• Асасий мақалилар
  • 03 Сәуір, 2019

Елбасы ана жутида болди

Алмута вилайити Қарасай наһийәсиниң җамаәтчилиги һөрмәтлик меһман вә жутдиши – Қазақстан Җумһурийитиниң Тунҗа Президенти – Елбасы Нурсултан Назарбаевни гүлдүрлигән давамлиқ алқишлар билән қарши алди. Әтигәндин тартипла Чемалған йезисида мәйрәмлик кәйпият һөкүм сүрди. Елбасыни қарши елиш үчүн “Атамекен” тарихий-мәдәний мәркизиниң истираһәт беғиға миңлиған йәрлик турғунлар – ақсақаллар, җәмийәт әрбаплири, студентлар вә мәктәп оқуғучилири кәлди. Нурсултан Назарбаев иллиқ қобул қилғанлиғи үчүн жутдашлириға миннәтдарлиқ билдүрүп, һәрқачан ана жутиға кәлгәндә балилиқ чағлирини чоң муһәббәт сезимлири ичрә әсләйдиғанлиғини тәкитлиди. Тунҗа Президент ушбу тәвәдә, Чемалғанда туғулуп өсти, оқуғучилиқ дәвриму мошу йәрдә өтти. Елбасы һәрбир адәмниң жүригиниң қетида мәңгү орун алидиған җайниң бар екәнлигини әслитип өтти. Бу – ана жут. Вәтәнгә болған муһәббәт ана жуттин башлиниду. Вәтәнпәрвәрлик сезимлар мошу йәрдә шәкиллиниду. – Чемалған мениң үчүн әйнә шундақ жут. Ата-анилирим, уруқ-туққанлирим, достлирим, синипдашлирим тоғрилиқ әң яхши әслимиләр мошу йеза билән бағлиқ, – дәп тәкитлиди Нурсултан Назарбаев. – Мошу йәрдикидәк таза вә салқин һавани башқа йәрдә тепиш қийин. Бизниң әҗайип тәбиитимиз, тағлиримиз жилдин-жилға гөзәлләшмәктә. Нурсултан Назарбаев жүргүзүлүватқан сәясәт түпәйли мәмликитимизниң хәлиқара мәйданда етирап қилинғанлиғини тәкитлиди. – Биз чоң ишни әмәлгә ашурдуқ, – дәп әслитип өтти Тунҗа Президент. – Илгири һечкимгә мәлум әмәс Қазақстанни һазир пүткүл дуния билиду. Бизниң гражданлиримиз түрлүк мәмликәтләрни зиярәт қилиш имканийитигә егә болди, студентлар болса, дунияниң әң яхши билим дәргаһлирида оқуватиду. Биз йеңи пайтәхтни қурдуқ, һазир униңда чоң хәлиқара саммит вә әнҗуманлар өткүзүлүватиду. Мошуниң һәммиси – дөләт һаят-паалийитиниң барлиқ саһалириниң җошқун тәрәққий етиватқанлиғиниң нәтиҗиси. Нурсултан Назарбаев өзиниң буниңдин кейинки паалийити тоғрилиқ планлири билән ортақлишип, Елбасы сүпитидә стратегиялик мәсилиләргә диққәт ағдуридиғанлиғини ейтти, шундақла Президент Қасым-Жомарт Тоқаевниң өзиниң үмүтини ақлайдиғанлиғиға ишәнчә билдүрди. – Қазақстан келәчигиниң парлақ болидиғанлиғиға ишинимән, чүнки һазир мәмликәтни йеңилаш бойичә көрүлүватқан барлиқ чариләр, биринчи новәттә, яшларни қоллап-қувәтләшкә вә йүксәлдүрүшкә қаритилған, – деди Елбасы. – Буниң үчүн барлиқ шараит яритиливатиду. Өз бизнесини ачмақчи болғанларға несийә бериливатиду. Мутәхәссислиги йоқларни дөләт йеңи кәсипләргә оқутуватиду. Билим, пән, медицина, спорт проблемилириға нурғун диққәт бөлүнүватиду. Йеза территориялирини тәрәққий әткүзүш программилири әмәлгә ашурулуватиду. Учришишқа кәлгән йеза турғунлири Елбасы билән бәтму-бәт сөзлишиш имканийити егә болди, Чемалғандики Қарасай-батыр намидики мәктәпниң 2-синип оқуғучиси Арнур Акрам Тунҗа Президент шәрипигә йезилған шеирни оқуди. Андин кейин “Азарт” уссул ансамблиниң яш артистлири тәсирлик лезгинка уссулини иҗра қилди. Өз новитидә академик Рәқим Оразалиев, шундақла “Азарт” ансамблиниң рәһбири Мурат Сулиев дана сәясити үчүн Елбасыға миннәтдарлиқ билдүрди. Уларниң сөзичә, милләтләрара разимәнлик, бирлик вә җәмийәттики хатирҗәмлик – алаһидә қәдирләйдиған баш утуқ-муваппәқийәтлиримизниң бири. Нурсултан Назарбаев шу күни Чемалған йезисида қурулуши аяқлишип қалған физкультура-сағламлаштуруш комплексиниң иш җәрияни билән тонушти. Комплекс пайдилинишқа берилгәндин кейин бу йәрдә бокс вә мәшиқлиниш заллири, күрәш секцияси, бассейн, теннис корти вә башқа спорт инфрақурулуми ишләйду. Шу нәрсә диққәткә сазавәрки, Қарасай наһийәсидә аммивий спортни риваҗландуруш үчүн молҗаланған объект қурулуши беваситә Елбасыниң қоллап-қувәтлиши вә шәхсий мәблиғи һесавиға әмәлгә ашурулуватиду. Тунҗа Президент ана жутқа қилған сәпириниң ахирида синипдашлири вә биллә өскән достлири билән учрашти.

42 рет

көрсетілді

0

пікір
Алдыңғы мақала Қазақстан хәлқигә қәсәмяд қилди
Келесі мақала Президент һакимлар билән кеңәшмә өткүзди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *