• Мубарәк болсун!
• 21 Тамыз, 2019

Президент тәбриклиди

Шәмшидин АЮПОВ, “Уйғур авази” Қазақстан уйғур әдәбиятиниң еғир жүкини зиммисигә артип келиватқан әдиплиримизниң бири – көрнәклик язғучи-драматург, Қазақстанниң хизмәт көрсәткән әрбаби Әхмәтҗан Һашири. У «Идиқут», «Ялғуз ялпуз» романлириниң, «Нур ана», «Йәргә төкүлгән яш», «Яшиғиним яшиған», «Кәчмәс көңлүм», «Солмас гүл» повестьлириниң, «Өлмәс болуп туғулғанлар», «Муқамчилар», «Дехан», «Идиқут», «Ялғуз ялпуз», «Чарбағ», «Астана» драмилириниң вә бирқанчә һекайиләр топламлириниң муәллипи. Пешқәдәм язғучиниң әсәрлири рус, қазақ, қирғиз, яқут вә түрк тиллириға тәрҗимә қилинип, оқурмәнләрниң иллиқ ихласиға бөләнгән. Йеқинда әйнә шундақ төһпикар язғучиниң намиға Қазақстан Җумһурийитиниң Президенти Қасым-Жомарт Тоқаевниң Тәбрик хети кәлди. Униңда мундақ дейилиду: «Һөрмәтлик Әхмәтҗан Ақсопиоғли! Сизни туғулған күниңиз билән тәбрикләймән! Хәлқимиз өзиңизни төһпикар қәләм саһиби, тәҗрибилик тәрҗиман, елимиз әдәбиятиниң риваҗлинишиға төһпә қошуватқан тонулған шәхс сүпитидә яхши билиду. Мәнивий йеңилинишқа қарап йүзләнгән җәмийитимизниң мәнивий байлиғини ашуруш йолидики бебаһа әмгигиңизниң мевисини көрүп, оқурмәнләрниң иллиқ ихласиға бөлинивериң. Сизгә мустәһкәм саламәтлик вә иҗадий утуқ тиләймән! Қасым-Жомарт Тоқаев 2019-жил, август». Әдипни ушбу хошаллиғи билән миңлиған оқурмәнләр намидин сәмимий тәбрикләп, мустәһкәм саламәтлик вә иҗадий утуқ тиләймиз.