• Җәмийәтлик тәшкилатларда
• 10 Шілде, 2015

Қанаәтлиниш һасил қилди

Йеқинда җумһурийәтлик «Инайәт» ассоциацияси «Центр Азия консалтинг» җәмийәтлик фонди билән һәмкарлиқта 5 — 9-синиплар оқуғучилири билән муәллимләргә инглиз тилини чоңқурлитип үгитиш бойичә әмәлий мәшғулатларни өткүзди. Х.Һәмраев намидики оттура мәктәпниң язлиқ лагерида өткән бу чарә-тәдбиргә америкилиқ тилшунас-мутәхәссисләр иштрак қилип, он күн җәриянида шәһәрдики тоққуз мәктәпниң йүз оқуғучиси билән инглиз тилини үгинишниң нәтиҗидарлиқ усуллирини, алған билимини әмәлиятта қоллинишниң йоллирини өзләштүрүвелишиға тегишлик ярдимини көрсәтти.Наһийә һакими Бердәулет Абдулдаев мундақ чарә-тәдбирниң зор әмәлий әһмийәткә егә екәнлигини тәкитләш билән биллә, униңға тәшәббускар болғанлиғи үчүн мәзкүр ассоциация рәиси Турғанҗан Розахуновқа җамаәтчилик намидин сәмимий миннәтдарлиқ изһар қилди. Өз новитидә Т.Розахунов бүгүнки күндә җумһурийәт Президенти тәрипидин билим бериш саһасида оқутушниң үчтиллиқ системисини җарий қилиш вәзиписиниң оттуриға қоюлуватқанлиғини, өткүзүлүватқан мәшғулатларниң әйнә шу муһим мәсилини һәл қилишқа қисмән болсиму өз тәсирини тәккүзидиғанлиғини тәкитлиди. Мәзкүр чарә-тәдбир оқуғучилар билән муәллимләрниң қизиқишини ойғитип, ата-анилар арисида қанаәтлиниш һасил қилди. Ассоциация тәрипидин, шундақла «Нур Отан» партияси наһийәлик шөбисиниң бенасида «Яшлар сағлам һаят тәризи үчүн» дегән мавзуда «дүгләк үстәл» әтрапида баш қошуш уюштурулди. Әнди наһийәлик Мәдәнийәт өйидә болса, «Яркәнт юлтузлири» фестивали өткүзүлүп, униңда яш сәнъәт һәвәскарлири өзара күч синашти. Нурәхмәт ӘХМӘТОВ. Яркәнт шәһири.