• Асасий мақалилар
• 09 Қаңтар, 2019

Дуа-тиләкләр қобул болсун

7-январь күни Нурсултан Назарбаев Астанада Әвлия Успен кафедрал соборини зиярәт қилди. Дөләт рәһбири барлиқ православие христианлирини Рождество мәйрими билән тәбриклиди. – Бүгүн пүткүл Қазақстан, барлиқ конфессияләр вә этносларниң вәкиллири мошу мәйрәмни нишанлайду. Бу тәнтәнә яхшилиқ-изгүлүк вә бәхит-саадәт рәмзи. Бу күни кона хапичилиқ-рәнҗишләр кәчүрүлиду, муһтаҗларға ярдәм көрситилип, дуалар оқулиду, – деди Президент, Нурсултан Назарбаев мустәқилликниң дәсләпки күнлиридин тартипла дөләтниң милләтләрара вә динларара разимәнликни мустәһкәмләш сәяситини жүргүзүватқанлиғини тәкитлиди. – Биз бирлигимиз түпәйли ихтисатта вә хәлиқ паравәнлигини ашурушта чоң нәтиҗиләрни қолға кәлтүрдуқ. Мустәқилликтә өтүватқан барлиқ жиллар мабайнида мән православие христианлириниң қоллап-қувәтлишини сәздим вә буниң үчүн улардин миннәтдармән, – дәп тәкитлиди Дөләт рәһбири. Униңдин ташқири Президент мәмликәтниң Йәр йүзидә течлиқ вә хатирҗәмликни сақлашқа қаритилған аләмшумул динларара диалогни тәрәққий әткүзүш ишидики ролиға тохталди. – Бу күнләрдә барлиқ православие христианлири Яратқучидин йеқинлириға саламәтлик һәм бәхит-саадәт, мәмликитимизгә хатирҗәмлик, течлиқ вә разимәнлик тилиди. Дуа-тиләкләр қобул болсун! Мән йәнә бир қетим һәммиңларни Рождество билән тәбрикләп, бәхит-саадәт, саламәтлик вә гүллиниш тиләймән! – деди Нурсултан Назарбаев. Дөләт рәһбири шундақла Қазақстанниң бирлик вә течлиқ түпәйлила йеңи утуқларни қолға кәлтүридиғанлиғини тәкитлиди. – Биз достлуқ вә өзара чүшәнчини, бир-биригә болған ишәнчини күчәйтишкә қаритилған сәясәтни давамлаштуримиз. Биз пәқәт шундақ қилғандила алға илгириләймиз вә кәлгүси әвлат үчүн яхши һаятни вуҗутқа кәлтүримиз, – деди Нурсултан Назарбаев. Қазақстандики Рус правословие чиркоси Митрополитан округиниң рәһбири, Астана вә Қазақстан митрополити Александр өз новитидә Дөләт рәһбирини мәйрәм билән тәбриклиди вә ибадәтханини зиярәт қилғанлиғи һәм мустәқиллик жиллирида мәмликәттә жүргүзүлүватқан нәтиҗидарлиқ течлиқ вә разимәнлик сәясити үчүн миннәтдарлиқ билдүрди. У Қазақстанниң әнъәнивий динларниң течлиқта қатар яшишиға вә милләтләрара разимәнликкә бағлиқ болған тәрәққият үлгисиниң җумһурийәтниң улуқ муваппәқийити болғанлиғини һәм униңда Нурсултан Назарбаевниң хизмитиниң чоң екәнлигини тәкитлиди. Ахирида Қазақстан Президенти Православие чиркоси роһий-мәдәний мәркизиниң дин йолида қурван болғанлар вә дин таратқучилар музейиниң экспозициясини көздин кәчүрди.