• Җәмийәтлик тәшкилатларда
• 28 Маусым, 2023

Бирликкә ташланған қәдәм

Йеқинда «Алмута шәһәрлик жигитбашлири иттипақи» җәмийәтлик бирләшмисиниң һесават-сайлам жиғини болуп өтти. Униңда дәсләп тәшкилат рәиси Абдумеҗит Иминовниң атқурған ишлири һәққидә һесавати тиңшалди. 

Азнат ТАЛИПОВ,
«Uiğur avazi»

– Өзәңларға мәлумки, бизниң җәмийәтлик бирләшмә шәһәрдики жигитбашлириниң бешини қошуп, җәмийәтлик тәшкилатлиримиз һәм һакимийәт орунлири билән һәмкарлиқта паалийәт елип беришни көзлигән едуқ. Дәсләп қийинчилиқларниң, аримизда чүшәнмәсликләрниң болғини раст. Амма вақит өтүп, өзара очуқ пикирлишиш нәтиҗисидә аримизда чүшәнчә һасил болғачқа, бүгүнки һесават жиғинимизға җәмийәтлик тәшкилатлиримизниң рәһбәрлири билән һәрхил йөнилиштә ишләватқан җәмийәтлик ишларниң активистлири қатнишип олтириду.
 Дәсләп паалийитимизни башлиған жиллар таҗсиман вирус пандемияси вақтиға тоғра кәлгәнлиги һәммимизгә мәлум. Шуниң тәсиридин мәктәп оқуғучилири дәрисләрни онлайн шәклидә оқушқа мәҗбур болди. Шуниңға мунасивәтлик йезилардики оқуғучиларға 700 миң тәңгилик планшетларни ианә қилдуқ. Нуршашқан микрорайонидики бир аилиниң өйи көйүп кәткән вақитта миллион тәңгилик ярдәм бәрдуқ. Шу пәйтләрдә җәмийәтлик бирләшминиң фонди болмиғачқа, өзимизниң шәхсий мәблиғидин пайдилинишқа тоғра кәлди. Буниңдин ташқири жигитбашлиримиз һәрхил йөнилиштики хәйрихаһлиқ ишларда паалийәтчанлиқ көрсәтти. Өткән жили миллий театримизниң бенасида бизниң җәмийәтлик бирләшминиң уюштуруши билән тунҗа қетим «Жигитбашлири күни» уюштурулуп, паалийәтчанлиқ көрсәткән жигитбашлири билән миллий мәдәнийитимиз җанкөйәрлири мәнивий вә маддий җәһәттин рәғбәтләндүрүлди. Һәммә ишларни тизип чиқип, вақтиңларни алғум кәлмәйду. Һаят бир орунда турмайду. Һаят еқимиға бағлиқ бизму тәрәққий етишимиз керәк.
 Андин жиғин тизгинини мәзкүр бирләшмә рәисиниң орунбасари Махмутҗан Мәңсүров қолиға алди.
 – Бүгүнки жиғинимизға җумһурийәтлик Уйғур этномәдәнийәт мәркизиниң рәиси Долқунтай Абдухелил, Қазақстан уйғурлири җәмийәтлик бирләшмисиниң рәиси Һакимҗан Арупов, Алмута шәһәрлик уйғур этномәдәнийәт мәркизиниң рәиси Һосманҗан Обулов, мәзкүр җәмийәтлик тәшкилатларниң һәм ана тилимизда чиқидиған аммивий әхбарат васитилириниң вәкиллири, Алмутидики наһийәләрниң баш жигитбашлири вә уларниң орунбасарлири иштрак қиливатиду. Шуңлашқиму сайлам өткүзүшкә кворум бар дәп ойлаймән. Мошу йәрдә сайламни очуқ вә демократик асаста өткүзүш үчүн қатнишиватқан җәмийәтлик тәшкилатлар вәкиллириниң өз намзатлирини тәвсийә қилишини сораймән. 
 Күн тәртивидики асасий җәриян башлиништин авал Долқунтай Абдухелил, Һосманҗан Обулов, Һакимҗан Арупов, ҖУЭМ рәисиниң мәслиһәтчиси, юрист Султанмурат Исрапилов вә башқилар сайламни өткүзүш тәртиви, шәкли һәққидә пикир-тәклиплири билән бөлүшүп, хәлқимиз үчүн бирликниң һавадәк һаҗәт екәнлигини тәкитләшти.
 Андин гәп болуватқан тәшкилатниң рәислигигә Махмутҗан Мәңсүров, Бурһандин Таҗидинов, Низамдун Гәраев вә Алимҗан Давутовниң намзатлири тәвсийә қилинди. Ахирқи намзат дәрһал сайламға чүшүштин баш тартти. 
 Сайлам нәтиҗиси бойичә көпчилик авазға егә болған Махмутҗан Мәңсүров Алмута шәһәрлик жигитбашлири иттипақиниң рәиси, һә униң орунбасарлиғиға Бурһандин Таҗидинов сайланди. 
 Шуниңдин кейин сөз алған йеңи рәис тоғра йөнилиштә меңиватқан һәрқандақ җәмийәтлик тәшкилат билән һәмкарлиқта паалийәт елип баридиғанлиғини алаһидә тәкитлиди. Өмлүк, бирликни әмәлиятта көрүшни халиған жиғин қатнашқучилири Долқунтай Абдухелил, Һосманҗан Обулов вә Һакимҗан Аруповтин бир-бири билән қол елишип, елимиз һәм хәлқимизниң риваҗлиниши үчүн бирликтә, һәмкарлиқта паалийәт елип беришини илтимас қилди. Бу барлиқ хәлиқниң хаһиши екәнлигини чүшәнгән миллитимизгә аит үч җәмийәтлик тәшкилатниң рәһбәрлири қол елишип, иттипақлиқни тәшвиқ қилипла қоймай, өзлириму бу йолда маңидиғанлиғиға вәдә берип, сүрәткә чүшти. 
 Айрим чүшәнмәсликләрни арқида қалдуруп, иттипақлиқни мустәһкәмләш үчүн ташланған бу қәдәм җәмийәтлик тәшкилатлар рәһбәрлиригә чоң мәҗбурийәт жүклиди. Әнди ейтилған сөзләрни әмәлиятта дәлилләш һаҗәт. Демәк, нәтиҗини вақит көрситиду, дегән сөз.

