• Җәмийәтлик тәшкилатларда
• 27 Шілде, 2023

Маарип мәсилиси нәзәрдин сирт қалмиди

Дүшәнбә күни Алмута шәһиридики А.Розибақиев намидики 153-мәктәп-гимназиядә Әвезов наһийәлик Уйғур этномәдәнийәт мәркизиниң биржиллиқ һесават жиғини өтти. Униңға «Қазақстан уйғурлири җумһурийәтлик бирләшмиси» җәмийәтлик бирләшмисиниң вә Алмута шәһәрлик Уйғур мәдәнийәт мәркизиниң вәкиллири, зиялилар, җай-җайлардин кәлгән җамаәтчилик ишлириниң активистлири вә башқа меһманлар қатнашти.

Шәмшидин АЮПОВ,
«Uigur avazi»

Жиғинға риясәтчилик қилған «Қазақстан уйғурлири җумһурийәтлик бирләшмиси» җәмийәтлик бирләшмиси рәисиниң орунбасари Шавкәт Нәзәров қатнашқучиларни баш қошушниң күн тәртиви билән тонуштурди. Дәсләпки сөз Әвезов наһийәлик Уйғур этномәдәнийәт мәркизиниң рәиси Әли Әхмәтовқа берилди. У өзи рәһбәрлик қиливатқан җәмийәтлик тәшкилатниң бир жил давамида атқурған ишлириға тәпсилий тохтилип өтти. 
Шуниңдин кейин минбәргә көтирилгән А.Розибақиев намидики 153-мәктәп-гимназия мудириниң тәрбийә ишлири бойичә орунбасари Гөзәл Рәҗәпова гимназия оқуғучилириниң қол йәткүзүватқан утуқлириға қисқичә тохтилип өткәч, бүгүнки күнгә қәдәр 1-синипқа 133 балиниң һөҗҗәт тапшурғанлиғини вә җамаәтчилик ишлири активистлириниң тәрғибат-тәшвиқат ишлирини йәниму җанландуруш зөрүрлүгини атап өтти. Андин у 153-мәктәп-гимназиядә ана тилида билим елиш хаһишини билдүргүчиләрни мәхсус автобусларда тошуш, йәни мәктәпкә әкелип-апириш мәсилисиниң рәсмий һәл қилинғанлиғини ейтти. 
Алмута шәһәрлик Уйғур этномәдәнийәт мәркизиниң рәиси Һосманҗан Обулов өз нутқида өзи башқуруватқан мәркәзниң һәрқандақ җәмийәтлик бирләшмә билән һәмкарлиқта ишләшкә мәнпийәтдар екәнлигини алаһидә тәкитлиди. 
 – Йеқинда Алмута шәһәрлик жигитбашлири иттипақиниң рәисини сайлаш пәйтидә үч тәшкилат – ҖУЭМ, «Қазақстан уйғурлири җумһурийәтлик бирләшмиси» җәмийәтлик бирләшмиси, Алмута шәһәрлик Уйғур этномәдәнийәт мәркизи бирлишип ишләшкә тәйяр екәнлигимизни елан қилдуқ, – деди Һосманҗан Турсуноғли. – Бизниң бу нийитимизни қоллап-қувәтлигүчиләр нурғун болмақта. Биз мошу мәхситимиздин қайтмаслиғимиз керәк дәп ойлаймән. 
У өз нутқида шундақла барлиқ уйғур җәмийәтлик тәшкилатларниң, жигитбашлири билән ханим-қизларниң, яшларниң оқутуш уйғур тилида жүргүзүлидиған мәктәпләрниң биринчи синипиға бала топлаш мәсилисигә җиддий көңүл бөлүш керәклигини ейтқач, бүгүн биржиллиқ паалийитиниң һесавитини бериватқан Әвезов наһийәлик Уйғур этномәдәнийәт мәркизиниң әмәлгә ашурған ишлирини иҗабий баһалап, келәчигигә утуқлар тилиди. 
Шуниңдин кейин сөз новити Алмута шәһәрлик Уйғур этномәдәнийәт мәркизи йенидики Анилар кеңишиниң рәиси Роза Абубәкриеваға берилди. Натиқ Әвезов наһийәлик Уйғур этномәдәнийәт мәркизиниң өз паалийитидә миллий маарип, уйғур тилида нәшир қилиниватқан гезит-журналлиримизға муштири топлаш вә мәдәнийәт саһалириға алаһидә көңүл бөлүп келиватқанлиғини тәкитлигәч, ана тилида оқутушниң әһмийитигә әтраплиқ тохтилип өтти. 
Шуниңдин кейин сөз алған Алмута шәһәрлик Жигитбашлири иттипақи рәисиниң орунбасари Бурхандин Таҗидинов, профессор Абдуллам Самсақов, җамаәтчилик ишлириниң активисти Ғунчәм Худайбәрдиева, «Ана тилим — дана тилим» ютуб канилиниң рәһбири Зорәм Авутова вә башқилар сөз болуватқан мәсилиләр әтрапида өз пикирлири билән ортақлишип, Әвезов наһийәлик Уйғур этномәдәнийәт мәркизиниң кәлгүси паалийитигә муваппәқийәт тилиди.
Һесават жиғининиң йәкүни бойичә Әвезов наһийәлик Уйғур этномәдәнийәт мәркизиниң биржиллиқ паалийитигә қанаәтлинәрлик дәп баһа берилди. Шундақла жиғин қатнашқучилири бир еғиздин күн тәртивидики йәнә бир муһим мәсилә — анатиллиқ мәктәпләрниң биринчи синипиға бала топлаш бойичә тәрғибат-тәшвиқат ишлирини йәниму җанландуруш керәклигини ейтти вә йеңи оқуш жили башланғичә ана тилида оқуйдиған балилар санини көпәйтиш лазим дәп тепилди.