• Асасий мақалилар
• 19 Маусым, 2019

“Айбын” һәрбий-вәтәнпәрвәрлик жиғилишиниң ечилишиға қатнашти

Президент Қасым-Жомарт Тоқаев һәрбий-вәтәнпәрвәрлик жиғилиш қатнашқучилирини алқишлап, җавапкәр, вәтәнпәрвәр вә җасур яшларни бирләштүргән мәзкүр чарә-тәдбирниң алаһидә әһмийәткә егә екәнлигини тәкитлиди. Биз мустәқил елимизниң яшлириға чоң үмүт қилимиз! “Айбын” һәрбий-вәтәнпәрвәрлик жиғилиши яхши әнъәнигә айлинип, Вәтәнни һимайә қилмақчи болған яшлар үчүн надир мәйдан болуп һесаплиниду, — деди Дөләт рәһбири. Қазақстан Президенти дөләтниң яшларни қоллап-қувәтләшкә вә уларниң ихтидарини әмәлгә ашуруш үчүн шараит яритишқа чоң диққәт бөлүватқанлиғини тәкитләп, уларниң тәрәққият рәмзи, яхши келәчәккә болған үмүт тимсали һесаплинидиғанлиғини тәкитлиди. Қасым-Жомарт Тоқаевниң сөзичә, Елбасы 2019-жилни тәсадипи “Яшлар жили” дәп атимиди. Яшлар мәмликәт һаятиға паал қатнишиватиду, гражданлиқ җәмийәтниң тәрәққий етишигә, мәмликәтниң утуқлуқ йеңилинишиға ярдәм қиливатиду. Биздә яш қазақстанлиқларда вәтәнпәрвәрликни шәкилләндүрүшкә алаһидә әһмийәт берилиду. Мошу мәхсәттә “Жас сарбаз” җумһурийәтлик балилар-өсмүрләр һәрбий-вәтәнпәрвәрлик һәрикити қурулди. Барлиқ регионларда униң шөбилири шәкиллинип ишләватиду. “Жас сарбаз” һәрбий-вәтәнпәрвәрлик клублириниң вә синиплириниң сани 6 миңға йетип, 174 миңдин ошуқ балини җәлип қилған, — деди Қураллиқ Күчләрниң Алий Баш қомандани. Дөләт рәһбири яшларни һәрдайим умумий, барлиқ қазақстанлиқларни бирләштүридиған бәрпакарлиқ әмгәк, течлиқ вә разимәнлик, хәлиқләр бирлиги, Вәтән билән пәхирлиниш охшаш қәдрийәтләргә нишан қилишқа чақирди. Мән вәтәнпәрвәрләрниң йеңи әвладиниң өсүп, әр йетиватқанлиғини көрүватимән. Силәр заманивий Қазақстан идеаллирида тәрбийиләндиңлар. Силәр өзәңларниң әмгигиңлар, билимгә вә ениқ ишларға интилишиңлар билән Вәтинимизниң — Мәңгілік елниң шөһритини ашуруватисиләр. Силәрниң Мустәқиллик ғалибийәтлиригә шәрәп билән әмәл қилидиғанлиғиңларға, мәмликитимизниң муваппәқийәтләр эстафетисини давамлаштуруп, уни елип маңидиғанлиғиңларға ишинимән, — дәп тәкитлиди Қазақстан Президенти. Дөләт рәһбири яшларға мураҗиәт қилип, шундақла һәрбир адәмниң һаяти үчүн зөрүр болған хусусийәтләр тоғрилиқ сөзләп бәрди. Қасым-Жомарт Тоқаевниң сөзичә, бу һәммидин авал адиллиқ, билим, кәспийлик вә Вәтәнгә садиқлиқ. Қураллиқ Күчләрниң Алий Баш қомандани сөзиниң ахирида яшларниң җумһурийәтлик “Айбын” жиғилишини очуқ дәп елан қилди вә униң қатнашқучилириға әла оқуш, мустәһкәм саламәтлик, утуқ-муваппәқийәт тилиди. Дөләт рәһбири “Айбын” һәрбий-вәтәнпәрвәрлик жиғилишиниң тәнтәнилик ечилиш мәрасимидин кейин 2050-жилниң “Жас сарбаз” һәрикитиниң қатнашқучилириға мәктүп селинған “вақит қутисини” қоюшқа қатнашти.