• Асасий мақалилар
• 03 Шілде, 2019

Тарихниң йеңи сәһиписи

Президент Қасым-Жомарт Тоқаев “Астана” Хәлиқара малийә мәркизи Сотиниң вә Хәлиқара арбитраж мәркизиниң бенасини ачти. Мәрасим Қазақстан пайтәхтидә иккинчи қетим өтүватқан Astana Finance Days форуми даирисидә болуп өтти. Көп күнлүк малийә форумиға Қазақстан, Бүйүк Британия, Италия, Һиндстан, Хитай, Латвия, Малайзия, Бирләшкән Әрәп Әмирликлири, Россия, АҚШ, Сингапур, Түркия, Финляндия, Эстония охшаш жигирмидин ошуқ мәмликәттин экспертлар, сәясәтчиләр, бизнес саһасиниң вәкиллири, дөләт әрбаплири вә алимлар жиғилди. Қазақстан Президенти өзиниң тәбрик сөзидә һоқуқниң үстүнлүк принципиға әмәл қилишниң турақлиқ ихтисадий тәрәққиятқа вә инвесторларниң ишәнчә билдүрүшигә ярдәм қилидиғанлиғини тәкитлиди. – Биз заманивий, кәспий вә мустәқил сот системисиниң шәкиллинишигә алаһидә диққәт бөлимиз. Биз “Астана” Хәлиқара малийә мәркизиниң Сотини вә Хәлиқара арбитраж мәркизини вуҗутқа кәлтүрүп, “Астана” Хәлиқара малийә мәркизиниң институционал қурулумини қурушни аяқлаштуруватимиз. Биз шундақла Тунҗа Президент Нурсултан Назарбаевниң асасий тәшәббуслириниң бирини әмәлгә ашуруватимиз, – деди Қасым-Жомарт Тоқаев. Сот вә арбитраж мәркизиниң бенасини ечиш мәрасимиға шундақла “Астана” Хәлиқара малийә мәркизиниң башқурғучиси Қайрат Келимбетов, “Астана” Хәлиқара Малийә мәркизи Сотиниң Рәиси лорд Гарри Кеннет Вульф, Хәлиқара арбитраж мәркизиниң рәиси Барбара Доманн, шундақла “Астана“ Хәлиқара малийә мәркизи Соти вә Хәлиқара арбитраж мәркизи аппаратиниң рәһбири Кристофер Кэмпбелл-Холт қатнашти. Қазақстан Президенти Astana Finance Days даирисидә “Астана” Хәлиқара малийә мәркизини башқуруш кеңишиниң мәҗлисини өткүзди. Мәҗлискә кеңәш рәисиниң орунбасари – Қазақстан Җумһурийитиниң Премьер-Министри Асқар Мамин, биринчи вице-премьер – малийә министри Әлихан Смайилов, миллий ихтисат министри Руслан Дәленов, Миллий банк рәиси Ерболат Досаев, “Астана” Хәлиқара малийә мәркизиниң башқурғучиси Қайрат Келимбетов, шундақла қурулум әзалири – Европа реконструкция вә тәрәққият банкиниң Президенти Сума Чакрабарти, IP Morgan Chase International мудирлар кеңишиниң рәиси Джейкоб Френкель, Россия Аманәт банкисиниң президенти вә башқарма рәиси Герман Греф, Ислам тәрәққият банки топиниң президенти Бандарт Хаджар, “Яндекс” компанияләр топиниң қош асасини салғучи вә рәһбири Аркадий Волож вә Citigroup инвестиция вә корпоратив банкиси һөкүмәтләр һәм дөләт сектори аләмшумул блогиниң башлиғи Джули Монако қатнашти. Кеңәш мәҗлисидә “Астана” Хәлиқара малийә мәркизиниң бир жиллиқ һесавити рәсмий тонуштурулди. Astana Finance Days форуми ишини давамлаштуруватиду.