• Кичик вә оттура тиҗарәт
• 08 Мамыр, 2024

Туғулған йериңгә туғуңни тик

Уйғур наһийәсиниң Ават йезисидин учум болуп, һоқуқ қоғдаш органлирида көплигән җавапкәр хизмәтләрни атқуруп һазир һөрмәтлик дәм елишта жүргән Мурат Зульяровни тонуйдиғанлар: «Мурат кәң жүрәклик, иллиқ мунасивәт қилидиған жигит» дәп қойиду. 

Бәхтишат СОПИЕВ,
«Uiğur avazi»

Мурат Зульяров көпбалилиқ, йәни устазлар аилисидә дунияға кәлди. 1991-жили КазГУниң әдлийә факультетида тәһсил көрүп, мәзкүр саһадики әмгәк паалийитини Қарасай наһийәлик прокуратурисида тәргәвчи болуштин башлайду. 1996-жили Дөләт тәргәв комитетида, андин Алмута шәһириниң Әвезов наһийәсидә вә шәһәрлик прокуратурида ишләйду. 2004 — 2010-жилғичә Алмута вилайәтлик прокуратурисида рәһбәрлик хизмәтләрни атқуриду. 2012-жилғичә вилайәтлик малийә полицияси башлиғиниң орунбасари болиду. Һөрмәтлик дәм елишқа чиққандин кейин туғулуп өскән тәвәсигә келип, тиҗарәтчилик билән шуғуллинишқа башлиди. Һазир у «Дельфин» дәм елиш орниниң мудири. 
 – «Мурат иллиқ мунасивәт қилиду» дәп көпчилик Аришаңниң иссиқ сүйини көз алдида тутуватамду? – соридим сөһбәтдишимдин.
– Мүмкин. Махтан­ғанлиғим әмәс, мән әсли иссиқ сүйүм чиқмай туруп, муһтаҗларға ярдәм қолумни сунушқа башлиған едим. Тиҗарәтчилик билән хәйрихаһлиқни биллә елип маңдим. Һелиму ядимда, қийин бир пәйтләрдә һоқуқ қоғдаш органлирида хизмәт қилдим. Елимиз мустәқилликкә йеңидин қол йәткүзди. Башта хәлиқниң турмуш-тирикчилиги махтиғидәк дәриҗидә болмиди. Буниң һәммисини шу вақиттики әвлат өз көзүмиз билән көрдуқ. Биригә ярдәм қилай десәң, өзәң айлиқ маашқа олтирисән. «Хәп» дәп қойисән. Пурсити келиведи, қолумиздин кәлгәнни айимайватимиз. Хәлиқниң турмушиму күндин-күнгә яхшилиниватиду. Бу йәрдә қишлиғи отун-көмүр қиммәтләйду. Уни сетивалидиғанға бәзиләрниң чамиси кәлмәй қалиду. Қишлиғи әйнә шундақ адәмләрниң хиҗалитидин чиқип, көмүр елип беримиз. Иссиқ сүйимизгә пенсионерлар, житим вә мүмкинчилиги чәкләнгән балиларниң хиҗалити чүшиду. Уларғиму «яқ» демәймиз. Маңа мураҗиәт қилған адәмләрни һечқачан миллитигә қарап бөлмәймән. Һәммисигә охшаш қол учумни созимән. Президентимиз Қасым-Жомарт Тоқаевниң буниңдин 24 жил бурун Давос ихтисадий форумида «миллий буржуазия» дегән гәпни қозғап: «Бу йәрдә биз тиҗарәтчиниң миллити тоғрилиқ әмәс, бәлки униң гражданлиқ аң-сезими һәққидә гәп қилишимиз керәк. Йәни елимизгә җәмийәт алдида жуқури җавапкәрликни сезидиған, Қазақстанниң тәрәққиятиға салмақлиқ һәссә қошидиған миллий буржуазия керәк» дегән еди. Бу қетимқи Миллий қурултайда Президент мошу гәпни йәнә ядимизға салди. Демәк, биз мүмкинчиликләрни толуқ пайдилинип, достлуқ маканимиз – Қазақстанда бир аилиниң балилилиридәк инақ, өм яшишимиз керәк. Пурсити кәлгәндә бир-биримизгә қол учимизни созушимиз һаҗәт.
 «Дельфинниң» коридориға илинған Тәшәккүрнамиләр у йәргә кәлгүчиләрниң диққитини өзигә җәлип қилмай қалмайду. «Амир» мүмкинчилиги чәкләнгән балилар җәмийәтлик фонди, «Судьба» мүмкинчилиги чәкләнгән балилар аиләвий клуби, «Долговлар әвладиниң балилар өйлиридин» кәлгән миннәтдарлиқ хәтләр әйнә шу Мурат Баратоғлиниң достлуқ һәққидики гепиниң мөриси еди.
 Әву бир жили Алмута шәһиридики «Ақбулақ» микрорайониниң имами Аблемит һаҗим Турсунов Ават йезисиға йеңи мечит селиш тәшәббусини көтириведи, иллиқ мунасивәткә адәтләнгән Мурат Зульяров «яқ» демиди. Киндик қени төкүлгән жутниң орни бөләктә. «Туғулған йериңгә туғуңни тик!» — бу сабиқ прокурорниң һаятий шиари.