• Турнир
• 12 Сәуір, 2024

Әдлийә хадимиға һөрмәт

Йеқинда Яркәнт шәһиридә, тонулған әдлийә хадими Бәхитҗан Ниязовниң һөрмитигә  волейболдин турнир уюштурулди. Турнирни Панфилов наһийәсиниң һакими Марат Сағымбек тәнтәнилик ачти. 

Гөһәрбүви ИСМАЙИЛҖАНОВА,
«Uigur avazi»

— Теги-тәкти алтөйлүк Бәхитҗан Ниязовниң исим-нәсиби жутумизғила әмәс, җумһурийәт даирисидә яхши тонуш. У Қазақ дөләт университетиниң әдлийә факультетини тамамлап, әмгәк паалийитини мәзкүр университетта башлиди. Андин Панфилов, Алакөл, Ескелди наһийәлик сотиниң судьяси болуп ишлиди. Бу қийин һәм җавапкәрлиги чоң кәсиптә һаятиниң 30 жилини  сәрип қилди. Пурсәттин пайдилинип, Бәхитҗан Ниязовни биз «Панфилов наһийәсиниң Пәхрий граждини» дәп аташни мувапиқ көрдуқ, – дәп уни тәнтәнилик түрдә тәбрикләп, учисиға чапан япти. 
Турнирда ҚҖ Ички ишлар министрлигиниң генерал-майори Асқар Оспанов башлиған кәсипдашлири, кичик дадиси Алмас Ниязов вә башқилар сөз елип, униң иш-паалийитидин, үлгә-ибрәтлик һаят йолидин ейтип берип, һөрмәт көрсәтти.
Җинаий ишлар коллегияси судьяси Бәхитҗан Ниязовниң һөрмитигә уюштурулған турнир қизиқ һәм кәскин өтти. Жетису вилайити һәм Алмута шәһиридин кәлгән әдлийә ветеранлири һәм спорт ишқивазлири тәркип тапқан команда ичидин Уйғур наһийәси Чонҗа йезисиниң «Намад» командиси І орунға егә болди. ІІ орунға Алмутиниң «Жетису» командиси еришсә, яркәнтлик Ниязовларниң аиләвий «Аман» волейбол командиси ІІІ орунға мунасип оюн көрситип, кубок вә ахчилиқ мукапатларни йеңивалди. 

Жетису вилайити,
Панфилов наһийәси