• Турнир
• 10 Қазан, 2019

Өсмүрләр күч синашти

Йәкшәнбә күни Алмутиниң «Достлуқ» микрорайонидики спорт мәйданида мәзкүр жуттила әмәс, униң сиртидиму тонулған сәккиз қирлиқ, бир сирлиқ спортчи, мәрһум Халмурат Һасамдиновниң хатирисигә беғишланған футбол бойичә өсмүрләр арисида шәһәрлик турнир болуп өтти. Униңға жәнубий пайтәхттики жутлардин 12 команда қатнашти. Юлтузай СЕМӘТОВА, «Уйғур авази» Турнирниң ечилиш тәнтәнисидә сөзгә чиққан җумһурийәтлик «Уйғур авази» гезитиниң баш муһәррири Ершат Әсмәтов билән «Достлуқ» микрорайониниң баш жигитбеши Азат Ибрагимов мәзкүр чарә-тәдбирниң һаяти кейинки әвлатқа үлгә боларлиқ шәхсләрниң исимлирини әбәдийләштүрүштә, пәрзәнтлиримизниң бойида сағлам һаят тәризини шәкилләндүрүштә, шуниң билән биллә уларниң қәлбигә вәтәнпәрвәрлик һәм милләтпәрвәрлик һис-туйғулирини сиңдүрүштә зор әһмийәткә егә екәнлигини алаһидә тәкитлиди. Натиқлар шундақла турнирни уюштурған «Достлуқ» микрорайони Ақсақаллар кеңишиниң рәиси Әли Әхмәтовқа, Яшлар кеңишиниң рәиси Ялқун Тайировқа, жут активистлири Дилшат Илахуновқа, Тәлъәт Исламовқа, Баратҗан Нурдиновқа, һамийлиқ қилған Абдушүкүр Имрәмзиев рәһбәрлигидики Халмуратниң мәшрәп әһлигә сәмимий миннәтдарлиғини билдүрди. Бу күни турнирға қатнашқан командилар 9 – 11 вә 12 – 14 яшлиқ спортчилардин тәркип тапқан икки топқа бөлүнүп, өзара күч синашти. Әтигәндин кәч киргичә давам қилған мусабиқиләр йәкүни бойичә, биринчи топта үч мукапатлиқ орунниң һәммисини «Достлуқ» микрорайониниң «Барселона», «Интер» вә «Ювентус» командилири егилиди. Һә, иккинчи топта болса, биринчи орун – «Алғабас» (Алғабас мәһәллиси), иккинчи орун «Қалқаман» («Қалқаман» микрорайони), үчинчи орун «Қарахан» («Достлуқ» микрорайони) командилириниң әнчисигә тәгди. Һәрхил командилар тәркивидә ойнап, алаһидә маһарәт көрсәткән Руфат Йолдашев билән Алимҗан Алчинбаев – «Әң яхши һуҗумчи», Абдумеҗит Һошуров билән Дилзат Шәрипов - «Әң яхши қоғдиғучи», Исмайил Нурдинов билән Марселин Турғанов «Әң яхши дәрвазичи» намлириға сазавәр болди. Ғалип чиққан командилар маддий һәм мәнивий соғилар билән тәғдирләнди.