• Җәмийәтлик тәшкилатларда
  • 29 Қыркүйек, 2022

Жигитбашлири күни өтти

Уйғур наһийәлик Уйғур мәдәнийәт мәркизиниң уюштуруши билән Чонҗа йезисида «Жигитбашлири күни» өтти. Мәзкүр чарә-тәдбиргә наһийәдики йеза-йезиларниң жигитбашлиридин бөләк Панфилов вә Әмгәкчиқазақ наһийәсидин кәлгән жигитбашлириму қатнашти. Шундақла Алмута шәһиридин җумһурийәтлик Уйғур этномәдәнийәт мәркизиниң башқарма әзалири – ҖУЭМ йенидики Жигитбашлири кеңиши рәисиниң орунбасарлири Октябрь Қурбанниязов билән Сабит Йүсүпов, Ақсақаллар кеңишиниң рәиси Ярмәһәмәт Кебиров вә җумһурийәтлик «Уйғур авази» гезитиниң баш муһәррири Ершат Әсмәтов қәдәм тәшрип қилди. 

Сабирәм ӘНВӘРОВА, 
«Уйғур авази»

Авал Уйғур наһийәлик Уйғур этномәдәнийәт мәркизи рәисиниң орунбасари Сәйдалим Амутов сөз елип, жигитбашлириниң иш-паалийитигә тәпсилий тохталди. Натиқ той-төкүн, нәзир-чирақтин башлап наһийә даирисидики барлиқ чарә-тәдбирләрдики рәсмийәтләрниң жигитбашлириниң қатнишисиз пүтмәйдиғанлиғини тәкитләп, рәсмий айлиқ алмисиму, жутниң уютқисиға айлинип, күн-түн демәй, хәлиқниң хизмитидә жүргән жигитбашлириниң әмгиги һәрқачан мунасип баһалиниши керәк, дегән ойини йәткүзди. Жигитбашлири күниниң мана шу мәхсәттә уюштурулуватқанлиғини ейтқан Сәйдалим Амутов жирақ-йеқиндин кәлгән меһманлар билән тонуштуруп, уларни новәт билән тәбрик сөзгә тәклип қилди. Алмута шәһири, Панфилов, Әмгәкчиқазақ наһийәлиридин кәлгән меһманлар жутниң ғемидә жүргән жигитбашлириға ишлириниң дайим йемишлик, бәрикәтлик болушиға тиләкдашлиқ билдүрди. 
Мәзкүр баш қошушта нурғун мәсилиләр муһакимә қилинди. Болупму той-төкүн, нәзир-чирақ ишлириниң Уйғур, Панфилов, Әмгәкчиқазақ наһийәлиридә һәрхил уюштурулидиғанлиғини асасқа алған жигитбашлири, заман қанчә өзгәрсиму урпи-адәт, әнъәнә, миллий қәдрийәтлиримизни өзгәртишкә болмайдиғанлиғи, мәдәнийитимизниң әйниги болған мәрасимлиримизни рәткә селишниң вақти-саати йәткәнлиги һәққидә сөз қозғиди. Мәсилән, Уйғур наһийәсидә аммибап болуп кәлгән «Тағ мәлиси» мәрасимини сақлап қелиш керәклиги ейтилди.
Милләтләр достлуғи, аһалиниң бирлигини мустәһкәмләш, дөләт сәяситини тәшвиқат қилиш, җәмийәтлик ишларға паал арилишиш – жигитбашлириниң күн тәртивидин чүшкән әмәс. Шу түркүмдики ишларниң изчил давам тапидиғанлиғини тәкитлигән жут җанкөйәрлири тәвәдә Лутпулла Мутәллипниң – 100, Муңлуқ Бақиев билән Илия Бәхтияниң 90 жиллиғини дағдуғилиқ атап өтүш мәхситидә тәрәддут ишлириниң қолға елинғанлиғини алаһидә қәйт қилди.
Тәнтәнә давамида меһманлар талантлиқ сәнъәтчи, җамаәтчилик ишлириниң активисти, паалийәтчан жигитбеши Ерлан Қурбановни сеғиниш илкидә әскә алди. Шу әснада униң изини бесип келиватқан оғли Шархат Қурбанов дадисиниң иҗадиға мәнсүп нахшилардин бирнәччисини орунлап бәрди. 
 Бу күни беминнәт әмгиги мәдһийигә лайиқ жигитбашлири мукапатланди. Җүмлидин Марат Һейтбақиев, Демянь Оғулғазиев, Сәйдалим Амутов, Йолдаш Исмайилов вә Дилшат Гайитов ҖУЭМ тәрипидин тәсис қилинған «Көчүмчан» медалиға сазавәр болди. Буниңдин башқа бир топ жигитбашлири Уйғур наһийәси һакиминиң, Уйғур наһийәлик Уйғур этномәдәнийәт мәркизиниң вә ҖУЭМниң тәшәккүрнамисиға сазавәр болди.
Мәрасим ахирида сөзгә чиққан Уйғур наһийәлик Уйғур мәдәнийәт мәркизи йенидики Жигитбашлири кеңишиниң рәиси Нурмәһәммәт Арипов вә Яшлар кеңишиниң рәиси Сәйпуллам Һәмраев қиммәт вақтини бөлүп, жирақ-йеқиндин кәлгән меһманларға сәмимий миннәтдарлиғини билдүрүп, миннәтсиз меһнитигә утуқлар тилиди. 

2531 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы