• Турнир
• 26 Маусым, 2019

Ветеранниң 100 жиллиғиға беғишланди

Иврайим БАРАТОВ, “Уйғур авази” Челәк тәвәсидики даңлиқ Саттаров намидики совхозниң ихтисадий тәрәққиятиға мунасип төһпә қошқан, мошу совхозниң атақлиқ рәһбири Авут Саттаров билән дост-хизмәтдаш болған Улуқ Вәтән урушиниң ветерани Қурван Сәлимов һаят болса, 100 яшқа кирәттекән. Униң һаяттин өткинигә 20 жилдин ашсиму, жутдашлири мәрһумниң әҗрини унтумиди, исмини дайим яд әйләп келиватиду. Әнди пәрзәнтлири болса, жутдашлириниң әйнә шундақ илтипатиға миннәтдарлиғини изһар қилған һалда, улар көтәргән тәшәббус-башланмиларға һәмдәм болуп, һамийлиқ қилип кәлмәктә. У тәшәббус-башланмилар, әлвәттә, мәрһумни яд әйләп, униң намида һәрхил мәдәний чарә-тәдбирләрни өткүзүштин, шу арқилиқ атилар җасаритини яш әвлат қәлбигә сиңдүрүштин, уларда вәтәнпәрвәрлик һис-туйғуни техиму ойғитиштин ибарәт. Нәқ шуңлашқиму ахирқи бирнәччә жил ичидә Достлуқ йезисиниң сабиқ жигитбеши Һ.Садировниң тәшәббуси билән өткүзүлгән нәзир, жут активисти А.Сонуров уюштурған оттуз оғул мәшриви билән сәнъәткар С.Мамашев тәшәббус қилған яшлар мәшриви, спортниң оюн түрлири бойичә һәрхил турнирлар мәрһум Қурван ата Сәлимовниң ярқин хатирисигә беғишланди. Әнди бу қетим болса, йәни 21 — 24-июнь күнлири, 2002 — 2011-жиллири туғулған оғул балилар арисида өткән бокс бойичә вилайәтлик турнир Қурван Сәлимовниң 100 жиллиғиға беғишланди. Қаратуруқ йеза округиниң территориясидики Достлуқ йезисиниң Бертаева намидики оттура мәктәпниң спорт залида өткән мәзкүр турнирниң ечилиш тәнтәнисидә округ һакими Е.Самсыбеков, мәктәп мудири Ш.Муқалиева, жутниң жигитбеши Р.Әмәтов вә башқилар сөз елип, мәрһумниң Улуқ Вәтән уруши жиллиридики вә течлиқ һаяттики паалийитини яш әвлатқа үлгә-нәмунә қилип көрсәтти вә турнирға қатнишиватқан ондин ошуқ командиға вакаләтлик қиливатқан 120 боксчиға ақ йол тилиди. Шундақла бу турнирни өткүзүш тәшәббусини көтәргән бокс мәшиқләндүргүчиси Марасул Тоқамов билән униңға һамийлиқ қилған Қурван ата Сәлимовниң пәрзәнтлиригә миннәтдарлиғини изһар қилди. Натиқларниң ейтқанлиридин шу нәрсә ениқ болдики, Қурван Үсүвахуноғли Сәлимов 1940-жили һәрбий сәпкә чақиртилиду. Хизмәт қиливатқанда Улуқ Вәтән уруши башлинип кетидудә, униң һәрбий хизмити та 1946-жилниң ахириғичә давамлишиду. Шиддәтлик җәңләргә қатнишип, бирнәччә қетим еғир җараһәт алиду, дала госпитальлирида давалинип, йәнә алдинқи сәптә болиду. Җәңләрдә көрсәткән әрлиги үчүн III дәриҗилик “Шөһрәт”, “Вәтән уруши” орденлири, “Җасарити үчүн” медали билән мукапатлиниду. Арқа сәптә болса, жуқурида қәйт қилғинимиздәк, илгәрки “Қаратуруқ” совхозиниң мудири Авут Саттаров билән бир сәптә болуп, егилик тәрәққиятиға мунасип үлүшини қошиду. Дадамни әслисәм, униң өзигә сөләт берип туридиған мону үч хисләт көз алдимға келиду, — дәйду мәрһумниң тунҗа қизи, пешқәдәм устаз Санийәм һәдә. — Зор бәсти, қаттиқ мүҗәзи вә кийиниши. Униң мундақ қияпити һәрқандақ адәмни өзигә җәлип қилатти, чоң-кичикниң һәммиси тәп тартип, униң алдидин тоғра өтмәтти. Биз, 9 пәрзәнт, дадамға тиклинип қаралматтуқ. Бирақ дадам, бирқаримаққа әйнә шундақ көрүнгини билән, наһайити меһриван, кичик пейил вә хушчақчақ инсанлардин еди. У тәғдир тәқәзаси билән наһайити кәч, йеши хелә йәрләргә барғанда өйләнгәчкә, анам Айшәм билән тоққуз балисиниң һәрбирини худди тунҗа пәрзәндидәк әзизләп өтти, өзидә бар алий инсаний хисләтләрни бизниң қәлбимизгә сиңдүрүшкә интилди. Әгәр биз атимизниң шу еқидисини ақлиған болсақ, өзимизни бәхитлик һис қилимиз. Хулләс, төрт күнгә созулған турнир наһайити қизиқ вә тәсирлик өтти. Рингқа дәсләпки қетим чиқип, таяқ зәрбисидин көзигә яш алған тоққуз яшлиқ гөдәкниму, мундақ талай-талай турнирларға қатнишип, утуқ тәмигә үгинип қалған он йәттә яшлиқ өсмүрниму көрдуқ. Яш боксчилар билән уларниң мәшиқләндүргүчилири вә спорт залиға жиғилған йүзлигән тамашибин сағлам һаят тәризини өзлириниң күндилик әнъәнисигә айландурған өсмүрләр билән яшларға мошундақ көңүллүк дәмләрни һәдийә қилған Сәлимовлар әвладиға болған чәксиз миннәтдарлиғини рингтики кәскин күрәшкә толуп-ташқан “җәңләрни” тамашә қилиш арқилиқ йәткүзгәнлигини алаһидә тәкитлигүмиз келиду. Мусабиқә йәкүни бойичә, “Достлуқ” командиси (мәшиқләндүргүчиси Марасул Тоқамов) турнир ғалиби аталди. Мукапатлиқ иккинчи орунға — “Қаратуруқ” (мәшиқләндүргүчиси Нурәхмәт Разиев), үчинчи орунға “Ават” (мәшиқләндүргүчиси Ренат Җалалов) командиси сазавәр болди. Бу командиларға мәхсус кубок тапшурулса, өз салмақ дәриҗилиридә ғалип чиққанлар Қурван ата Сәлимовниң әвлади тәсис қилған маддий вә мәнивий мукапатларға еришти.