• Турнир
• 13 Қыркүйек, 2018

Журналистлар әқлий оюнда бәс-бәскә чүшти

Өткән җүмә күни Қазақстан Язғучилар иттипақиниң бенасида «Қазақ газеттері» җавапкәрлиги чәкләнгән йолдашлиғиниң тәркивидики «Ақиқат» миллий җәмийәтлик-сәясий журналиниң журналистлар арисидики әнъәнивий шахмат турнири болуп өтти. Мәзкүр турнир бу қетим көрнәклик язғучи Тәкен Әлимқуловниң хатирисигә беғишланди. Мәшүр САСИҚОВ, «Уйғур авази» Мәтбуат хадимлири арисида әқлий оюнларни тәрғибат қилиш мәхситидә уюштурулған бу мусабиқигә Астана, Алмута вә Талдиқорған шәһәрлиридә паалийәт елип бериватқан 22 журналист қатнашти. Униңға шахмат бойичә спорт маһири, шәхсий шахмат мәктивиниң рәһбири Дәулет Иманберлинов қазилиқ қилип, оюн швейцариялик система бойичә өтти. Йәни, қатнашқучи йеңилгән һаләттиму оюндин чиқирилмайду, алдинқи оюнда бир хил пай топлиғанлар бир-бири билән күч синишиду. Шундақ қилип, әң көп пай топлиған оюнчи ғалип чиққан болиду. Оюнчиларниң һүнири компьютерлиқ программа билән баһалиниду. Шахмат турнирини «Қазақ газеттері» ҖЧЙ Баш мудириниң орунбасари Ләззәт Ноғайбаева тәбрик сөз билән ачти. Андин Қазақстан дөләт мукапитиниң лауреати, ақын Есенғали Раушанов вә Тәкен Әлимқуловниң рәпиқиси Есимкүл Болысбайқызы язғучиниң һаяти, иҗадийити тоғрилиқ хатирилири билән бөлүшти. Мәлумки, қазақ әқлий прозисиниң маһири, тәнқитчи, тәрҗиман һәм журналист Тәкен Әлимқулов – қазақ әдәбиятида тонулған қәләм саһиби сүпитидә Пушкинниң, Наваийниң вә Лермонтовниң әсәрлирини тәрҗимә қилип, көплигән тәтқиқат ишлири арқилиқ оқурмәнләрниң қәлбигә йол тапқан иҗаткар. Болупму әсәрлиридә инсан балисиниң ички дуниясини кәң ечип көрситишкә тиришқан Тәкен Әлимқуловниң әмгәклири қазақ әдәбиятиниң алтун фондидин орун алди. Қизиқарлиқ вә көпчиликтә алаһидә тәсират қалдуридиған дәриҗидә өткән шахмат мусабиқисиниң йәкүни бойичә мукапатлиқ І орунға «Қазақ газеттері» ҖЧЙ тәркивидики «Үркер» журналиниң бөлүм башлиғи Нурлан Қумар сазавәр болди. Әнди ІІ орунни «Тоғанай-Т» нәшриятиниң муһәррири Зейнел Жекейулы, ІІІ орунни «Тенгри» журналиниң хадими Тилек Абдрахимов йеңивалди. Барлиқ ғалип чиққан шахматчилар Тәкен Әлимқуловниң аилиси тәсис қилған ахчилиқ соғилар билән тәғдирләнди. Тәкитләш лазимки, мәзкүр турнирға “Уйғур авази” гезити муһурририниң биринчи орунбасари Иврайим Баратовму қатнишип, өз һүнирини көрсәтти. Турнир ахирида «Қазақ газеттері» ҖЧЙниң Баш мудириниң орунбасари Ләззәт Ноғайбаева Тәкен Әлимқуловниң рәпиқиси Есимкүл Болысбайқызыға бүгүнки чарә-тәдбиргә келип, униң техиму яхши өтүшигә һәссә қошқанлиғи үчүн миннәтдарлиғини билдүрди. Шундақла мудирниң орунбасари оюнға адилқазилиқ қилған Дәулет Иманберлинов билән биллә өзлирини қоллап-қувәтлигән шәхсләргә, җүмлидин Язғучилар өйиниң мудири Бейбит Сарыбайға ҖЧЙ намидин пәхрий ярлиқларни тапшурди.