• Йеңилиқлар
• 07 Маусым, 2013

«Ату» қурванлирини хатирилиди

31-май — Сәясий тәқип қурванлирини хатириләш күнидә Әмгәкчиқазақ наһийәсинин бәш йезисида матәм митинглири Шуларниң бири өз вақтида «иккинчи Бухара» дәп аталған Қорам йезисида өтти. Бу митингни Қорам йеза округиниң һакими Жуман Сәрсенбаев ачти. Андин көпчилик алдида сөзгә чиққан җумһурийәтлик Уйғур этномәдәнийәт мәркизиниң рәиси Шаһимәрдан Нурумов Дөләт рәһбириниң йеқинда болуп өткән Қазақстан хәлқи Ассамблеясиниң сессиясидики докладиға асасланған һалда, миллий разимәнлик вә вәтәнпәрвәрлик мәсилилиригә тохталди. Униңдин кейин сөз новитини алған Алмута шәһәрлик Уйғур этномәдәнийәт мәркизиниң рәиси Абдуллам Һошуров «Ату» паҗиәси вә сәясий тәқипләш жиллири йүз бәргән дәһшәтлик қирғин һәм аммивий ачарчилиқ һәққидә ениқ мисалларни кәлтүрүп, көпчиликни инақлиққа, бирликкә чақирди. 92 яшлиқ жут мөтивәри, қошақчи Турсун Зәйналовниң оқуған шеири гүлдүрлигән чаваклар билән қарши елинип, милләтләр ара достлуқниң әһмийити һәққидә ейтқан сөзлири көпчиликни һаяҗанға салди. Шуниңдин кейин алмутилиқ меһманлар ядикарлиққа гүлчәмбәрләрни қойди. Митинг ахири қурван болғанларниң роһиға атап өткүзүлгән нәзиргә улашти. Униңда Челәк йеза округиниң һакими Қуат Байғоҗаев, Әмгәкчиқазақ наһийәлик Уйғур этномәдәнийәт мәркизиниң рәиси Арселин Зулияров, җәмийәтлик ишларниң активисти Реһан һаҗим Абдусаттарова, Қорам йезисиниң жигитбеши Қурванҗан Исламов вә башқилар сөзгә чиқип, шу жиллири йүз бәргән дәһшәтлик қирғинниң хәлқимиз тарихидики «ақ дағларниң»  бири екәнлигини ечинишлиқ билән тилға алди. Шаир Әкрәм Садировниң ату паҗиәсигә беғишлап оқуған шеириму һечкимни бепәрва қалдурмиди.

Мәһәмәтҗан ҺАПИЗОВ.

***

Буниңдин 95 жил илгири йүз бәргән бу қанлиқ паҗиәни Қаратуруқ, Достлуқ, Лавар йезилириниң җамаәтчилиги техи унтуғини йоқ. Шуңлашқа улар һәр жили Лавар йезисида наһәқтин-наһәқ қаза болған қериндашларниң роһиға атап нәзир өткүзүп, дуа-тәгбир оқуйду. Бу қетимму Достлуқ йезисиниң ханим-қизлири, жут турғунлири Марат Һасанов билән Әйса Сәлимовниң һамийлиғида Лаварда қаза болғанларниң роһиға атап, нәзир өткүзди. Униңда сөз алған Қаратуруқ йеза округиниң һакими Ермек Самсыбеков, җумһурийәтлик Уйғур этномәдәнийәт мәркизиниң рәиси Шаһимәрдан Нурумов, Алмута шәһәрлик Уйғур этномәдәнийәт мәркизиниң рәиси Абдуллам Һошуров,  Достлуқ йезисиниң имами Нурахун Дуганов, мәзкүр жутниң жигитбеши Алимҗан Тохтиев вә башқилар тарихий мәнбәләргә вә ата-бовилириниң ейтип бәргәнлиригә асасланған һалда, «ату» паҗиәси тоғрилиқ өз пикирлири билән ортақлашти вә бегуна қаза болғанларни мошундақ әсләп туруш тирикләрниң пәрзи һәм қәрзи екәнлигини алаһидә қәйт қилишти.

Бәхтишат СОПИЕВ.

 

***

«Ату» паҗиәси Әмгәкчиқазақ наһийәсиниң Таштиқара йезисиниму атлап өтмигән. Ейтишларға қариғанда, бу йезидин 758 адәм баш кесәрләрниң қолидин қаза тапқан екән. Йеқинда мәзкүр йезида әйнә шу наһәқ оққа тутулған жутдашларниң хатирисигә беғишланған митинг болуп өтти.У жут имами Имам Разиевниң дуа-тәгбири билән башланди. Шуниңдин кейин Әмгәкчиқазақ наһийәлик ички сәясәт бөлүминиң вәкили Ермек Қурманғалы, Саймасай йеза округиниң һакими Рубен Саядянц, устаз Күләш Ибраимова, Таштиқарису йезисиниң жигитбеши Давутҗан Бурһанов әрвалар роһиға тазим қилған һалда, мәзкүр қирғинға аит шәхсий ой-пикирлири билән бөлүшти вә шу күнки мәрасимни уюштурғучиларға өзлириниң миннәтдарлиғини изһар қилди.

Рашидәм РӘҺМАНОВА.

 Әмгәкчиқазақ наһийәси.