• Асасий мақалилар
  • 26 Қыркүйек, 2019

АҚШтики учришишлар

Президент Қасым-Жомарт Тоқаев Нью-Йоркта бирқатар муһим учришишлар өткүзди. Дөләт рәһбири Қ.Тоқаев Нью-Йорк шәһиридә АҚШниң сәясий вә экспертлар топлириниң вәкиллири билән учрашти, дәп хәвәрлиди Президентниң мәтбуат хизмити. Қазақстан Президенти Қасым-Жомарт Тоқаевниң Нью-Йоркқа сәпири АҚШтики тәсири күчлүк тәтқиқат мәркизи һесаплинидиған “Atlantic Council” (Атлантикилиқ кеңәш) тәшкилатиниң қоллап-қувәтлиши билән уюштурулған атақлиқ америкилиқ сәясәтчиләр вә экспертлар билән учришиштин башланди. Учришиш давамида Дөләт рәһбири Қазақстан-Америка мунасивәтлириниң һазирқи әһвали вә тәрәққий етиш истиқбаллири, ташқи сәясәтниң асасий йөнилишлири, Қазақстанниң сода-ихтисадий вә инвестициялик иқтидари һәққидә тәпсилий тохталди. Қасым-Жомарт Тоқаев АҚШ билән һәмкарлиқни ашуруш Қазақстан үчүн муһим екәнлигини тәкитлиди. – Биз Тунҗа Президент Нурсултан Назарбаевниң 2018-жили январьда АҚШқа болған рәсмий сәпири давамида қолға кәлтүрүлгән шәртнамиларниң әмәлгә ешишиға алаһидә әһмийәт беримиз. Бу сәпәр икки дөләт арисидики кәңдаирилик стратегиялик һәмкарлиқниң асасини салди, – дәп тәкитлиди Қазақстан Президенти. Дөләт рәһбири АҚШниң Қазақстан ихтисадиниң чоң инвесторлириниң бири екәнлигини қәйт қилди. Һазир америкилиқ инвестицияниң көләми 45 миллиард доллардин ашти. Шундақла Қ.Тоқаев америкилиқ кәсипдашлириға энергетика саһасидики бирқатар бирләшкән лайиһиләрниң утуқлуқ әмәлгә ашқанлиғи тоғрилиқ әхбарат бәрди. Шуниң билән биллә йеза егилиги вә алий технология саһалири бойичә өзара мунасивәтни күчәйтиш үчүн йеңи имканийәтләрниң моҗутлиғиға диққәт бөлди. Президентниң пикричә, Қазақстан келәчәктиму америкилиқ тиҗарәт вәкиллири билән узақ-муддәтлик ихтисадий мунасивәтләрни күчәйтишкә мәнпийәтдар. Өз новитидә америкилиқлар иккитәрәплимә һәмкарлиқ дәриҗисини жуқури баһалап, Қазақстан билән өзара нәтиҗидар стратегиялик һәмкарлиқни буниңдин кейинму күчәйтишниң иқтидари зор екәнлигини тәкитлиди. Шу күни Президент БМТниң Нью-Йорктики штаб-квартирисида БМТ Цивилизацияләр альянсниң алий вәкили Мигель Анхел Моратинос вә “Bloomberg” әхбарат агентлиғиниң асасини салғучи вә ғоҗайини Майкл Блюмберг билән учрашти. *** Қазақстан Президенти Қасым-Жомарт Тоқаев Дөләт рәһбири мәртивисидә АҚШқа дәсләпки сәпири даирисидә, БМТ Баш ассамблеяси 74-сессиясиниң умумий дебатлириниң ечилишиға мунасивәтлик америкилиқ чоң тиҗарәтчиләр билән учрашти, шундақла өзиниң кәсипдашлири – дөләт рәһбәрлири билән музакириләр жүргүзди. Бу күни Дөләт рәһбири Royal Dutch Shell, JPMorgan Chase & Co, Tyson Fresh Meats, Valmont Industries, Plyg n Play, Amazon Web Services вә башқиму хәлиқара чоң ширкәтләр рәһбәрлири билән учрашти. Учришишта Қасым-Жомарт Тоқаев Елбасы Н.