• Җәмийәтлик тәшкилатларда
• 17 Қыркүйек, 2015

Павлодарда миллий таамлар намайиш қилинди

Йеқинда Павлодар шәһәрлик миллий таамлар фестивали даирисидә Уйғур мәдәнийәт күни өтти. Мәзкүр чарә-тәдбир Қазақстан Җумһурийити Конституциясиниң вә Қазақстан хәлқи Ассамблеясиниң 20 жиллиғиға беғишланди. Тәкитләш лазимки, бу мәйрәмлик мәрасимни Павлодар вилайәтлик Уйғур этномәдәнийәт мәркизи уюштурди. Униңға вилайәттә паалийәт жүргүзүватқан барлиқ миллий мәркәзләрниң вәкиллири, шәһәр аһалиси, аммивий әхбарат васитилириниң вәкиллири қатнашти.Меһманларни Павлодар вилайәтлик Уйғур этномәдәнийәт мәркизиниң рәиси Арсен Турдиев хуш чирай күтүвалди. Бу күни павлодарлиқлар ләңмән, манта, суюқаш вә башқиму уйғур миллий таамлириниң көргәзмисини зиярәт қилди. Шундақла маһир ашпәз Елхан Мәмәтов тәйярлиған таамлардин еғиз тәгди. Болупму уйғурниң ләңминигә қизиқишлар көп болди. Елхан Мәмәтов меһманларға ләңмәнни тәйярлашниң қир-сирлирини ейтип, тәҗрибиси билән бөлүшти. Алаһидә тәкитләш лазимки, Павлодарда өткән Уйғур мәдәнийәт күнигә мәхсус кәлгән Қазақстан эстрада юлтузлири «Дәрвишләр» топиниң нахша-сазлири мәйрәмлик кәйпиятни техиму көтиривәтти. Әнди «Әвришим» ансамблиниң әвришим уссуллири тамашибин көңлидин чиқти. Мәлумки, жил давамида Павлодарда вилайәттики барлиқ миллий мәдәнийәт мәркәзлириниң уюштуруши билән әрмән, немис, беларусь вә өзбәк миллий таамлириниң көргәзмиси өткән еди.

Йолдаш МОЛОТОВ.