрлик 8-балилар шипаханисида ишләп келиватиду. Язниң томузидиму, қишниң қар-боринидиму, сумкисини сөрәп, өй арилап, гөдәкләрниң саламәтлигини күзәтти. Вақит — ериқ, өмүр аққан су, охшайду. Һәш-пәш дегичә 30 жил өтүп кетипту. Кейинки он жилда синипдишим коча кәзмәс болди. У — чоң һәмширә. Илгәркидәк пути ағримайду. Бирақ… — Хә-әп, маңғиним яхшикәнла, — дәп қойиду у. Һәмшириләрниң, болупму участкилиқ балилар һәмширилириниң иши, һәқиқәтәнму, мүшкүл, җапалиқ меһнәт. Бала дунияға кәлгәндин тартип, 15 яшқичә уларниң назаритидә болиду. Вақти-вақтида һалидин хәвәр елип, бетап болуп қалса, дохтурға яки ағриқханиға әвәтиду. Гөдәкләрниң өз қәрәлидә һәрхил әмләткиләрни елишини тәминләйду. Участкилиқ һәмшириләрниң тинимсизлиғиға бәзидә таң қалисән. Өткәндә хошнимизниң өйидә иҗаригә туруватқан яш аилә туюқсиз көчүп кәтти. Уларниң 6 айлиқ балиси бар еди. Һәмширә қиз уларни издәп, бир ай давамида 3-4 рәт кәлди. Қаяққа көчүп кәткинини өй егисиму билмәйду. Бизму хәвәрсиз. — Ундақ вақиә шәһәр шараитида көп учрайду, — дәйду Гүлнарәм. — Болупму, әшундақ турмуш-шараити еғир яш аилиләрниң балилири көп ағрийду. Биз уларни «тавакәлчилик» топиға ятқузимиз. Илаҗә болмиса, полиция арқилиқ издәймиз. Синипдишимға қайил болидиғиним, униң икки гепиниң бирила иши һәққидә. Йолдиши Сәйдәхмәт ақ көңүл жигит. Шундиму «Өйдики балилар билән чатиғиң йоқ, хәқниңла ғемини қилисән», дәп ғуңшуйдиғини бар. Хушхой Гүлнарәм униңму давасини тапиду. — Һелиму, Худаға шүкри, һөкүмәт тәрипидин балиларға болған ғәмхорлуқ жилдин-дилға яхшиланмақта. Шуниң нәтиҗисидә кейинки жилларда гөдәкләр арисидики өлүм вә ағриқлар кәскин азайди, — дәп хошал болиду у. Һазир Гүлнарәм қол астидики онлиған участкилиқ һәмшириләрниң ишини башқуруп, уйғунлаштуруп келиватиду. Бая ейтқинимиздәк, айиғи әмәс, әнди беши көпирәк ағрийдиған болди. Шуларниң һесавитини елиш, жуқуриға һесават тапшуруш билән бәнт. Тәҗрибилик һәмшириләр, дипломи йоқ демисә, врачлардин кам әмәс. Тонуш-билиш, холум-хошна, чоң-кичик ағрип қалса Гүлнарәмгә жүгрәйду. Бириниң һарарити, бириниң қан қисми… йәнә бири укол салдуруш үчүн кириду. Өз ара «Тез ярдәм» атилип кәткән Гүлнарәм «яқ» дейишни билмәйду. 30 жил ейтмаққила оңай. Биз бир-биримизни көргәндә, мәктәп есимизға чүшүп, өзимизни бала һис қилидекәнмиз. Һә, вақит болса, туйдурмай, яшлиқ, бәңвашлиқни оғрилап кетипту. Гүлнарәм һазир пәрзәнтлири Әзиз билән Наргизани әр йәткүзүп, улардин бирдин нәврә сөйүпму үлгәрди. Өйидә шулар билән көңли хуш. Календарьда «қизил» күнләр хелә көп. Лекин 12-май униң үчүн бөләк. Қизил әмәс, бирақ «Һәмшириләр күни» дәп атап көрситилгән. Шуңа һәр жили вақит тепип, «Мәйримиң билән, ширәм қериндаш», дәп тәбрикләп қойимән. Чүнки мениң синипдишим униңдинму чоң һөрмәткә лайиқ инсан.

Әхмәтҗан ИСРАПИЛОВ.

Алмута шәһири. СҮРӘТТӘ: чоң һәмширә Гүлнарәм Исмайилова (солда) вә бөлүм башлиғи Айсулу Садирова иш үстидә.