• Җәмийәтлик тәшкилатларда
• 25 Қыркүйек, 2015

Паалийитини йеңилашқа беғишланди

Өткән һәптидә җәнубий пайтәхттики Достлуқ өйидә җумһурийәтлик Методикилиқ кеңәшниң, Астана вә Алмута шәһәрлириниң, вилайәтләрдики Достлуқ өйлири билән «Қоғамдық келісім» җумһурийәтлик дөләт мәһкимиси мудирлири һәм методистлириниң мәҗлиси болуп өтти. Униңда бир жил илгири Президент йенида «Қоғамдық келісім» җумһурийәтлик дөләт мәһкимисиниң қурулушиға мунасивәтлик Қазақстан хәлқи Ассамблеясиниң Методикилиқ кеңиши паалийитиниң йөнилишлирини бирқәдәр йеңилаш мәсилилири қаралди.Мәҗлисни дәсләп ҚХА Рәисиниң орунбасари Любовь Ни киришмә сөз билән ачти. Андин сөзгә чиққан «Қоғамдық келісім» жумһурийәтлик дөләт мәһкимиси мудириниң орунбасари Жанна Шаймуханбетова бүгүнки баш қошушта муһакимә қилинидиған асасий мәсилиләргә тохталди. У мәзкүр органниң 2017 — 2020-жилларда әмәлгә ашурулидиған чарә-тәдбирләрниң реҗилири түзүлгәнлигини алаһидә тәкитләп, бу әһмийәтлик ишларни өз дәриҗисидә өткүзүш үчүн Методикилиқ кеңәш паалийитини җанландурупла қоймай, униң йөнилишлирини, өткән вақит мабайнида атқурулған вәзипиләрдин нәтиҗә чиқарған һалда, қайта қарап чиқиш лазимлиғини тәкитлиди. — Шу нәрсә ениқки, һәрқандақ чарә-тәдбирни нәтиҗидарлиқ өткүзүштә методикиға асасланған тоғра — деди Ж.Шаймуханбетова. – Әгәр биз өзимизгә жүклиниватқан җәмийәтлик разимәнликни сақлаш охшаш муһим вәзипиниң һөддисидин чиқишни нийәт қилсақ, паалийитимизни йеңилишимиз керәк. Шундақла биз бүгүн иш җәриянини йеңилашқа қаритилған үч тапшурма бойичә силәрниң пикир-тәклиплириңларни аңлап көрмәкчимиз, — дәп йәкүнлиди натиқ. Мәҗлис давамида униң қатнашқучилири оттуриға қоюлған мәсилилиләргә мунасивәтлиқ пикирлирини ейтқач, өзлирини қизиқтурған соалларға қанаәтлинәрлик җавапларни алди. Ахирида меһманлар диққитигә Алмута шәһиридики 13 этномәдәнийәт мәркизи һәм бирләшмилири уюштурған көргәзмә вә һәвәскарлар концерти һавалә қилинди.

Мәшүр САСИҚОВ.