• Асасий мақалилар
• 16 Наурыз, 2018

Ишәнчигә асасланған шериклик

Дөләт рәһбири Нурсултан Назарбаев Қазақстанға рәсмий сәпәр билән кәлгән Таҗикстан Президенти Эмомали Рахмон билән музакириләрни өткүзди. Қазақстан Президенти жуқури дәриҗилик меһманни қарши елип, мәзкүр рәсмий сәпәрниң пәқәт дипломатик мунасивәтләрниң орнитилғанлиғиға чарәк әсир толған жилдила әмәс, бәлки икки мәмликәт үчүн улуқ мәйрәм – Норуз һарписида болуватқанлиғиниң алаһидә рәмзгә егә екәнлигини тәкитлиди. Нурсултан Назарбаев Эмомали Рахмонниң Қазақстан вә Таҗикстан хәлиқлири оттурисидики достлуқни күчәйтиш ишидики ролини алаһидә тәкитлиди. Мошу жилларда Сизниң рәһбәрлигиңиз түпәйли биз чоң ишәнчә, һәмкарлиқ вә достлуқ мунасивәтлирини орнаттуқ. Биздә һечқачан һәл қилинмайдиған проблемилар болмиди. Биз дайим бир-биримизни қоллап-қувәтләп кәлдуқ, җүмлидин хәлиқара миқиястиму қоллап-қувәтлидуқ, – дәп тәкитлиди Қазақстан Президенти. Тар тәркиптә өткүзүлгән музакириләрдә Нурсултан Назарбаев Эмомали Рахмонни жуқури дөләт мукапити – «Парасат» ордени билән мукапатлиди. Өз новитидә Эмомали Рахмон орденни қобул қилип, мәзкүр мукапатниң өзи үчүн күтүлмигән соға екәнлигини тәкитлиди вә қазақстанлиқ кәсипдишиға илтипати үчүн сәмимий миннәтдарлиғини билдүрди. Қазақстан вә Таҗикстан һөкүмәтлири вәкиллириниң қатнишиши билән кәңәйтилгән тәркиптә өткүзүлгән музакириләрдә барлиқ йөнилишләр бойичә өзара һәрикәтни күчәйтиш имканийити вә истиқбали тәпсилий муһакимә қилинди. Музакириләр йәкүни бойичә Қазақстан вә Таҗикстан Президентлири Нурсултан Назарбаев билән Эмомали Рахмон Бирләшкән билдүрүш имзалиди. Мәзкүр һөҗҗәт иккитәрәплимә һәмкарлиқни сүпәт җәһәттин йеңи дәриҗигә елип чиқишқа, һәмкарлиқни техиму җанландурушқа вә хәлиқара мәйдандики иш-һәрикәтләрни уйғунлаштурушқа нишан қилинған. Шундақла Президентларниң қатнишиши билән гражданларниң вәтинигә қайтип келиш механизмини тәртипкә кәлтүридиған реадмиссия тоғрилиқ; икки мәмликәт гражданлириниң бир-бириниң территориясидә болуш тәртиви тоғрилиқ вә миграция саһасидики һәмкарлиқ тоғрилиқ һөкүмәтләрара келишимләр имзаланди. *** Рәсмий сәпәр даирисидә Нурсултан Назарбаев билән Эмомали Рахмон «Назарбаев мәркизи» көпсаһалиқ комплексниң бир қисми болуп һесаплинидиған Тунҗа Президент Китапханисини зиярәт қилди. Бу йәрдә Дөләт рәһбәрлиригә экспозиция-көргәзмә мәркизиниң вә Қазақстан Президенти Мирасгаһиниң экспонатлири көрситилди. Президентлар экспонатлар билән тонушуп болғандин кейин, мәркәзниң интерактив билим технологиялириниң заманивий имканийәтлири билән тонушти.