• Җасарәт — мәңгүлүк
• 22 Ақпан, 2024

Авған урушиниң ветеранлириға һөрмәт

15-һот... Календарьдики унтулмас күнләрниң бири. Чүнки дәл мошу күни Кеңәш әскәрлири авған йеридин чиқирилған еди. Мәлумки, тарих сәһиписидики ушбу вақиәгә бийил оттуз бәш жил толди. Арида чарәк әсиргә йеқин вақит өтсиму, урушниң зәрдави техи унтулғини йоқ. 1979 — 1989-жиллар Кеңәш һөкүмитидин Авғанстанға әвәтилгән 14 миңдин ошуқ әскәр үчүн һаятидики әң еғир жиллар сүпитидә сақлинип қалди.

Сабирәм ӘНВӘРОВА, 
«Uiğur avazi»

Шуңлашқа һәр жили елимиздә һот ейиниң он бәши етиварсиз қалған әмәс. Бийилму бу сәнә өз дәриҗисидә атап өтүлди. Адәттикидәк, наһийә мәркизидә ветеранларға беғишланған ядикарлиққа гүлчәмбәр қоюш мәрасими өткүзүлүп, ахири «Авғанниң һавасида от кәчкән батурлар» намлиқ чарә-тәдбир билән давамлашти. Ветеранларға Алмута вилайити мудапиә ишлири бойичә департаментиниң «Кеңәш әскәрлириниң Авғанстандин чиқирилғиниға 35 жил» мәрикилик медальлири тапшурулуп, әрлиги улуқланди. Узаққа созулмиған мәрасимниң давами концертлиқ программиға улишип, жиғилған җамаәтни узаққичә унтулмас тәсиратқа бөлиди. 
***
Дәл мошундақ чарә-тәдбирләрниң бири Ғалҗат йезисидиму өткүзүлди. Ениғирақ ейтсақ, Ғалҗат йеза округи һакиминиң аппарати йезилиқ Мәдәнийәт өйидә «Авған урушида җапа чәккәнләр» дегән мавзуда авған урушиниң қатнашқучиси Бәхитҗан Сопиев билән учришиш уюштуруп, ветеранға һөрмәт көрсәтти. «Дүгләк үстәл» әтрапидики учришишқа йеза һакими вә йезилиқ һакимийәт хадимлири, ветеранлар кеңишиниң рәиси, жигитбашлири вә йеза яшлири қатнашти. Мәдәнийәт өйиниң методисти Гүлстан Пәхирдинованиң киришмә сөзидин кейин, йеза һакими Алимҗан Зайитов, йезилиқ ветеранлар кеңишиниң рәиси Мәрүпҗан Мәмиров, жигитбеши Махмут Турдиев сөз елип, Бәхитҗан Мәһәмәтоғли Сопиевниң җасарити һәққидә гәп қозғиди. Мәзмунлуқ сөзләр, тәбрик-тиләкләрдин кейин йеза һакими ветеранға соғилар тапшуруп, жут намидин һөрмәт көрсәтти. Кәчниң ахири китап көргәзмиси билән аяқлашди. 

Алмута вилайити,
Уйғур наһийәси
***
Гөһәрбүви ИСМАЙИЛҖАНОВА, 
«Uiğur avazi»

 Тәкитләш керәкки, Авған урушиға Яркәнт тәвәсидин 98 җәңчи қатнишип, уларниң 8 җәң мәйданида вапат болди. Һазир уларниң 64 аримизда. Җәң мәйданлирида алған җараһәтлириниң ақивитидин жутиға келип, һәрхил жилларда вапат болғанлар аз болмиғачқа, уларниңму сепи шалаңлап бариду. 
Авғанстан уруши қатнашчилириға беғишланған мәрасим иштракчилири Яркәнт шәһириниң мәркизидики Улуқ Вәтән уруши билән Авғанстанда қурван болғанлар хатирисигә орнитилған ядикарлиқ йенида баш қошуп, вапат болған бәйнәлмиләл-җәңчиләрни әскә алди. 
Шуниңдин кейин мәрасим наһийәлик Мәдәнийәт өйидә «Жат жерде от кешкендер» мавзусидики мәрикилик чарә-тәдбиргә улашти. Дәсләп Панфилов наһийәси Мудапиә ишлири бойичә бөлүминиң башлиғи, майор Серик Асанов сөзгә чиқип, қазақстанлиқ бәйнәлмиләл-җәңчиләрниң қәһриманлиғиға  тохталди. Панфилов наһийәлик  мәслиһәтниң кативи Ерғали Шоқпаров яркәнтлик җәңчиләрниң көрсәткән әрлиги вә қаза тапқан сәккиз оғланниң исминиң әбәдийләштүрүлүватқанлиғини тилға алди. Улар билим алған мәктәпләрдә ядикарлиқ тахтилири ясалғанлиғини тәкитлигән Ерғали Отарғалиулы бүгүнки күндә аримиздики 64 бәйнәлмиләл-җәңчигә «Кеңәш әскәрлириниң Авғанстандин чиқирилғиниға 35 жил» медалини тапшурди. Мәрасимда Авған йеридә һәм течлиқ һаятта вапат болған җәңчиләрниң йеқинлириғиму һөрмәт билдүрүлди. 
Тәнтәнидә «Диана» медицинилиқ колледжниң студенти Айдана Турлығазы мәйрәмлик тиләклирини изһар қилип, җәңчиләр әрлигини улуқлиди. Панфилов наһийәлик Авғанстан уруши ветеранлири кеңишиниң рәиси Талғат Теткусизов Вәтән алдидики борчини шәрәп билән өтәп қайтқан җәңчиләргә һөрмәт билдүрүп, уларниң әрлигиниң һечқачан унтулмайдиғанлиғини тәкит­лиди. 
Мәрасим давамида «Жаркент әуендері» ансамблиниң әзалири авған уруши мавзусиға йезилған нахшиларни иҗра қилип, көпчиликниң көңлидин чиқти. 

