• Асасий мақалилар
• 08 Сәуір, 2021

Стратегиялик шериклик күчийиду

Дөләт рәһбири Венгрия ташқи ишлар вә ташқи сода министри Петер Сийартони қобул қилди.

Қасым-Жомарт Тоқаев учришиш давамида ишәшлик сәясий диалогқа, изчил сода-ихтисадий вә инвестициялик һәмкарлиққа, COVID-19 пандемияси шараитида өзара қоллап-қувәтләшкә асасланған Қазақстан–Венгрия стратегиялик шериклигиниң жуқури дәриҗидә екәнлигини тәкитлиди.
Қазақстан Президенти Венгрия Премьер-министри Виктор Орбанға бийил 31-мартта “Түркстан – түркий дунияниң роһий пайтәхти” мавзусида онлайн-тәртиптә өткән Түркийтиллиқ дөләтләр һәмкарлиқ кеңишиниң нарәсмий саммитиға паал қатнашқанлиғи үчүн миннәтдарлиқ йоллиди.
– Жүргүзүлгән музакириләрниң Қазақстан вә Венгрия оттурисидики мунасивәтләрниң техиму тәрәққий етишиға қошумчә асас яритидиғанлиғиға үмүт қилимән. Венгрия – Қазақстан буниңдин 30 жил муқәддәм силәрниң региониңларда өз әлчиханисини ачқан биринчи мәмликәт. Бизниң мунасивәтлиримиз алаһидә. Венгрия қазақстанлиқлар арисида наһайити аммибаплиққа егә, бизниң силәрниң мәмликитиңларға болған һөрмитимиз чоң. Мошу имканийәттин пайдилинип, Венгрия Премьер-министри Виктор Орбанға Түркийтиллиқ дөләтләр һәмкарлиқ кеңишиниң ишиға иҗабий һәссә қошуватқанлиғи үчүн миннәтдарлиқ билдүргүм келиду, – дәп тәкитлиди Дөләт рәһбири.
Петер Сийарто өз новитидә Президентқа учришиш имканийитини яратқанлиғи үчүн миннәтдарлиқ билдүрди вә өз мәмликити рәһбәрлигиниң салимини йәткүзүп, Будапештниң, шу җүмлидин Түркий кеңәшниң иқтидарини пайдилинип, Қазақстан билән болған комплекслиқ өзара һәрикәтни техиму чоңқурлитишқа тәйяр екәнлигини тәстиқлиди. Венгрия ташқи ишлар вә ташқи сода министри Түркстанниң роһий пайтәхт сүпитидә муһим роль ойнайдиғанлиғини тәкитлиди.
– Сиз, җанаби Президент вә Елбасы Венгриядә чоң абройға егә. Биз Қазақстан вә мәмликәт хәлқиниң достанә кәйпиятини, қериндашлиғини һис қилимиз. Бизниң байқиғучи сүпитидә Түркийтиллиқ дөләтләрниң һәмкарлиқ кеңишигә киришимиз – мәмликәтлиримиз оттурисидики стратегиялик шериклик нәтиҗилириниң бири. Биз үчүн Қазақстан – муһим стратегиялик шерик, – деди Петер Сийарто.
Сөһбәтдашлар Виктор Орбанниң 2019-жили Қазақстанға қилған рәсмий сәпири вақтида қолға кәлтүрүлгән келишимләрниң әмәлгә ашурулушиға диққәт ағдуруп, иккитәрәплимә мунасивәтләрниң бирқатар әмәлий мәсилилирини муһакимә қилди.