• Җасарәт — мәңгүлүк
• 15 Шілде, 2020

Әрлиги – әвлатқа мирас

Гөһәрбүви ИСМАЙИЛҖАНОВА, «Уйғур авази» Қазақстанлиқ бәйнәлмиләл-җәңчиләрниң Авғанстан йеридин чиқирилғиниға 30 жилдин ашти. Авған урушиға Яркәнт тәвәсидин 98 җәңчи қатнишип, уларниң 8 җәң мәйданида вапат болди. һазир уларниң 73 аримизда. Турсун Шәмиев – шуларниң бири. У Яркәнт шәһиридики оттура мәктәпни 1976-жили тамамлап, «Казсельхозтехникида» ишләвататти. Шу жили у қурдашлири билән Вәтән алдидики һәрбий борчини өтәшкә атлиниду. Турсун Қасимоғли Германияниң Виттенберг шәһиридә, андин Белоруссияниң Гродно шәһиридә хизмәт қилип, бир жилдин кейин прапорщик унвани билән Авғанстанға атлиниду. ­– Биз дәсләп Кабулдики һәрбий атқучлар дивизиясидә бардуқ, андин бизни Баграмдики мәхсус һәрбий қисимға әвәтти. Мән бу йәрдә һәрбий лабораторияни башқурдум. Биз көргәнни һеч ким көрмисун. Чүнки дүшмән етиздиму, тағ таштиму оқ яғдуруп туратти, – дәп әсләйду, сабиқ җәңчи. Шундақ қилип, Турсун Шәмиев бәйнәлмиләлчилик борчини шәрәп билән өтәп, 1983-жили ана жутиға аман есән қайтип кәлди. Бир аз вақит Сарөзәктики атқучлар дивизиясидә хизмәт қилип, андин Яркәнт шәһиридики һәрбий қисимларниң биригә авуштидә, шу йәрдин һөрмәтлик дәм елишқа чиқти. Дәм елишқа чиқип, наһийә рәһбәрлириниң тәкливи билән 6-шәһәрлик кәспий техникилиқ училищеда вә Яркәнт малийә-ихтисат колледжида студентларға дәсләпки һәрбий тәйярлиқ пәнидин дәрис бәрди. Турсун акини жәңчи бәйнәлмиләлчиләрниң баш қошушлирида учритимән. Кам сөзлүк сабиқ җәңчи өсүп келиватқан әвлатни вәтәнпәрвәрлик роһта тәрбийиләш үлгисини намайиш қилип кәлмәктә. – Һәр бир студентниң бойида есил хисләт бар. Уларни кәң байтақ елимизни, униң һәр бир идир-қирини, тағ тешини сөйүшкә үгитиш керәк. Оғул балиларниң бойида һәрбий, җисманий тәйярлиқни көргүм келиду. Күчүмниң барида Һәр қайсисиниң спорт билән шуғуллинип, сағлам болушиға үгитишкә һәр қачан тәйярмән , – дәйду сөһбәтдишим. Турсун ака оттуз жилдин бери Гүлбақ исимлиқ жутдиши билән аилә қуруп 4 пәрзәнт тепип қатарға қошуватиду. Улардин үч нәврә сөйгән Турсун Шәмиев нәврилирини сағлам һаят тәризигә, вәтәнпәвәрликкә дәвәт қилип кәлмәктә. Аманияз, Есали, Диас исимлиқ нәврилири – униң шатлиғи һәм бәхти. Шулар билән әмәк болуп, бешидин өткән еғир күнләрни унтушқа тиришиду. Панфилов наһийәси.