• Җәмийәтлик тәшкилатларда
• 12 Қаңтар, 2023

«Анилар хориға» — он жил

Йеқинда Алмута шәһиридики «Достлуқ өйидә» җумһурийәтлик Уйғур этномәдәнийәт мәркизиниң йенида паалийәт елип бериватқан «Анилар хориниң» он жиллиғиға беғишланған мәрасим болуп өтти. Униңға ҖУЭМниң башқарма әзалири билән җәмийәтлик ишларниң активистлири қатнашти.

Мәшүр САСИҚОВ,
«Уйғур авази»

Мәлумки, хәлиқ талантлиридин тәркип тапқан ушбу «Анилар хори» буниңдин он жил илгири миллий мәдәнийитимизниң җанкөйәри вә җәмийәтлик ишларниң паал иштракчиси Зорәм Авутованиң тәшәббуси билән қурулди. Мана шуниңдин етиварән, хор җай-җайларда өзлириниң ихчам концертлирини қоюп, тамашибинларға тонулушқа башлиди. 
Әлвәттә, бу йәрдә хорни башқуруп келиватқан Зорәм Авутованиң әҗри алаһидә. У хор тәшкилләнгән дәсләпки күнләрдин башлап, униң паалийитини җанландуруш билән бәнт. Униң кам-котисидин сирт, кәспий сәнъәттин жирақ болсиму, униңға иштияқ бағлиған аниларниң бешини қошуп, шу арқилиқ уларниң һаятқа болған көзқаришини тамамән өзгәрткән шәхс әйнә шу Зорәм Авутова. Сөз болуватқан мәрасимда, әлвәттә, униң бу салмақлиқ әмгиги тоғрилиқ әтраплиқ ейтилди. Мәсилән, мәрасим модератори, ҖУЭМ рәисиниң орунбасари Шәмшиқәмәр Абдурахманова Зорәм Авутованиң пәқәт шу «Анилар хори» биләнла чәкләнмәй, Интернет торида ана тилимизни үгинимән дегүчиләргә «Ана тилим – дана тилим» лайиһиси бойичә иш елип берип, бүгүнгә қәдәр тилға алғидәк утуққа йетиватқанлиғиниму алаһидә тәкитлиди. Әнди Қазақстан хәлқи Ассамблеяси Кеңишиниң әзаси вә ҖУЭМниң Пәхрий рәиси Шаһимәрдан Нурумов өз пикрини төвәндикичә изһар қилди.

– Бүгүнки баш қошуш алаһидә әһмийәткә егә екәнлиги ениқ. Чүнки Йеңи 2023-жилда силәр билән дәсләпки қетим учришиватимиз – деди Шаһимәрдан Үсәйиноғли. – Шуңлашқа, биринчи новәттә, барчиңларни Йеңи жилиңлар билән тәбрикләшкә рухсәт қилиңлар. Йеңи жил һәммимизгә йеңилиқларни елип кәлсун. Йәнә бир тәкитләйдиған нәрсә, йеңи жилдики дәсләпки паалийитимизни дуниядики әң меһриван инсанлар, йәни Анилар билән иш башлиғинимизға толиму хошал болуватимән. Әнди асасий мәхсәткә кәлсәк, милләтниң хизмитидә һардим-талдим демәйдиған Зорәм Авутованиң рәһбәрлигидә қурулған «Анилар хори» бүгүн он жиллиғини нишанлаватиду. Хорниң паалийитидин һәммимиз убдан хәвәрдар. Униң атқуруватқан ишлириниму яхши билимиз. Уларниң абройиму күндин-күнгә өсүватиду десәм, хаталашмаймиз. Силәрниң уйғурни дунияға тонутуватқанлиғиңларға чәксиз тәшәккүр ейтимән. Әнди Зорәм Авутованиң ана тилимизни риваҗландуруш мәхситидә Ютуб канилида елип бериватқан паалийитиниму жуқури баһалашқа әрзийду. Умумән, қисқичә ейтсам, силәрни бүгүнки мәйримиңлар билән чин көңлүмдин тәбрикләймән. 
Мәрасимда новәт билән сөзгә чиққан шәхсләрдин ҖУЭМ рәиси Долқунтай Абдухелил, Алий кеңәш рәиси Ершат Әсмәтов, ҖУЭМ йенидики Ханим-қизлар кеңишиниң рәиси Сәнәм Беширова вә башқилар «Анилар хориниң» паалийитигә жуқури баһа бәргәч, уларни мәйрими билән сәмимий тәбриклиди. Андин хор әзалири ҖУЭМ тәрипидин тәсис қилинған медальлар билән мукапатланса, йеңидин қурулған «Ана меһри – Мейірімді ана» топи әзалириға мәхсус төшбәлгүләр тапшурулди. Өз новитидә, җәмийәтлик ишларға паал арилишип, милләт хизмитидә болушни билдүргән шәхсләр новәт билән сөзгә чиқип, өзлирини тонуштурған һалда, келәчәктики реҗилири билән бөлүшти.
Шу нәрсә ениқки, бу күни Зорәм Авутованиң тәшәббуси билән паалийәт елип бериватқан «Анилар хориниң» вә «Ана меһри – Мейірімді ана» топи намиға иллиқ тиләкләр көп ейтилди. Шуларниң қатарида Иминжан Тохтахунов рәһбәрлигидики Талғир наһийәлик Уйғур этномәдәнийәт мәркизиниң бир топ әзалири уларни сәмимий тәбрикләп, атиған соғилирини тапшурди. Мәрасимда йеши сәксәнгә тақиған Хәйриниса Мәсимоваға җор болған хор әзалири хәлиқ нахшилирини орунлап, көпчиликниң алқишиға еришти.