Жетысу вилайити,
Панфилов наһийәси

***
Рашидәм РӘҺМАНОВА,
«Uiğur avazi»

Авған урушиниң  вете­ранлириға Әмгәкчиқазақ наһийәсидиму һөрмәт көрситилип, мәзкүр мәйрәм тәнтәнилик рәвиштә нишанланди. Көпчилик Ишиктә шәһириниң мәркизидики бәйнәлмиләл-җәңчиләрниң һөрмитигә орнитилған мемориал тахта йенида бир минутлуқ сүкүт сақлап, андин мәрасим Әмгәкчиқазақ наһийәлик Туманбай Молдағалиев намидики наһийәлик Мәдәнийәт өйидә давамлашти. 

– Мәлумки, Кеңәш әскириниң авған йеридин чиқирилиши – сабиқ Кеңәш Иттипақиниң тәркивидики барлиқ әлләр үчүн тарихий әһмийәткә егә вақиә. 9 жил 10 айға созулған авған урушиға 600 миңдин ошуқ Кеңәш солдити қатнашти. Уларниң арисида 200 миңдин ошуғи һәрхил дәриҗидики орден вә медальлар билән тәғдирләнди. 86 адәм Кеңәш Иттипақиниң Қәһримани аталди. Җүмлидин 22 269 қазақстанлиқ қатнишип, җасарәт вә әрлик үлгисини көрсәтти. Һазир Әмгәкчиқазақ наһийәсидә 178 бәйнәлмиләл-җәңчи истиқамәт қилиду. Уларниң арисида 9 адәм уруштин һәрхил дәриҗидики җараһәтләр билән қайтип, мүмкинчилиги чәкләнди. Ушбу әһмийәтлик күнгә бағлиқ уюштурулуватқан бу тәнтәнилик кәч келәчәк әвлат үчүн тәлим-тәрбийә ретидә бебаһа, әлвәттә. Силәрниң көрсәткән җасаритиңлар биз үчүн дайим үлгә-ибрәт болиду һәм мәңгү ядлиниду. Силәр үлгилик аилиләрни қуруп, әвлат өстүрүп, елимизниң тәрәққиятиғиму салмақлиқ төһпә қошуп келиватисиләр. Мустәқил елимизниң бирлигини риваҗландуруштиму күч чиқириватисиләр. Шуңлашқиму бүгүнкидәк хошаллиқ күндә силәрниң барлиғиңларға чин жүригимдин миннәтдарлиқ билдүримән, – деди Әмгәкчиқазақ наһийәлик Ички сәясәт бөлүминиң рәһбири Дархан Ахметов авған урушиниң ветеранлирини тәбрикләп. 
Андин бәйнәлмиләл-җәңчиләргә Әмгәкчиқазақ наһийәси һакиминиң вәзиписини атқурғучи Ертай Нурмуханов намидин Тәшәккүрнамә вә «Кеңәш әскәрлириниң Авғанстандин чиқирилғиниға 35 жил» тәвәллудлуқ медальлири билән тәғдирлиди. 
Шундақла №6654 Қаракемер һәрбий бөлүми командириниң орунбасари, полковник Жандос Көлбаев, Әмгәкчиқазақ наһийәлик Мудапиә ишлири бойичә бөлүминиң рәһбири, полковник Марат Сейсебаев бүгүнки күнниң қәһриманлириға изгү тиләклирини билдүрүп, мукапатларни тапшурди. Әмгәкчиқазақ наһийәлик Авған уруши ветеранлири кеңишиниң рәиси Алмас Тасанов өзлиригә көрситиватқан һөрмәт үчүн сәпдашлири намидин рәхмитини ейтип, әл тиничлиғини тилиди.
Мәйрәм наһийә сәнъәткарлири тәрипидин тәйярланған уруш жиллири вә вәтәнпәрвәрлик нахшилирини өз ичигә алған концерт программисиға улашти.

Алмута вилайити,
Әмгәкчиқазақ наһийәси

***
Бәхтишат СОПИЕВ,
«Uiğur avazi»

Йеқинда Җамбул наһийәсиниң һакими Азамат Бектасов мәзкүр тәвәдики авған урушиға қатнишип, Вәтән алдидики борчини атқуруп кәлгән бир топ бәйнәлмиләл-җәңчиләрни мәйрими билән тәбрикләп, уларни тәвәллудлуқ медаль билән тәғдирлиди. 

Сабиқ җәңчиләрниң арисида Қарғалы йезисиниң турғуни Халмурат Мусаевму бар. Халмурат 1985-жили Новосибирск вилайитиниң Коченево йезисида һәрбий хизмитини өтәветип, шу йәрдин Авғанстанниң Қабул шәһиригә әвәтилиду. Икки жил өзиниң борчини ада қилип, ана жутиға қайтип келиду. 
У наһийәниң җәмийәтлик-сәясий һаятиға паал иштрак қилип, яшларни адил әмгәккә, қазақстанлиқ вәтәнпәрвәрлик роһта тәрбийиләшкә өзиниң биркишилик һәссисини қошуп кәлмәктә. Халмурат Рәхмидиноғлиниң җәмийәтлик ишлириму жуқури баһалинип, у күни «Ер Намыс» җумһурийәтлик җәмийәтлик бирләшмисиниң «Патриоттық және Азаматтық белсенділігі үшін» медали билән мукапатланди.

Алмута вилайити,
Җамбул наһийәси