• Баш қошуш
• 29 Қаңтар, 2020

Алим билән учрашти

Өткән һәптидә Алмута шәһиридики А.Розибақиев намидики 153-мәктәп-гимназияниң мәҗлисләр залида көрнәклик алим, география пәнлириниң доктори, профессор Шерипҗан Надировниң (сүрәттә оңда) илмий паалийитигә беғишланған учришиш болуп өтти. Униңға алимлар, җумһурийәтлик Уйғур этномәдәнийәт мәркизиниң башқарма әзалири вә мәзкүр билим дәргаһиниң устазлири билән оқуғучилири қатнашти. Мәшүр САСИҚОВ, «Уйғур авази» Учришишта дәсләп сөзгә чиққан мәктәп-гимназияниң мудири, Алмута шәһәрлик мәслиһәтниң депутати Шавкәт Өмәров өзи рәһбәрлик қиливатқан билим дәргаһиниң паалийитигә қисқичә тохтилип, бүгүнки чарә-тәдбирниң баш қәһримани Шерипҗан Надировниң Қазақстан илим-пән саһасиға қошуватқан үлүшиниң алаһидә екәнлигини тәкитлиди. Шундақла у алимниң илмий әмгәклириниң пәқәт елимиздила әмәс, бәлки жирақ-йеқин чәт әлләрдиму аммибаплиғиниң үстүнлүгини пәхирлиниш билән тилға алди. Андин сөз новитини алған ҖУЭМ йенидики Алимлар кеңишиниң рәиси, биология пәнлириниң доктори Мәсимҗан Веләмовму Шерипҗан Надировниң ихтисадий, иҗтимаий-сәясий география пәниниң муһим мәсилилирини тәтқиқ қилиш бойичә илмий ишлар билән шуғуллиниватқанлиғи тоғрилиқ әтраплиқ тохталди. Натиқ өз сөзидә алимниң яшларни илим-пәнгә җәлип қилип, шагирт тәйярлаш вә уларға йеқиндин ярдәм қилиштиму зәрбидар уйғур алимлириниң бири екәнлигини тәкитлиди. Шуниңдин кейин сөз новити Шерипҗан Надировниң өзигә берилди. У узунжиллиқ әмгәк паалийити, илим-пәндә мошу дәриҗигә йәткичә дуч кәлгән еғирчилиқлар билән тәрҗимиһалиға қисқичә тохтилип, биз, уйғурларға, Қазақстан һөкүмити тәрипидин яритиливатқан шараитлардин үнүмлүк пайдиланған һалда, яшлиримизниң чоңқур билим елишиға җиддий көңүл бөлүш керәклигини ейтип, мундақ деди: «Уйғур яшлири арисида илим-пән билән шуғуллиниватқан яки униңға қизиқидиғанлар йоқ десәм, хаталашқан болимән. Мәсилән, махтанғиним әмәс, мениң шагиртлиримниң көпинчиси өзимизниңкиләр. Мән имканийитимниң яр беришичә, уларға қол учумни сунуп, ярдәм беришкә тиришимән. Бүгүнки күндә уларниң арисида утуқ қазиниватқанларму йетәрлик. Йәнә қайтилаймәнки, бу бизгә азлиқ қилиду». Учришиш давамида сөзгә чиққан ҖУЭМ йенидики Алмута шәһәрлик Уйғур этномәдәнийәт мәркизиниң рәиси Әбәйдуллам Җаппаров, «Уйғур авази» гезитиниң баш муһәррири Ершат Әсмәтов вә ҖУЭМниң иҗраий мудири Зихруллам Қурванбақиев алимниң илим-пән саһасидики паалийитигә жуқури баһа берип, һәқиқәтәнму Шерипҗан Надировниң шагирт тәйярлашқа маһир алимлиримиздин екәнлигини тәкитлиди. Җүмлидин ушбу чарә өткүзүлүватқан билим дәргаһиниң оқуғучилири биләнму илмий ишларни елип бериватқанлиғи буниңға ярқин мисал болалайдиғанлиғини тилға алған натиқлар униңға Қазақстан Җумһурийити Парламенти Мәҗлисиниң депутати, ҚХА Кеңишиниң әзаси вә ҖУЭМ рәиси Шаһимәрдан Нурумовниң намидин Пәхрий ярлиқ тапшурди. Андин кейин 250тин ошуқ илмий әмгәкниң муәллипи, оттуз пән намзити, бир пән докториниң устази аталған вә шу узун жиллиқ әмгигиниң бәдилигә «Қазақстан Җумһурийити илим-пән саһасиниң тәрәққиятиға қошқан төһписи үчүн» медали, «Илғар алий билим дәргаһиниң оқутқучиси» бәлгүси, «әль-Фараби намидики ҚазМУ университетиға – 75 жил» охшаш башқиму мукапатлар билән тәғдирләнгән Шерипҗан Надиров һәққидә видеофильм меһманларниң диққитигә һавалә қилинди.