• Җәмийәтлик тәшкилатларда
• 25 Шілде, 2019

Әһмийити зор баш қошуш

Йеқинда Алмута шәһиридики «Достлуқ өйидә» җумһурийәтлик Уйғур этномәдәнийәт мәркизиниң кәңәйтилгән мәҗлиси өтүп, униңға мәзкүр мәркәзниң шәһәр, наһийәләрдики шөбилири, язғучи-шаирлар, алимлар вә җәмийәтлик ишларниң активистлири қатнашти. Бәхтишат СОПИЕВ, «Уйғур авази» ҖУЭМ рәиси, Қазақстан Җумһурийити Парламенти, Мәҗлисиниң депутати Шаһимәрдан Нурумов елимиздики сәясий, иҗтимаий-ихтисадий йеңилиқлардин қисқичә әхбарат берип, күн тәртивидики мәсилиләргә тәпсилий тохталди. – Бийил, йәни 30-май күни Қазақстан Җумһурийитиниң Президенти Қасим-Жомарт Тоқаев Улуқ Абайниң 175 жиллиқ тәвәллудини нишанлаш тоғрилиқ Пәрманға қол қойди. Уни дағдуғилиқ нишанлашниң тәрәддути һазирдин башланди. Бу мәсилә бойичә һөкүмәтниң биринчи олтиришиму өтти, – дәп сөзини башлиди рәис. – Һәммимиз Абайниң қара сөзлирини оқуп чоң болдуққу. У һәммимизгә ортақ шәхс. Демәк, униңға болған һөрмитимизму бөләкчә болуши керәк. Мән ойлаймәнки, бизниң мәркәз әзалириму ушбу мәрасимни җумһурийәт даирисидә нишанлап өтүшкә бир кишидәк ат селишиду. Мән униңға чоқум ишинимән. Биз бу мәсилә әтрапида новәттики баш қошушларниң биридә мәслиһәтлишип, ениқ программиларни түзүп чиқимиз, дәп ойлаймән. Мәркәз әтрапиға топланған миллий мәдәнийитимизниң җанкөйәрлири өткәндә йәнә бир қетим өзлириниң өмлүгини, һәр қандақ мәсилигә бепәрва қаримайдиғанлиғини көрсәтти. Мошу йеқинда Арыс шәһиридә йүз бәргән паҗиәлик вақиәдин зәрдап чәккәнләргә қериндашлиримниң қилған ярдими мошу кәмгичә әлниң ағзида қалди. Алмутидин 9 жүк тошуш машиниси мәркәз намидин арыслиқларға аталған озуқ-түлүк, кийим-кечәк вә қурулуш материаллирини йәткүзүп бәрди. Униңдин башқа НурСултан, Чимкәнт шәһәрлиридин маддий ярдәмләр кәлди. Султанқорғанда яшайдиған бир пенсия йешидики анимиз чин көңлидин 200 тәңгә әвәтип пүткүл қазақстанлиқларни тәвритивәтти. Хәйрихаһлиқниң чоң-кичиги болмайду. Уни пәқәт чин көңлидин ианә қилиш керәк. Шуниңдин кейин миллий мәдәнийитимизниң тәрәққиятиға мунасип һәссисини қошуватқан хәлқимиз вәкиллири – Садиқжан Юнусовқа ҖУЭМ тәрипидин тәсис қилинған «Сахавәт» медали, педагогика пәнлириниң доктори Мунәввәр Юнусоваға ҖУЭМниң Пәхрий ярлиғи тапшурулди. Күн тәртивидики иккинчи мәсилә бойичә уйғур әдәбияти билән журналистика саһасида өчмәс из қалдурған шаир, тәрҗиман, журналист Һезим Бәхниязовниң 90 жиллиғи мунасивәтлик мәрһумниң жутдиши Шаһимәрдан Нурумов, кәсипдашлири Авут Мәсимов, Ядикар Сабитов, Гүлбәһрәм Хошаева, Илахун Җәлилов, Иврайим Баратов, Шәмшидин Аюповлар өз хатирилири билән бөлүшти. – Һезим акиға жутдаш сүпитидә әмәс, униң оқурмәни сүпитидә баһа беришни тоғра көрүватимән, – дәп сөзини башлиди Мәжлис депутати.– Өзиму, язғанлириму назук еди. Униң иҗадийитигә өз вақтида алимлар, тәнқитчиләр өзлириниң адил баһасини бәрди. У һәқиқәтәнму исми уйғур әдәбиятиға алтун һәрипләр билән йезилған инсан болидиған. Һезим Бәхниязовниң уйғур әдәбиятидики орни алаһидә еди, – дәп өз хатирисини бөлүшти, шаир Илахун Җәлилов. – Амма у кичик пейиллиғи, адимий хисләтлири түпәйли, «мән мундақ қилдим, ундақ қилдим» дейишни задила билмәйдиған. Униң улуқлуғи мана мошуниң билән өлчинәтти. – Устазим һәм кәсипдишим тоғрисида яхши пикилар ейтиливатиду,–дәп сөзини давам қилди «Уйғур авази» гезитиниң бөлүм башлиғи Шәмшидин Аюпов.– Униң тоғрилиқ сәлбий пикирләр ейтилиши мүмкин әмәс. Чүнки у шаирларға хас таза қәлби билән ижат қилди. Кәйнидә өчмәс из қалдурди. Бизгә, кейинки әвлатқа униң исмини әбәдийләштүрүшни қолға елишимиз керәк. Әң болмиғанда өзи туғулуп өскән жутидики бир кочиға униң намини беришни ойлаштурсақ, нур үстигә нур болатти. Шундақ қилғандила униң исми та әбәт сақлинип қалиду. Ахирида күн тәртивидики үчинчи мәсилә бойичә Шаһимәрдан Үсәйиноғли Арыс шәһиридә зәрдап чәккәнләргә ярдәм қилишта алаһидә паалийәтчанлиқ көрсәткән көплигән жәмийәтлик ишларниң активистлириға ҖУЭМниң Пәхрий ярлиқлирини тапшурди. Мундақ Пәхрий ярлиқни дәсләпкиләрдин болуп султанқорғанлиқ пенсионер Шәмшинур Идилова елишқа муйәссәр болди. ...Жиғиндин кейин Шәмшинур аниниң йенидин адәмләр үзүлмиди. Иҗтимаий торлар арқилиқ миллитимиз вәкиллириниң паалийитидин хәвәрдар болуп жүргән қериндаш милләт вәкили Айзада Ибрагимова аләйтән мошу жиғинға Шәмшинур аниға миннәтдарлиқ изһар қилиш үчүн кәпту. У анимизниң бу хәйрихаһлиғидин наһайити тәсирләнгәнлигини ейтип, көзигә яш алди. – Бу йәрдә гәп қанчә пул бәргинидә әмәс, гәп икки милләтниң арисидики һәқиқий достлуғида. Биримизниң бешиға күн чүшсә, йәнә биримизниң қарап турмайдиғиниға көзүм йәтти. Әсли шундақ болуши керәк,– деди Айзада апай һиссиятини биз билән бөлүшүп.