• Асасий мақалилар
  • 25 Сәуір, 2019

Жуқури ишәнчә вә чоң җавапкәрлик

Тунҗа Президент – Елбасы Нурсултан Назарбаевниң қатнишиши билән Nur Otan партиясиниң XIX қурултийи өткүзүлди. Қурултайда күн тәртивигә мувапиқ Қазақстан Җумһурийитиниң Президенти сайлимиға Nur Otan партиясидин намзат көрситиш мәсилиси қаралди. Партия Рәисиниң биринчи орунбасари Мәулен Әшимбаевниң тәкитлишичә, қурултайға Nur Otan партиясиниң регионлуқ шөбилириниң конференциялиридә сайланған 600дин ошуқ делегат, шундақла Парламент депутатлири, дөләт органлириниң рәһбәрлири, дипломатик корпус, һөкүмәтлик әмәс тәшкилатларниң вәкиллири қатнашти. Елбасы Нурсултан Назарбаев сәпдашлириға мураҗиәт қилип, чоңқур боһран шараитида башланған Қазақстанниң шәкиллинишиниң еғир йоллири тоғрилиқ әслитип өтүп, һазир Қазақстанниң тәрәққиятниң йеңи басқучиға қәдәм ташлиғанлиғини тәкитлиди. – 19-мартта мән президентлиқ вакалитимни тохтаттим. Йәни Қазақстанниң келәчиги үчүн шундақ қарарға кәлдим. Әнди мәмликәткә рәһбәрлик қилишқа йеңи әвлат келиду. Мән бу әвлатниң Вәтән үчүн ишләйдиғанлиғиға ишинимән, бизниң әвлат болса, уларға ярдәм қилиши, шараит яритиши керәк, – дәп тәкитлиди Тунҗа Президент. Nur Otan партиясиниң Рәиси өзи елан қилған “дәсләп ихтисат, андин кейин – сәясәт” принципиниң вақит синиғидин өткәнлигигә вә тоғра екәнлигини испатлиғанлиғиға диққәт ағдурди. – Алди билән адәмләрниң турмушини яхшилаш зөрүр болди, – дәп тәкитлиди Елбасы. – Әйнә шундақ яндишиш түпәйли Қазақстан илгәрки Кеңәш кәңлигидики әң җошқун тәрәққий етиватқан дөләтләрниң биригә айланди. Һазир җумһурийитимиз дунияниң риқабәткә қабил 50 мәмликитиниң қатариға кириду, бирақ алдимизда иш нурғун. Тунҗа Президент қурулуш саһасида вә йолларни реконструкция қилишта чоң нәтиҗиләрниң қолға кәлтүрүлгәнлигини тәкитләп, мустәқиллик жиллирида қазақстанлиқларниң кириминиң өскәнлигини атап көрсәтти. – Биз намратчилиқ дәриҗисини 10 һәссә дегидәк қисқарттуқ, – дәп тәкитлиди Нурсултан Назарбаев. – Һәр жили Қазақстанда миңлиған иш орунлири вуҗутқа кәлтүрүлүватиду, йеңи заводлар билән фабрикилар ишқа қошулуватиду, дөләт тиҗарәт саһасиға мисли көрүлмигән дәриҗидә ярдәм қиливатиду. Нурсултан Назарбаевниң сөзичә, саламәтликни сақлаш саһасидики утуқлар түпәйли мәмликәттә сағлам милләт шәкиллиниватиду, маарип вә илим-пән саһалирида чоң утуқлар қолға кәлтүрүлди. Елбасы мустәқиллик жиллирида хәлиқниң роһий байлиғини сақлап қелиш вә көпәйтиш, миллий мәдәнийәт вә дөләт тилини тәрәққий әткүзүш мүмкин болғанлиғиға диққәт ағдурди. Әнди Қазақстан артистлириниң, рәссамлириниң вә спортчилириниң исмини пүткүл дуния билиду. Қазақстанниң йеңи пайтәхти Тунҗа Президентниң җүръәтлик идеялириниң әмәлгә ашурулғанлиғини вә мәмликәт утуқлирини намайиш