• Җасарәт — мәңгүлүк
• 04 Мамыр, 2017

Қәдирданимизниң қош мәйрими

Қәдирдан атимиз Абдулла Һашир оғли Розиев һаят болса, йүз яшқа толатти. У 1917-жили Челәк наһийәсиниң (һазирқи Әмгәкчиқазақ наһийәси) Қаратуруқ йезисида туғулған. У оттура мәктәпни тамамлиғандин кейин, Ташкәнт шәһиридики малийә институтиға оқушқа чүшиду. 1941-жили мәзкүр билим дәргаһиниң үчинчи курсини тамамлиғанда Улуқ Вәтән уруши башлиниду. У дәсләпкиләрдин  болуп пидаийлар қатариға йезилип, фронтқа атлиниду. Воронеж шәһиридә қисқа муддәтлик курсни тамамлап, лейтенант унванида Волоколамск әтрапидики җәңләргә қатнишиду. Көп өтмәй, у взвод командири болуп тайинлиниду. Абдулла Һашир оғли башқурған взвод җәңчилиригә һәрбий қисимларниң штаб оттурисидики турақлиқ алақисини тәминләш вәзиписи жүклиниду. Уларниң взводи Можайск линиясини қоғдашқа қатнишиду. Абдулла Розиев Германиягичә берип, 9-Май – Ғалибийәт күнини Саарбрюкен шәһиридә қарши алиду. У җәңләрдә көрсәткән җасарити үчүн көплигән орден вә медальлар  билән мукапатланған. Абдулла Розиев уруштин кейин Алмутида яшайду. У алтә пәрзәнт тепип, улардин 14 нәврә вә 9 чәврә сөйиду. А.Розиев 1948-жилдин тартип дәсләп басмиханида, андин «Йеңи һаят» журналиниң редакциясидә корректор болуп ишләйду. 1957-жилдин 1984-жилғичә шәһәрдики 2-нан заводида әмгәк қилип, һөрмәтлик дәп елишқа чиқиду. У өзиниң әмгәксөйгүчлүги вә ақкөңүллүги билән кәсипдашлириниң сәмимий һөрмитигә сазавәр болди. А.Розиев математика пәнигә болған қизиқишини һаятиниң ахириғичә сақлап, уни өзиниң пәрзәнт вә нәврилиригә үгәтти. Атимиз биздә шахмат оюниға дегән қизиқишниму ойғатти. Абдулла Розиев еғир, лекин мунасип һаят йолини бесип өтти. Аилимиз һәр жили 9-Майда қош мәйрәм – Ғалибийәт күни вә атимизниң туғулған күнини нишанлаш үчүн дәстихан әтрапиға җәм болуп, өз әслимилиримиз билән бөлүшимиз. Адил РОЗИЕВ. Алмута шәһири.