• Җәмийәтлик тәшкилатларда
• 14 Шілде, 2021

Баш жигитбеши сайланди

Мәшүр САСИҚОВ,
«Уйғур авази»

Йеқинда Алмута шәһири Султанқорған мәһәллисидики чоң мечитта Жетису вә Түрксиб наһийәлириниң жигитбашлири билән ханим-қизлар кеңәшлириниң рәислири баш қошти. У күни йерим жил давамида атқурулған ишларниң йәкүни чиқирилип, йеқин арида әмәлгә ашурурулидиған ишларниң реҗилири түзүлди.
Жиғин җәриянида Қурван һейтиға тәйярлиқ көрүш, Султанқорған мәһәллисиниң сабиқ баш жигитбеши, мәрһум Ғәйрәт Мәмәтәлиевниң роһиға атап хәтмә қуръан өткүзүш, «Әла Султан» җәмийәтлик бирләшмисиниң сабиқ рәиси Кәримҗан Қурбановниң хатирисигә футболдин турнир өткүзүш мәсилилири қаралди. 
Баш қошушта дәсләп «Әла Султан» җәмийәтлик бирләшмисиниң рәиси Тайирҗан Молдабеков әмәлгә ашурулған ишлар бойичә һесават бәрди. Башқарма әзаси Низамдун Гәраев күн тәртивидики мәсилиләр вә реҗиләнгән чарә-тәдбирләр тоғрилиқ бирқатар пикир-тәклипләрни оттуриға қойди. Мәсилән, у пәқәт Султанқорған мәһәллиси үчүнла әмәс, умумән, уйғур хәлқигә адил хизмәт қилған Ғәйрәт Мәмәтәлиевтәк шәхсни хатириләш вә униң жут бирлигини сақлаш йолида атқурған изгү ишлирини яш әвлатқа ибрәт қилип көрситиш керәклигини атап өтти һәм җамаәтчилик ишлириға жигитбашлириниң паал қатнишиши лазимлиғини тәкитлиди. 
Шуниңдин кейин сөз новитини алған бирләшмә рәиси Тайирҗан Молдабеков Султанқорған мәһәллисиниң баш жигитбеши вәзиписигә алтә адәмниң — Султан Исрапилов, Имәрҗан Әһәтов, Низамдун Гәраев, Пәйзуллам Мәмәтқулиев, Һакимҗан Исламов вә Иврайимҗан Имәровниң намзатлири көрситилгәнлигини ейтти. 
 Ахирида көпчиликниң қоллап-қувәтлиши билән Султанқорған мәһәллисиниң баш жигитбеши болуп Низамдун Гәраев сайланди . 
— Биздә һазир, һәқиқәтәнму Ғәйрәт Мәмәтәлиевниң орнини басидиған жигитбеши йоқ, – деди тонулған санаәтчи һәм меценат Дилмурат Пирмуһәммәт һаҗимоғли Кузиев. — Амма һаят давамлишидекән, жутни башқуридиған адәм керәк. Мән Низамдун Гәраевни яхши билимән. Раст, хаталашмайдиған вә камчилиқсиз бир Алла. Шуңлашқа биз һәммимиз биллә болуп, униңға йол-йоруқ көрситип, керәк йәрдә мәслиһитимизни берип турсақ, униң бу вәзипиниң һөддисидин толуқ чиқидиғиниға ишәнчим камил. 
Жиғин ахирида сөзгә чиққан Алмута шәһәрлик Уйғур этномәдәнийәт мәркизиниң рәиси Һосманҗан Обулов, Алатав наһийәсиниң баш жигитбеши Махмут Мәңсүров, жут мөтивәри Һемит Йүсүпов вә башқилар күн тәртивидики мәсилиләр бойичә өз пикир-тәклиплирини ейтқач йеңи баш жигитбешиниң ишлириға утуқ тилиди.