• Турнир
• 01 Қыркүйек, 2022

Спорт ветерани һөрмитигә беғишланди

Футбол – спортниң әң аммибап түри екәнлиги һәммигә мәлум. Һазир футбол клуби яки стадиони йоқ шәһәр һәм йезилар камдин-кам учришиду. Униңға қизиқидиғанларниң саниму күндин-күнгә көпийиватиду. 

Рашидәм РӘҺМАНОВА,
«Уйғур авази»

Абдувели Җәмиев – Байсейит йезисидики футбол ишқивазлириниң бири. Бийил 72 яшқа кәлгән у И.Тайиров намидики оттура мәктәпни тамамлиғандин кейин Ташкәнт Авиация заводида, андин Әнҗан су қоймисида ишчи болуп ишләйду. 1976-жили ана жутиға қайтип келип, тамака совхозида әмгәк қилиду. 13 жилдин кейин зоотехник мутәхәссислигини егиләп, узақ вақит өз кәспи бойичә хизмәт қилиду. 2009 —2013-жиллар арилиғида Байсейит йезилиқ амбулаториясидә ишчи болуп ишләп, андин һөрмәтлик дәм елишқа чиқти.
Абдувели ака Байсейитқа қайтип кәлгән 1976-жилдин башлап йеза футболиниң тәрәққиятиға салмақлиқ төһпә қошти. У 32 жил мабайнида йеза футбол клубиниң дәрвазичиси болуп, талай мусабиқиләрдә өз командисиниң шәнини қоғдиди. Оюнға бар вуҗуди билән берилгән у 31 йешида, йәни 1981-жили – Челәк наһийәсиниң әң яхши дәрвазичиси, 56 йешида болса, Әмгәкчиқазақ наһийәсиниң әң яхши дәрвазичиси аталди. Шундақла Абдувели ака бирнәччә жил давамида йезидики волейболчилар командиси тәркивидә наһийәлик вә вилайәтлик турнирларға қатнишип, йезида спортниң бу түриниң тәрәққий етишигиму һәссә қошти. Мошу йәрдә шуниму алаһидә тәкитләп өтүш лазимки, өмүр бойи поңзәк тепип кәлгән Абдувели ака 60 йешида өзини Медицина хадимлири күнигә мунасивәтлик өткән спорт мусабиқисидә синап, әрләр арисидики 100 метрға вақитқа жүгрәштә 1-орунни егилиди. 
Сағлам һаят тәризини өзигә һәмра қилған Абдувели ака рәпиқиси Шарванәм һәдә билән инсаплиқ икки оғул вә икки қиз тәрбийиләп, 14 нәврә сөйди. 
Башта өзи футбол ойнап, йеши чоңайғанда йеза яшлирини спортниң ушбу түригә җәлип қилип келиватқан Абдувели Җәмиев 70 яшқа толғанда йезиниң бир түркүм яшлири һаятий устазиниң тәвәллудини нишанлап, униңға һөрмәт-еһтирам көрситишни мәхсәт қилған еди. Амма пандемия ақивитидин улар бу реҗилирини әмәлгә ашуралмиған. «Һечтин кәч яхши» дегән нийәттики йезиниң Лутпуллам вә Маһмутҗан Мәмәтовлар, Шәмшидин Мәхсүтов қатарлиқ яшлири тәшәббус көтирип, Қазақстан Җумһурийити Констутицияси күни һарписида ветеран-футболчиниң һөрмитигә чоңлар арисида наһийәлик турнир уюштурди. 
Абдувели Җәмиевниң тәвәллудиға беғишланған турнирға Байсейит, Тәшкәнсу, Тәшкәнсаз, Ғәйрәт – Қизил Шәриқ, Масақ вә Қаратуруқ йезилириниң тәркивидә йеши 40тин алқиған футболчилири бар командилири қатнашти. Уни И.Тайиров намидики оттура мәктәпниң башланғуч һәрбий тәйярлиқ пәниниң муәллими Тайирҗан Аблапов ечип, Абдувели Җәмиевниң тәрҗимиһалиға қисқичә тохталди. Кейин Бартоғай йеза округиниң баш мутәхәссиси Һаширахун Розахунов тәвәллуд егисини тәвәллуди вә жиғилған көпчиликни Конституция күни билән тәбриклиди. Андин йезиниң баш жигитбеши Ғлаждин Һосманов вә А.Җәмиев билән бирқатарда футбол ойнап кәлгән Нурәхмәт Һосманов Абдувели акиниң йезидики сәнъәт саһасиниң риваҗлинишидики төһписигә, бойидики нахша ейтиш вә уссул ойнаш қабилийити түпәйли униң совхоз рәһбәрлиги тәрипидин Кеңәш Иттипақиниң Москва, Ленинград вә башқиму көплигән шәһәрлирини арилап кәлгәнлигини атап өтти. Җәмийәтлик ишларниң активистлири Абдувели Җәмиевниң үстигә чапан йепип, атиған соғилирини тапшурди. Шундақла Қаратуруқтин кәлгән спортчиларму изгү тиләклирини билдүрди. 
Натиқлар күч синишиш алдида турған футболчиларға утуқ тилигәндин кейин йеза стадионида қизғин оюн башланди. Нәтиҗидә Тәшкәнсаз йезисиниң командиси — биринчи, Қаратуруқ йезисиниң командиси —иккинчи вә Тәшкәнсу йезисиниң командиси үчинчи орунни егиләп, мәхсус кубок, диплом вә Тәшәккүрнамиләр билән тәғдирләнди. 

СҮРӘТТӘ: А. Җәмиев (оттурида) байсейитлиқ футболчилар вә җәмийәтлик ишларниң активистлири билән.

Әмгәкчиқазақ наһийәси.