• Асасий мақалилар
• 21 Маусым, 2018

Түркстан — вилайәт мәркизи

Нурсултан Назарбаев көпчилик алдида “Қазақстан Җумһурийити мәмурий-территориялик қурулушиниң айрим мәсилилири тоғрилиқ” Пәрманни имзалиди.Дөләт рәһбири Пәрманни көпчилик алдида имзалаш мәрасимида сөзгә чиқип, Чимкәнтниң Астана вә Алмута билән бирқатарда Қазақстанниң аһалиси бир миллион адәмдин ешип кәткән шәһәрлириниң қатариға киргәнлигини тәкитлиди. – “Қазақстан Җумһурийитиниң мәмурий-территориялик қурулуши тоғрилиқ” Қанунниң 3-маддисиниң 1-пунктиға мувапиқ мән бүгүн имзалаватқан Пәрман Чимкәнткә җумһурийәтлик әһмийәткә егә шәһәр мәртивисини бериду. Бу мәмурий бирлик мәмликитимизниң 17-региони болиду. Әсирләр мабайнида Қазақ ханлиғиниң вә пүткүл түрк дуниясиниң сәясий һәм роһий һаятиниң жүриги болған Түркстан шәһири вилайәт мәркизи болиду, – деди Қазақстан Президенти. Нурсултан Назарбаев йеңи қурулған Түркстан вилайитидә йеңи мәмурий вәзипиләрни сүпәтлик орунлаш үчүн барлиқ имканийәтләрниң моҗут болуп, қобул қилиниватқан қарарниң муһим тарихий әһмийәткә егә екәнлигини тәкитлиди. – Чимкәнт мәмликитимизниңла әмәс, бәлки пүткүл Мәркизий Азия региониниң инвестициясини, технологиялирини вә әқлий күчини тартишниң йеңи мәркизигә айлиниду. Буниң үчүн барлиқ шараит вә зөрүр иқтидар бар, – дәп тәкитлиди Дөләт рәһбири. Қазақстан Президенти Чимкәнтниң җумһурийәтлик мәртивигә егә болушиниң униң техиму утуқлуқ илгирилишигә ярдәм берип, шәһәр алдида йеңи надир истиқбални ачидиғанлиғиға ишәнчә билдүрди. – Бу қәдәм шәһәрниң турақлиқ иҗтимаий-ихтисадий тәрәққиятиға вә пүткүл регион турғунлириниң турмуш сүпитини яхшилашқа күч-қувәт бериду, – дәп билдүрди Нурсултан Назарбаев. Ахирида Дөләт рәһбири Президент Мәмурийитигә, Һөкүмәткә вә вилайәт һакимийитигә Пәрманни сүпәтлик һәм оператив әмәлгә ашуруш вә йәрлик дөләт органлири билән тәшкилатларниң тохталсиз һәм нәтиҗидарлиқ паалийитини тәминләш бойичә ениқ тапшурмиларни бәрди.