Махмутҗан Мусаҗаноғли Мәңсүров 1961-жили 10-июль күни Әмгәкчиқазақ наһийәсиниң Қорам йезисида дунияға кәлгән. 1976-жили Қизил Шәриқ йезисидики М.Әвезов намидики оттура мәктәпниң 8-синипини тамамлиғандин кейин Алмута технология техникумида билим алиду. 1980 — 1982-жиллири Забайкалье һәрбий округида һәрбий борчини өтәп кәлгәндин кейин Хәлиқ егилиги институтида тәһсил көриду. Әмгәк паалийитини дәсләп Алмута Пахта-қәғәз комбинатида (АХБК), кейинирәк Челәк тәвәсиниң бир қатар егиликлиридә агроном-технолог болуп ишлиди. 1994 — 1998-жиллири Алмута шәһиригә көчүп келип, һәрхил саһаларда әмгәк қилиду. 2004-жили Қарасу мәһәллисиниң чоң жигитбеши Абдувәли Зайировниң тәкливи билән яшлар жигитбеши болуп сайлиниду. Андин жут тәливи билән Қарасу мәһәллисиниң жигитбеши болуп сайлинип, 2020-жилғичә җәмийәтлик ишларға паал арилишиду. 2020-жилдин башлап Алатав наһийәсиниң чоң жигитбеши, андин Алмута шәһәрлик жигитбашлири иттипақи җәмийәтлик бирләшмисиниң орунбасари болуп хизмәт қилди.