• Асасий мақалилар
• 10 Шілде, 2019

Пайтәхттә Домбра күни нишанланди

Мәлумки, Домбра күнини 2018-жили Қазақстанниң Тунҗа Президенти тәсис қилған еди. Мәйрәм өсүватқан әвлатниң миллий сәнъәтни үгинишкә болған қизиқишини ашурушқа қаритилған. Мәйрәмниң мәмликәт тарихида бари-йоқи иккинчи қетим нишанлиниватқанлиғиға қаримай, уни аммибаплиққа айланди десиму болиду. Бийил униңға миңға йеқин адәм – һәм кәспий музыкантлар, һәм һәвәскарлар қатнашти. Дөләт рәһбири Қасым-Жомарт Тоқаев концертқа жиғилған музыкантлар вә тамашибинлар алдида сөзгә чиқип, барлиқ қазақстанлиқларни мәйрәм билән тәбриклиди. – Қазақ вә домбра – бир-бири билән чәмбәрчас бағлиқ чүшәнчә дейишиду. Домбар авази батырларни җасарәткә дәвәт қилиду, ақынларни илһамландуриду. Домбра һәр қачан хәлқимизниң бебаһа байлиғи болған, –дәп тәкитлиди Президент. Қасым-Жомарт Тоқаев домбриға беғишланған мәйрәмниң яш әвлатниң әнъәнивий сәнъәткә болған қизиқишини ашурушниң әҗайип имканийити екәнлигини тәкитлиди. – “Сарыарқа”, “Балбырауын”, “Адай”, “Әлқисса” күйлири – миллий роһни көтиридиған улуғвар әсәрләр. Домбар билән орунланған күйләр тиңшиғучини хәлқимизниң чоңқур тарихиға елип кириду. Биз әвлаттин-әвлатқа өтүватқан мошу алийҗанап мирасни сақлишимиз керәк, – деди Президент. Дөләт рәһбири һазир домбриниң пүткүл Қазақстан хәлқини бирләштүридиған надир мәдәний мирас екәнлигини, униңсиз роһий тиклинишни тәсәввур қилишниң мүмкин әмәс екәнлигини атап көрсәтти. Қасым-Жомарт Тоқаев сөзиниң ахирида өз алаһидилигигә егә мәдәнийәтниң һәр қачан дөләтниң алаһидә диққәт нәзәридә болидиғанлиғини тәкитлиди.