• Җәмийәтлик тәшкилатларда
• 31 Шілде, 2015

Журналистлар күч синашти

Шахмат дуниядики аммивий оюнларниң бири. Адәттә биз уни әқиллиқләрниң оюни дәп һесаплаймиз. Бу әқлий оюнға қизиқидиғанлар шаир-язғучи вә журналистлар арисидиму аз әмәс. «Қазақ газеттері» җавапкәрлиги чәкләнгән йолдашлиғи кейинки жилларда әйнә шу шахмат оюниға һәвәс бағлиған иҗаткарларниң бешини қошуп, турнир өткүзүшни әнъәнигә айландурди.  Қазақ газеттері» ҖЧЙ тәркивидики «Ақиқат» журналиниң мукапити үчүн уюштурулидиған бу турнир дәсләпки қетим Қ.Сәтбаев намидики Қазақ миллий техника университетида өткән еди. Әнди кейинки икки жилда болса, талантлиқ шахматчи Жансая Әбдималикниң Шахмат академиясида өткүзүлүп келиватиду. Мана өткән шәнбә күни  новәттики турнир өтти. Бийил турнирға қатнишиш хаһишини  билдүргән журналистлар сани алдинқи жилларға нисбәтән хелә көп болди. Бу мәзкүр турнир аммибаплиғиниң жилдин-жилға өсүватқанлиғини көрсәтсә керәк. Турнирниң ечилиш мәрасимида сөз алған «Қазақ газеттері» ҖЧЙниң баш мудири  — Муһәррирләр кеңишиниң рәиси Жумабек Кенжалин турнир қатнашқучилирини тәбриклиди вә уларға утуқлар тилиди.Тәбрик сөзгә шундақла «Ақиқат» журналиниң баш муһәррири Аманхан Әлим, Жансая Әбдималикниң аписи Алма Әбдималик чиқип, өзлириниң иллиқ ләвзлирини билдүрди. Бир күнгә созулған турнирниң финалида «Ана тілі» гезитиниң бөлүм  муһәррири Нурлан Қумар вә «Уйғур авази» гезитиниң штаттин ташқири мухбири Арслан Әлахунов учрашти. Қизғин өткән оюнниң нәтиҗисидә Арслан Әлахунов ғалип чиқти. Иккинчи орунни Нурлан Қумар, үчинчи орунни болса, «Отан тарихы» журналиниң баш муһәррири Хангелды Әбжанов егилиди. Уларға «Қазақ газеттері» ҖЧЙниң баш мудири  — Муһәррирләр кеңишиниң рәиси Жумабек Кенжалин баһалиқ соғиларни тапшурди. Әнди «Ардагер ойыншылар» номинацияси бойичә Мамадияр Жақып, Аян Нысаналин, Ғазизбек Тәшимбай, «Жеңіске деген құштарлығы үшін» номинациясы бойичә «Қазконтент» акционерлиқ җәмийитиниң портал муһәррирлири Серик Жарқынбек, Ғабит Қарабай, «Көрермен көзайымы» номинацияси бойичә «Айқын» гезитиниң җавапкәр кативи Асқар Беков, «Ең жас ойыншы» номинацияси бойичә «Қазақ газеттері» ҖЧЙниң веб-муһәррири Шерхан Әбше мукапатланди. Мәзкүр турнирни өткүзүшкә «Қазжол» илмий-тәтқиқат институти, «Тамшы» илим вә мәдәнийәт фонди, Қазақстан Журналистлар иттипақи һамийлиқ қилди.

Йолдаш МОЛОТОВ.

СҮРӘТЛӘРДӘ: «Қазақ газеттері» ҖЧЙниң баш мудири  — Муһәррирләр кеңишиниң рәиси Ж.Кенжалин А.Әлахуновқа мукапат тапшуруватиду. 2. Оюн қизиватқан пәйт.