• Турнир
• 11 Қаңтар, 2018

«Уйғур авазиниң» кубоги — «Триада» командисида

Бәхтишат СОПИЕВ, «Уйғур авази»/ Өткән һәптидә Алмута шәһириниң «Достлуқ» микрорайонидики 153-мәктәп-гимназиядә «Уйғур авази» гезитиниң кубоги үчүн волейбол бойичә мусабиқә болуп өтти. Униңға Алмута шәһири вә Алмута вилайитидин алтә команда иштрак қилди. Мусабиқиниң тәнтәнилик ечилишиға беғишланған мәрасимда сөзгә чиққан «Уйғур авази» гезитиниң баш муһәррири Ершат Әсмәтов, бийил Қазақстан уйғур мәтбуатиниң 100 жиллиғини нишанлаш алдида турғанлиғимизни тилға елип, мәзкүр турнирниң шу сәнә һарписида чарә-тәдбирләрниң бири екәнлигини қәйт қилса, А.Розибақиев намидики 153-мәктәп-гимназияниң мудири Шавкәт Өмәров волейбол ишқивазлириға утуқ тилиди. Шавкәт Нияз оғли мәзкүр турнирға Уйғур наһийәсиниң Кичик Дехан йезисидин “Кеңәш” командисиниң кәлгәнлигини алаһидә тәкитләп, өзиниң “153-мәктәп-гимназия” командиси тәркивидә ойнаш хаһиши пәйда болғанлиғини йошурмиди. Шундақ қилип, бир күн давам қилған мусабиқидә «Уйғур авазиниң» кубогини «Триада» командиси (команда капитани Адилҗан Абләсәнов) утувалди. Иккинчи вә үчинчи орунларни болса «ТЭЦ-2» (команда капитани Магелан Мәмәтов) вә «Алғабас» (команда капитани Абдуреһим Мәңсүров) командилири өзара бөлүшти. Оюн давамида алаһидә көзгә чүшкән Фармен Турсунов «Әң яхши оюнчи», Фармен Исаев «Әң яхши һуҗумчи», Магелан Мәмәтов «Әң яхши пас чиқарғучи», Сәйдуллам Һасанов (“Кеңәш” командисиниң капитани) «Йеши әң чоң оюнчи» номинациялири бойичә ғалип чиқти. Утуққа еришкән командилар билән оюнчиларға «Уйғур авазиниң» кубоги вә диплом, шундақла гезитниң һамийлири (Мәңсүровлар аилиси) тәрипидин маддий соғилар тапшурулди. СҮРӘТТӘ: «Триада» командиси.