қилди. Нурсултан Назарбаев узақ муддәтлик стратегиялик һөҗҗәтләрдә мәмликәт тәрәққиятиниң онлиған жиллар алдимизға бәлгүләнгән программилириниң ениқ әкис әткәнлигигә диққәт ағдурди, Қазақстанниң Тунҗа Президентиниң тәкитлишичә, һазир хәлиққә тәрәққият йолиниң турақлиқлиғи вә әтики күнгә болған ишәнчә зөрүр. – Мени заманивий Қазақстанниң асасида турған рәһбәр сүпитидә, сөзсизки, мәмликитимизниң келәчиги, башланмилиримизниң утуқлуқ болуши вә гражданларниң паравәнлиги ойландуриду, – деди Елбасы. – Мән өзәмниң күчүмгә қарап вә Конституция һәм қанунлар тәрипидин бәкитилгән вакаләтләргә мувапиқ Вәтәнниң гүллиниши үчүн ишләшни давамлаштуримән, йеңи Президентқа Қазақстанни утуқлуқ тәрәққий әткүзүш интилишида ярдәм қилимән. Нурсултан Назарбаев Рәиси болған Қазақстан хәлқи Ассамблеяси даирисидики иш келәчәктә йәнә бир муһим йөнилиш болиду. Буниңдики асасий әвзәллик – җәмийәтлик разимәнликни вә милләт бирлигини күчәйтиш. – Мән Бехәтәрлик кеңишигә рәһбәрлик қилипму өзәмниң көпжиллиқ тәҗрибәмни дөләт тәрәққиятиниң бирқатар муһим мәсилилирини һәл қилишқа, униң ички вә ташқи сәяситини бәлгүләшкә қаритимән. Шундақла илгәркидәкла чоң сәясий партия болған Nur Otan Рәиси болуп қалимән, – деди Елбасы. Қазақстанниң Тунҗа Президенти алдимиздики новәттин ташқири сайламға тохтилип, мәмликәттә һакимийәт варислиғиниң Конституциягә толуқ мувапиқ келидиғанлиғини тәкитлиди. – Икки һәптә илгири Дөләт рәһбири Қасым-Жомарт Тоқаев новәттин ташқири Президент сайлимини өткүзүш тоғрилиқ Пәрман имзалиди вә буни мән ойлаштурулған қарар дәп һесаплаймән, – деди Нурсултан Назарбаев. – Биз дунияға демократик тәрәққият йолини таллавалғанлиғимизни испатлидуқ. Әнди сайлам вақтида җипсилишип, мошу электорал кампанияни өткүзүшимиз керәк. Буниңда бизниң йеримиздә течлиқ вә разимәнликтин қиммәт һечнәрсиниң йоқ екәнлигини әстә тутуш муһим. Қазақстанлиқларниң мошу тарихий пәйттә бирликни намайиш қилип, сайланған Президентқа хәлиқниң жуқури ишәнчә көрситидиғанлиғиға ишинимән. Нурсултан Назарбаев қурултайда алдимиздики Президент сайлимиға қатнишиш үчүн Nur Otan партиясиниң намзити сүпитидә Қасым-Жомарт Тоқаевни көрситиш тоғрилиқ мәсилини қарап чиқишни тәвсийә қилди. – Қасым-Жомарт Тоқаев мәмликәт мустәқиллигиниң дәсләпки жиллиридин тартипла түрлүк участкиларда мениң йенимда ишлиди. У мениң билән биллә Қазақстанниң ташқи сәяситини қурушни башлиғанлиғанларниң бири, узақ жил Ташқи ишлар министрлигигә рәһбәрлик қилди. Чәт әлдә униң дипломатик дәриҗиси жуқури баһалиниду. Силәр униң БМТ Баш кативиниң орунбасари болғанлиғини вә наһайити тәҗрибилик дөләт сәясәтчиси болуп һесаплинидиғанлиғини билисиләр, – деди Елбасы. Тунҗа Президент өз тәкливини дәлилләп, Қасым-Жомарт Тоқаевниң мәмликәт үчүн