• Асасий мақалилар
• 10 Шілде, 2019

Пайтәхт күни билән тәбриклиди

5-июль күни Президент Қасым-Жомарт Тоқаев жилдики әнъәнә бойичә Пайтәхт күнигә беғишланған чарә-тәдбирләрниң башлиниши болидиған Дөләт байриғини көтириш мәрасимиға қатнашти. Қасым-Жомарт Тоқаев өз сөзидә бу чарә-тәдбирниң алаһидә рәмзгә егә екәнлигигә тохталди. – Қазақстанниң көк байриғи көккә көтирилгәндә, қәлбимизни мустәқил елимизгә, униң барлиқ муваппәқийәтлиригә болған пәхирлиниш туйғулири егиләйду. Мошуниң һәммиси мустәқилликниң нәтиҗиси. Баш шәһиримиз шәкилләнгән пәйттин тартип, тәрәққиятниң қазақстанлиқ үлгисиниң тимсали болғанлиғини көрситиватиду, – деди Қасым-Жомарт Тоқаев мәрасим қатнашқучилириға мураҗиәт қилип. – Бу Елбасыниң милләтни бирләштүрүштики вә дөләтчилигимизни қуруштики тарихий хизмитигә берилгән мунасип баһа болди. Һазир пүткүл дунияда Қазақстан Байриғини регионда вә пүткүл сәйяридә бехәтәрликни, турақлиқни тәминләшкә нишан қилинған течлиқпәрвәр вә салмақлиқ сәясәтниң рәмзи сүпитидә билиду. Дөләт рәһбири андин кейин алий һәрбий оқуш орунлири вә академияләрниң учумкарлириға офицер погонлирини тапшурди. Бийил 27 офицер – Қазақстан Җумһурийити Мудапиә министрлиги Һәрбий пиядә әскәрләр институтиниң, Қазақстан Җумһурийити Мудапиә министрлиги Радиоэлектроника вә алақә һәрбий-инженерлиқ институтиниң, Қазақстан Җумһурийити Миллий бехәтәрлик комитети Чегара хизмити академиясиниң, Қазақстан Җумһурийити Ички ишлар министрлиги Алмута, Қарағанда вә Қостанай академиялириниң, Қазақстан Җумһурийити Миллий гвардияси Һәрбий институтиниң, Қазақстан Җумһурийити Ички ишлар министрлиги Пәвқуладдә вәзийәтләр комитети Көкшетав техникилиқ институтиниң учумкарлири – Қазақстан Җумһурийитиниң Президенти – Қураллиқ Күчлириниң Алий Баш қоманданиниң қолидин офицер погонлирини алди. Дөләт рәһбири офицерларни тәбрикләп, уларниң Вәтәнни һимайә қилиш, течлиқ вә бехәтәрликни сақлаш бойичә муқәддәс вәзиписиниң муһим екәнлигини тәкитлиди. – Һазирқи мурәккәп геосәясий вәзийәттә бизниң җәңчилиримиз түрлүк қайнақ нуқтиларда течлиқпәрвәрлик вәзипини мунасип атқуруватиду. Офицер унваниға пәқәт жуқури әхлақий сүпәтлири вә төмүрдәк тәртиви билән пәриқлинип, җанпидалиқ билән ишләватқан адәмләрла сазавәр болиду. Дөләт мәмликәтниң кәспий Қураллиқ күчлириниң вақит тәләплиригә җавап бериши үчүн һәрқачан шараит яритиду. Қазақстанниң бехәтәрлиги уттур силәрниң сүпәтлик ишиңларға бағлиқ, – дәп ақ йол тилиди Қасым-Жомарт Тоқаев яш офицерларға. Тәнтәнилик мәрасимда мүрисидә алтундәк юлтузлар пақириған яш лейтенантларму сөзгә чиқип, офицер мәртивисигә дағ кәлтүрмәй, барлиқ күч-ғәйритини мустәқил мәмликәтниң, униң қураллиқ күчлириниң тәрәққиятиға сәрип қилидиғанлиғиға ишәндүрди. Андин кейин улар көпчилик алдидин тәнтәнилик марш билән сәп түзәп өтти. Ахирида Президент барлиқ қазақстанлиқларни Пайтәхт күни билән тәбрикләп, течлиқ вә паравәнлик тилиди.