• Хуш хәвәр
• 04 Сәуір, 2024

Бәхитлик балилар

Йеқинда Әзәрбәйҗанниң пайтәхти Баку шәһиридә «Бақытты елдің ұрпағы» җәмийәтлик фондиниң уюштурушида «Біз бақытты баламыз» музыкилиқ фестивали болуп өтти. 

Гөһәрбүви  ИСМАЙИЛҖАНОВА,
«Uiğur avazi»

Мәзкүр фестивальға Өзбәкстан, Әзәрбәйҗан, Қирғизстан һәм Қазақстандин көплигән талантлиқ балилар қатнашти. Улар: «Эстрадилиқ вокал» вә «Хәлиқ вокали» номинациялири бойичә бәс-бәскә чүшти. Яркәнт шәһиридики «Bakhti studio» ансамблида нахша-саз қир-сирлирини үгиниватқан өсмүрләр һәр икки номинация бойичә күч синашти. Хәлиқ вокали йәни уйғур сәнъитини намайиш қилишта Бәхтияр Қурбанниязовниң миллий саз челиш бойичә тәһсил көрүватқан шагиртлири «Маһмут Қәшқәрий» нахшисини иҗра қилип, адилқазиларни қайил қилди. Ансамбльниң тәңкәш қилишида иҗра қилинған мәзкүр нахша мукапатлиқ иккинчи орунға мунасип дәп баһаланди. Шундақла 11— 13 яшлиқ өсмүрләр арисида эстрадилиқ вокал номинацияси бойичә Сафият Талипов италянчә нахшиси үчүн І мукапатлиқ орунға егә болди. Шундақ қилип, Сафият 7-9 май күнлири Алмута шәһиридә өтидиған көрүккә йолланма алди. 
Биз жутиға утуқлар билән кәлгән Бәхтияр Қурбанниязов билән сөһбәтләшкинимиздә:
– Музыка – бу мениң һаятим. Өзәм дәсләп Яркәнттики «Реһимҗан» сәнъәт мәктивидә, андин Алмутида Чайковский намидики музыкилиқ колледжда, кейин «Ирадә» ансамбли тәркивидә вә Үрүмчи шәһиридә кәспий сәнъәткарлардин тәлим алдим. Мениң мәхситим – устазлиримдин алған билимимни өсүп келиватқан әвлатқа йәткүзүш. Аримизда сәнъәтни сөйидиған гөдәкләр тола. Пәқәт уларға тоғра йол көрситип, бойидики бар талантини пәрвиш қилиш лазим. Шундақ екән, өзәм тәшкил қилған студиядә оттуздин ошуқ миллий саз шәйдалири оқуп үгәнмәктә. Уларниң һәрхил байқашларға қатнишиватқанлиғини сәнъәттики утуғи дәп билгән ата-аниси бизни дайим қоллап-қувәтләп, шу арқилиқ йәниму чоң сәһниләргә дәвәт қиливатиду. Бакудики фестиваль шуниң бир мисали. Балилар чәт әлдә өзини әркин тутуп, паркларда дутар, раваплирини челип, уйғур нәғмә-навалирини яңратқанда, қедимий һәм бай сәнъитимизгә қизиққучилар көп болди. Әндики мәхситимиз – Алмута вә Ташкәнт, Иссиқкөлдики конкурсларға қатнишиш. Бизгә дәм елишқа вақит йоқ. Чүнки сәнъәт дайим мәшиқни, үгинишни, иҗадий издинишни тәләп қилиду. Күнигә 3-4 саат саз чалмиған вә нахша ейтмиған шагирт сәнъәткар болушни арман қилмисиму болиду. Шуңлашқа тәртип, тәләп жуқури. Һә, балиларниң интилиши зор. Қизиқиш бар йәрдә нәтиҗә болиду,– дәйду Бәхтияр. 
 
Жетису вилайити, 
Панфилов наһийәси