• Мубарәк болсун!
• 25 Сәуір, 2019

Әмгиги мунасип баһаланди

Иврайим БАРАТОВ, “Уйғур авази” Көрнәклик коллекционер, ІІ дәриҗилик “Барыс” ордениниң кавалери Азат Һекимбәкниң исми көпчилигимизгә яхши мәлум. Униң дуниявий сәнъәт алимидә өзигә хас орни бар екәнлиги аллиқачан испатлинип болған. Нәқ шуңлашқа болса керәк, мошу йеқинда Хәлиқара әхбаратландуруш академияси Қазақстан шөбисиниң президенти, техника пәнлириниң доктори Абдыкапар Ашимовниң Азат Мирзатоғлиға әвәткән тәбрик хетидә мундақ җүмлиләр бар: “Қазақстан Җумһурийити Мәдәнийәт вә спорт министрлиги, Қазақстан хәлқи Ассамблеяси, М.Әвезов намидики Әдәбият вә сәнъәт институтиниң тәвсийәси билән Сизгә, һөрмәтлик Азат Мирзатоғли, Хәлиқара әхбаратлаштуруш академияси президиуминиң қарари бойичә “Хәлиқара әхбаратлаштуруш академиясиниң академиги” пәхрий нами берилди вә Сиз мәзкүр Академияниң һәқиқий әзаси болуп сайландиңиз. Мундақ һөрмәткә Сиз Елбасы Нурсултан Назарбаевниң тәшәббуси билән ишләнгән “Мәңгілік Ел” концепциясидә алға сүрүлгән улуғвар башланмиларни, җүмлидин елимиз хәлиқлириниң бирлиги, җәмийәттики разимәнлик билән сәясий турақлиққа, Қазақстанниң мустәқил дөләт сүпитидә шәкиллинишигә қошқан салмақлиқ үлүшиңиз үчүн; шундақла актив җәмийәтлик паалийитиңиз, җүмлидин хәлиқара ядро синақлириға қарши һәрикәтләргә паал қатнашқанлиғиңиз, миллий хәлиқ әмәлий сәнъитини тәрғип қилишқа вә уни сақлашқа, мәдәнийәт билән тилни тәрәққий әткүзүшкә қошқан бебаһа әмгигиңиз вә көпжиллиқ иҗадий издиниш түпәйли барлиққа кәлгән әдәбий әсәрлириңиз үчүн сазавәр болдиңиз...”. Гезитханларға чүшинишлик болуш үчүн шуни қошумчә қилимизки, баш идариси Москва (Россия) шәһиригә җайлашқан Хәлиқара әхбаратлаштуруш академиясиниң Қазақстан филиали 1994-жили Алмутида қурулди. Униң тәркивидә пәқәт елимизниңла әмәс, шундақла йеқин вә жирақ чәт әлләрниң көрнәклик алимлири, дөләт вә җәмийәт әрбаплири болуп, җәми 1400дин ошуқ әза бар. Академия һәрхил саһаларниң илмий мәркәзлири, җәмийәтлик бирләшмиләр, министрликләр вә тәшкилатлар билән һәмкарлиқта илмий тәтқиқатларни елип бариду. Өткән жиллар мабайнида Академия һәрхил хәлиқара иҗтимаий программилар лайиһилирини әмәлгә ашурушқа қатнашти. Мәсилән, 2000-жиллири БМТниң буйрутмиси бойичә Mіcrosoft корпорациясиниң “Компьютер билимини мукәммәлләштүрүш мәркизи” лайиһисиниң Қазақстанниң алтә вилайитидә әмәлгә ашуруш программисини утуқлуқ әмәлгә ашуруп, 12 миң адәмниң компьютерлиқ программиларни өзләштүрүш маһаритини ашурди. Шундақла бирмунчә министрликләрниң буйрутмиси билән күн тәртивидики муһим иҗтимаий характерға егә лайиһиләрни ишләп чиқти. Миллий мәдәнийитимизниң җанкөйәри, гезитимизниң йеқин дости Азат Мирзатоғлини “Хәлиқара әхбаратлаштуруш академиясиниң академиги” пәхрий намиға егә болуши вә Академияниң һәқиқий әзаси болуп сайлиниши мунасивити билән сәмимий тәбрикләп, иҗадий утуқ вә мустәһкәм саламәтлик тиләймиз.