• Асасий мақалилар
• 16 Наурыз, 2018

Тарихий достлуқтин — стратегиялик иттипақдашлиққичә

Рашидәм МИРЗӘХМӘТОВА, «Уйғур авази»/ Дүшәнбә күни Алмутидики «Достлуқ өйидә» Қазақстан билән Әзәрбәйҗан мәмликәтлири арисида дипломатик мунасивәтниң орнитилғанлиғиға 25 жил толушиға даир «Тарихий достлуқтин — стратегиялик иттипақдашлиққичә» мавзусида «дүгләк үстәл» болуп өтти.Униңға Әзәрбәйҗан Җумһурийитиниң Қазақстандики Пәвқуладдә вә Толуқ һоқуқлуқ әлчиси Рашад Мамедов, Қазақстан хәлқи Ассамблеясиниң әзалири, миллий мәдәнийәт мәркәзлириниң рәһбәрлири, иҗадий зиялилар вә җәмийәтлик ишларниң активистлири қатнашти. Риясәтчи — ҚХА Рәисиниң орунбасари Абилфас Хамедов көпчиликни баш қошушниң мәзмун-маһийити билән тонуштурғандин кейин елимиздә болуватқан муһим йеңилиқлардин хәвәрдар қилди. Хусусән, Дөләт рәһбири Н.Ә. Назарбаевниң қазақстанлиқларға йоллиған «Президентниң Бәш иҗтимаий тәшәббуси» мураҗиитиниң әһмийитигә алаһидә тохталди. Кейин сөз новитини алған Рашад Мамедов Қазақстан – Әзәрбәйҗан тарихий достлуғиниң һәқиқий мәнасида стратегиялик иттипақдашлиққа айланғанлиғини зор мәмнунийәт билән қәйт қилди. Андин әлчи икки дөләт арисидики достлуқни мустәһкәмләшкә зор төһписини қошқан қериндашлири — «Мемлекеттік тілге құрмет» җәмийәтлик бирләшмисиниң рәиси, Қазақстанниң хизмәт көрсәткән әрбаби, профессор Асылы Осман билән көрнәклик һәйкәлтараш, Қазақстанниң хизмәт көрсәткән сәнъәт әрбаби Вагиф Рахмановни Әзәрбәйҗанниң дөләт мукапити — «Tәrәggі» (Тәрәққият) медали билән мукапатлиди. «Дүгләк үстәлдә» нутуқ сөзлигән «Барбанг» курдлар ассоциациясиниң рәиси Князь Мирзоев, Белорусь этномәдәнийәт мәркизиниң рәиси Леонид Питоленко, Қазақстан туңганлири җәмийитиниң рәиси Абубакир Войнце, җумһурийәтлик җәмийәтлик-сәясий «Уйғур авази» гезитиниң баш муһәррири Ершат Әсмәтов вә башқилар саһипханларни бу әһмийәтлик сәнә билән сәмимий тәбрикләп, икки мәмликәт арисидики достлуқ вә стратегиялик алақилириниң буниңдин кейин техиму мустәһкәмлинишигә тиләкдашлиқ билдүрди.