• Хуш хәвәр
• 14 Қаңтар, 2021

Спорткомплекс ечилди

Әмгәкчиқазақ наһийәсидики бирнәччә йеза турғунлири 2021-жилни әҗайип яхши йеңилиқлар билән қарши алди. Мәсилән, Көлди йезисида Мәдәнийәт өйи мурәккәп җөндәштин өтүп, пайдилинишқа берилди. Бижанов йезисида болса, спорт комплекси ишқа қошулди. Атап кетиш керәкки, бу беналар 30 жилдин бери бош турған еди.
Рашидәм РӘҺМАНОВА, 
«Уйғур авази»

Көлдидики Мәдәнийәт өйиниң рәсмий ечилишиға наһийә һакими Қуанышбек Қашқымбаев қатнишип, йеза турғунлирини тәбриклиди:
– Дөлитимиз һазир әл мәдәнийитиниң тәрәққиятиға көп көңүл бөлүватиду. Бу йөнилиш бойичә «Рухани жаңғыру» программиси ишләватиду. Шу түпәйли биз нурғунлиған мәдәнийәт өйлири билән клублиримизни әслигә кәлтүрдуқ. Йеңилириму селинди. 2021-жили ҚҖ Мустәқиллигигә 30 жил толиду. Улуқ мәйрәм һарписида буниңдинму чоң ишларни әмәлгә ашурушимиз лазим, – деди һаким өз сөзидә.
Ушбу бенаниң қурулуш ишлириға «Иш билән тәминләшниң йол хәритиси» программиси бойичә дөләт бюджетидин 215 миллион тәңгә аҗритилди. Қурулуш ишлирини жүргүзгән «Нұр-Шапағат» қурулуш ширкити мудириниң орунбасари Ернар Есенулы бенаниң рәмзлик ачқучини Мәдәнийәт өйиниң хадимлириға тапшуруп бәрди. Андин жиғилған көпчилик униң ичини арилап көрди.
Биз буниңдин бирнәччә ай бурун Бартоғай йеза округиниң Байсейит вә Бижанов йезилирида болуп, гезит оқуғучилирини уларниң нәпәси билән тонуштурған едуқ. Шу вақитта округ һакими Талғат Өмирбеков билән Ақсақаллар кеңишиниң рәиси Арслан Насиров көпчиликниң хаһишини бизгә йәткүзгән еди. Бу болсиму, шәхсийләр қолиға өтүп, бош турған клуб вә кеңәш дәвридә онлиған яш спортчиларни тәрбийиләп чиққан чоң стадион һәм спорт комплексиниң дөләт балансиға өтүши, ремонтлинип, хәлиққә хизмәт қилиши еди. Шу чағда Талғат Алтынбекулы беналарниң егилири билән сөһбәт жүргүзүватқанлиғи, һәр һалда, мәсилиләрниң иҗабий һәл қилинишиға ишинидиғанлиғини йошурмиған. Мана айлар өтүп, көпчиликниң армини әмәлгә ешип, йеңичә рәң алған спорткомплексиниң лентиси тәнтәнилик рәвиштә қийилди.
Өз дәвридә Бижанов йезисидики «Октябрьниң 50 жиллиғи» совхозини 20 жилчә қабилийәтлик рәһбәр Кебек Ибраимов башқуруп, уни илғар егиликләрниң қатаридин көрүнүши үчүн тинмай әмгәк қилған еди. Йезиниң четидики спорткомплексиму шу вәтәнпәрвәр инсанниң тәшәббуси билән қәд көтәргән. Шуңлашқиму йеңиланған комплексқа униң вуҗутқа келишигә сәвәпчи болған мәрһум әмгәк ветераниниң нами берилди. 1975-жили селинип, 1991-жили шәхсийләр қолиға өтүп кәткән ушбу бенани йезиниң тиҗарәтчи һәм жутдаш балиларниң ғемини йегән турғуни Руслан Қәмирдинов сетивелип, 2017-жили «Рухани жаңғыру» программиси асасида дөләткә тапшуруп бәрди. 2020-жилниң май ейида «Иш билән тәминләшниң йол хәритиси» программиси бойичә бенани мурәккәп җөндәштин өткүзүш үчүн дөләт ғәзнисидин 369 миллион тәңгә бөлүнди. Қурулуш ишлирини «Энергохолдинг LTD» җавапкәрлиги чәкләнгән йолдашлиғи әмәлгә ашурди.
1,5 гектар йәрни егилигән стадион вә спорт комплексиниң җөндәш ишлириға бижановлиқларму өз үлүшини қошти. Җүмлидин Кебек Ибраимовниң оғли Ержан, тиҗарәтчи Руслан Қәмирдинов вә башқилар күндә дегидәк спорт комплексида болуп, өз йезисиниң тәғдиригә бепәрва әмәс екәнлигини дәлиллиди.
Бартоғай йеза округида 7362 адәм яшайду. Округ турғунлиридин башқа ушбу спорткомплекси Маливай, Нура, Нурлы йезилириниң турғунлириғиму хизмәт қилидиған болиду. Шуңлашқиму округтики тәнтәрбийә вә спорт билән турақлиқ шуғуллинидиған хәлиқниң сани бирнәччә һәссигә көпийиду, дәп күтүлмәктә. Спортниң волейбол, баскетбол, гандбол, футбол вә башқиму түрлири бойичә секциялар ечилип, 15 — 20 адәм тәминлиниду.
Кебей Ибраимов намидики спорткомплексиниң ечилиш мәрасимида Әмгәкчиқазақ наһийәси һакиминиң биринчи орунбасари Айбек Бидаев, наһийәлик мәслиһәтниң кативи Бекет Ахметов, йеза мөтивәри Аянбек Дауытқулов, Ержан Ибраимов сөз елип, бижановлиқларни ушбу хошаллиғи билән сәмимий тәбриклиди.

Әмгәкчиқазақ наһийәси.