Назарбаевниң 2018-жили январьда АҚШқа болған сәпири даирисидә Қазақстан – Америка кәңәйтилгән стратегиялик һәмкарлиғи тоғрилиқ Бирләшкән мураҗиәткә қол қоюлғандин кейин икки дөләт арисидики сода-ихтисадий вә инвестициялик һәмкарлиқниң риваҗланғанлиғини тәкитлиди. Президент АҚШ – Қазақстан ихтисадиниң чоң инвесторлириниң бири екәнлигини ейтти. Елимиз ихтисадиға америкилиқ инвесторлар салған инвестицияләрниң умумий көләми 45 миллиард доллардин ашти. Қазақстанда 500дин ошуқ америкилиқ ширкәт ишләватиду. Дөләт рәһбири америкилиқ тиҗарәтчиләргә Қазақстан һөкүмитиниң инвестициялик шараитни яхшилаш ишини давамлаштуридиғанлиғини ейтти. Учришиш давамида Қазақстанниң энергетика, йеза егилиги, малийә вә адәм капитали саһалиридики истиқбаллар тоғрилиқ мәсилиләр муһакимә қилинди. Дөләт рәһбири БМТ Баш ассамблеяси 74-сессиясиниң мәйданлирида Швейцария конфедерациясиниң президенти Ули Маурер билән учрашти. Дөләт рәһбәрлири иккитәрәплимә күн тәртивидики кәңдаирилик муһим мәсилиләрни муһакимә қилди. Қасым-Жомарт Тоқаев Қазақстан – Швейцария арисидики һәмкарлиқниң алий дәриҗидә екәнлигини тәкитлиди. Дөләт рәһбири шундақла Болғария Президенти Румен Радев билән учришип, сәясий, сода-ихтисадий, мәдәний-гуманитарлиқ саһалардики иккитәрәплимә һәмкарлиқниң бүгүнки әһвали вә уни күчәйтишниң истиқбаллирини муһакимә қилди. Қасым-Жомарт Тоқаев Польша Президенти Анджей Дуда билән музакириләр жүргүзди. Музакириләр давамида дөләт рәһбәрлири өзара һәмкарлиқниң келәчигини, шуниң ичидә Европа иттипақи даирисидики мунасивәт мәсилисини муһакимә қилди. Қазақстан Президенти кәсипдишиға елимиздә Миллий җәмийәтлик ишәнчә кеңишиниң қурулғанлиғини ейтти. Нәқ мошундақ қурулум Польша Президентиниң рәһбәрлиги билән мошу дөләттиму ишләйду. Қасым-Жомарт Тоқаев Грузия Президенти Саломе Зурабишвили билән учрашти. Учришишта күн тәртивидики муһим мәсилиләр муһакимә қилинип, сода-ихтисадий, инвестициялик, транспорт-логистикилиқ саһалардики өзара һәрикәтләрни кәңәйтишниң әһмийити тәкитләнди. Дөләт рәһбири транспорт-логистика саһасидики бирләшкән ишларниң, шуниң ичидә қазақстанлиқ Ақтав вә Қурық портлирини пайдилиниш арқилиқ икки дөләт арисида жүк тошушни әмәлгә ашурушниң әһмийитини ейтти. Новәттики учришиш давамида Қасым-Жомарт Тоқаев билән Украина Президенти Владимир Зеленский бир-бирини дөләтлиридики алий лавазимға сайлиниши билән тәбриклиди. Қазақстан Президенти икки дөләт арисидики тарихий мунасивәтләр вә умумий келәчәк һәққидә өз пикрини изһар қилди. Учришиш ахирида Қасым-Жомарт Тоқаев билән Владимир Зеленский бир-бирини өз дөләтлиригә сәпәргә тәклип қилди. Дөләт рәһбири Иордания Короли Абдалла II билән учрашти вә иккитәрәплимә мунасивәтләрниң бүгүнки әһвали вә истиқбаллирини муһакимә қилди. Дөләт рәһбәрлири һәрхил саһалар бойичә өзара нәтиҗидар һәмкарлиқни буниңдин кейинму тәрәққий әткүзүшкә тәйяр екәнлигини тәкитләшти. Қазақстан Президенти Қасым-Жомарт Тоқаев Нью-Йорктики БМТ штаб-квартирисида Бирләшкән Милләтләр Тәшкилати Баш ассамблеяси 74-сессиясиниң Умумий дебатлириниң ечилишиға қатнашти.

22 рет

көрсетілді

0

пікір
Алдыңғы мақала Президент Ақмола вә Шималий Қазақстан вилайәтлиридә болди
Келесі мақала Қазақстан Президенти Қасым-Жомарт Тоқаев БМТ Баш ассамблеяси 74-сессиясиниң Умумий дебатида сөз сөзлиди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы