• Җәмийәтлик тәшкилатларда
• 30 Қаңтар, 2012

Он жиллиғи атап өтүлди

Җәнубий пайтәхтимиздә үнүмлүк паалийәт елип бериватқан «Уйғурларниң миллий ассоциацияси» җәмийәтлик бирләшмисиниң қурулғиниға бийил он жил болди. Униңға бүгүнки таңда миллий мәдәнийитимизниң җан көйәри, милләтпәрвәр инсан Тамара Мәмәтова рәһбәрлик қиливатиду. Дәсләп санақлиқ адәмләр тәрипидин тәшкил қилинған мәзкүр тәшкилат әзалириниң қатари һазир хелила көпәйди. Улар өз ара бирлишип, нурғунлиған нәмунилик чарә-тәдбирләрни уюштуруп келиватиду. Инсан һоқуқини қоғдаш вә хәлқимизниң мәдәнийити билән тарихини тәрғип қилиш нийитидә қурулған бу җәмийәтлик тәшкилатниң паалийити жилдин-жилға җанлиниватиду. Бирләшмә әзалириниң алдиға қойған көплигән иш-реҗилири бар. Әң әвзили, улар күч-ғәйрити билән әқил-параситини қандақ вә қәйәргә сәрип қилишни яхши билиду. Өткән һәптидә Алмута шәһиридики Достлуқ өйидә уйғур зиялилири вә җамаәтчилик вәкиллириниң қатнишиши билән әйнә шу җәмийәтлик тәшкилатниң қурулғининиң 10 жиллиғиға вә мәзкүр бирләшминиң оргини — «Әхбарат» журналиниң 50-саниниң нәшир қилинишиға беғишланған мәрасим болуп өтти. «Дүгләк үстәл» шәклидә өткән баш қошушта сөзгә чиққан бирләшмә рәиси Тамара Мәмәтова өткән вақит ичидә җәмийәтлик бирләшмә тәрипидин әмәлгә ашурулған ишларға тәпсилий тохтилип, йеқин келәчәккә бәлгүләнгән реҗиләр һәққидә ейтип өтти. Андин у «Әхбарат» журналини таритишқа вә униң сүпәтлик чиқишиға ярдәм қолини сунуп келиватқан бир топ шәхсләргә бирләшминиң Пәхрий ярлиғи билән хатирә соғиларни тапшурди. Баш қошуш җәриянида җумһурийәтлик Уйғур этномәдәнийәт мәркизиниң иҗраий мудири Рабик Исмайилов, география пәнлириниң доктори Шерипҗан Надиров, «Ишбиләрмән аяллар клубиниң» президенти Клара Шардинова, Алмута шәһәрлик адвокатлар коллегиясиниң әзаси, адвокат Гүлинур Җаланова, «Жібек» җавапкәрлиги чәкләнгән йолдашлиғиниң мудири Ваққас Мәмединов, «Адил — СС» җавапкәрлиги чәкләнгән йолдашлиғиниң мудири Сәнәм Беширова, ҖУЭМ йенидики Ханим-қизлар кеңишиниң рәиси Әхтирим Әхмәтова, Түрксиб наһийәлик Ханим-қизлар кеңишиниң рәиси Маһинур Исрайилова, «Интизар» журналиниң баш муһәррири Пәйзуллам Әхмәтов вә башқилар сөзгә чиқип, өзлириниң изгү тиләклирини изһар қилди. Натиқлар шундақла җәмийәтлик бирләшминиң паалийитигә муваппәқийәтләр тиләп, «Әхбарат» журналиниң мәзмун-маһийитини вә тарилиш даирисини кәңәйтишкә  таритишқа имканийитиниң яр беришичә ярдәм қолини сунидиғанлиғини изһар қилди. Ахирида бирләшмә әзалири тәрипидин меһманлар һөрмитигә зияпәт берилди.

Шәмшидин АЮПОВ.

Алмута шәһири. СҮРӘТТӘ: мәрасимдин көрүнүш.