• Турнир
• 18 Тамыз, 2022

Нураний ана хатирисигә беғишланди

Шүкри, карантиндин кейин һазир арилап-арилап һәртүрлүк чарә-тәдбирләр, мәрасимлар өткүзүлүп келиватқинини аңлап, көрүп жүримиз. Йеқинда әйнә шундақ чарә-тәдбир Аси йеза округиниң яшлири арисида Кебировлар әвладиниң уюштуруши вә йәрлик һакимийәтниң қоллап-қувәтлишидә пүткүл өмрини йеза егилигиниң тәрәққиятиға сәрип қилған нураний ана, һели мәрһум Сепийәм Мәтвақиқизиниң роһиға атап, футбол турнири өткүзүлүп, нәзир берилди. Униңға хошна вә чәт жутлардин 11 команда иштрак қилип, күчини синашти. Дәсләп топлуқ оюнлар Қизил Шәриқ вә Ғәйрәт йезилирида өтүп, турнирниң плей-офф қисми Қизил Шәриқ йезисида давамлашти. 
Кәскин вә қизғин оюнлар асасән, йерим финалда байқалди. Атап ейтсақ, Қизил Шәриқ командиси Ғәйрәт командисидин, Байсейит командиси Баһар командисидин үстүн екәнлигини намайиш қилди. Нәтиҗидә Баһар – төртинчи, Ғәйрәт – үчинчи орунға муйәссәр болса, финалда Қизил Шәриқ өзлириниң мошу мәвсүмдә күчлүк команда екәнлигини дәлилләп, биринчиликни қолдин бәрмиди. Байсейит иккинчи орунға егә болди. 
Турнир пәллисигә йетип, мукапатлаш мәрасимида сөзгә чиққан Аси йеза округиниң һакими Улан Сағынбеков узақ вақиттин кейин уюштурулған турнирниң әһмийитигә алаһидә тохтилип, «йүздин жүгрүк, миңдин тулпар» егилирини сәмимий тәбриклиди. Андин турнирда ғалип чиққан командилар билән яхши оюн көрсәткән айрим оюнчилар Пәхрий ярлиқ вә хатирә соғилар билән тәғдирләнди.

Абдулҗан АЗНИБАҚИЕВ.

Әмгәкчиқазақ наһийәси.

СҮРӘТТӘ: турнир ғалиби — «Қизил Шәриқ» командиси.