мурәккәп вақитта җумһурийәт Һөкүмитини башқурғанлиғиға, Сенат рәиси сүпитидә парламентаризмни тәрәққий әткүзүшкә чоң һәссә қошқанлиғиға диққәт ағдурди. – Мән Қасым-Жомарт Тоқаевни барлиқ қазақстанлиқларниң достлуғи вә тәң һоқуқлуқлуғи сәяситигә толуқ әмәл қилидиған адәм дәп ишәшлик билдүримән, – дәп ишәндүрди сәпдашлирини Нурсултан Назарбаев. Партия рәһбири өз сөзидә шундақла Җумһурийәтлик җәмийәтлик сайлам штабини уюштурушни тапшурди. Алдимиздики Президент сайлимиға намзат сүпитидә көрситилгән Қасым-Жомарт Тоқаев өз сөзидә биринчи новәттә Елбасыға вә партия бойичә сәпдашлириға ишәнчә көрсәткәнлиги үчүн миннәтдарлиқ билдүрди. – Мән Тунҗа Президент Елбасыниң мәмликитимизни һәртәрәплимә тәрәққий әткүзүш бойичә стратегиялик йолини давамлаштуруш үчүн сайламға қатнишимән, – деди Қасым-Жомарт Тоқаев. – Өз вәзипәмни бизниң Лидеримиз сәяситиниң варислиғини тәминләштин ибарәт дәп билимән. Қазақстан мустәқиллик жиллирида Елбасы рәһбәрлигидә намратчилиқ вә қалаймиқанчилиқтин турақлиқ вә гүллинишкә болған тарихтики надир илгириләшни әмәлгә ашурди. Нәқ Тунҗа Президент, партиямизниң Лидери течлиқни, хатирҗәмликни миллий бирликни вә җәмийәтлик разимәнликни тәминлиди. Дуния сәясәтчилири вә экспертлири парчилинип, вәйран болиду, дәп ойлиған Қазақстан дунияниң риқабәткә қабил мәмликәтлириниң қатариға кирди. Елбасыниң ирадиси вә лидерлиғи түпәйли биз йеңи дөләтни қурдуқ, һәқлиқ түрдә униң асасини салғучиниң вә баш мемарчисиниң исми билән аталған йеңи пайтәхтни бәрпа қилдуқ. Униң пикричә, алдимиздики сайлам һакимийәт вә җәмийәт оттурисидики уттур, үнүмлүк диалогқа, умумән, Қазақстанни сәясий йеңилашқа йеңи күч-қувәт бериду. Қасым-Жомарт Тоқаев өз сөзиниң ахирида пидакарлиқ вә адил әмгәк қилидиғанлиғиға, дөлитимиз вә хәлиқниң мәнпийәтлири үчүн адил хизмәт қилидиғанлиғиға ишәндүрди. Қурултайда муназиридә дөләт вә җәмийәт әрбаби Әдил Ахметов, Атырав вилайитиниң һакими, партияниң вилайәтлик шөбисиниң рәиси Нурлан Ноғаев, Парламент Мәҗлисиниң депутати Ирина Аронова, спорт ветерани, Олимпиада чемпиони Жақсылық Үшкемпиров, “Атамекен” Миллий тиҗарәтчиләр палатисиниң башқарма рәиси Аблай Мырзахметов, “Силумин-Восток” ҖЧЙниң тәрәққият бойичә мудири Зоя Новолодская, “Aigyn” гезитиниң баш муһәррири Нуртөре Жүсип вә башқилар сөзгә чиқти. Nur Otan партиясиниң новәттин ташқири XIX қурултийиниң делегатлири партия Лидериниң Қасым-Жомрат Тоқаевни алдимиздики Президент сайлимиға қатнишиш үчүн намзат қилип көрситиш тоғрилиқ тәкливини бир еғиздин қоллап-қувәтлиди.

51 рет

көрсетілді

0

пікір
Алдыңғы мақала Қазақстан – Өзбәкстан: стратегиялик шерикләр, қериндаш әлләр
Келесі мақала Течлиқ вә разимәнлик – алий қәдрийәтләр

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы