• Хуш хәвәр
• 15 Сәуір, 2021

Чимкәнттә “Егемен Қазақстан” кочиси бар

Чимкәнт шәһиридики намисиз кочиға мәмликәтниң йетәкчи гезитиниң нами берилди. Әнди Чимкәнттә “Егемен Қазақстан” кочиси бар. Буниңғичә қазақ тилидики йетәкчи гезитниң нами Нур-Султан шәһириниң хәритисидә пәйда болған еди.
 Чимкәнттә “Егемен Қазақстан” кочиси бирнәччә жил илгири шәһәр даирисигә киргән Қаратав наһийәсидики Бозарық дача поселкисиға орунлашқан. У Чимкәнт шәһәрлик мәслиһәт вә һакимлиғиниң шәһәрдики намсиз 325 кочиға нам бериш тоғрилиқ бирләшкән тохтамидин кейин пәйда болди. Шәһәрдә кочиларни аташ үчүн җәнубий Қазақстандики атақлиқ аһалилиқ пунктларниң, тағлар билән чоққиларниң, дәриялар билән көлләрниң, роман, эпос, хәлиқ нахшилири вә йетәкчи нәширләрниң намлирини таллавалди. Мәсилән, һазир Бозарық йезисида 65 кочиға нам берилди. Йезида “Ана тили”, “Жас алаш”, “Абай жолы”, “Қамар сулу”, “Балхадиша”, “Ақ билек” охшаш намлар бар.
 Кочиға “Егемен Қазақстан” намини бериш шәрипигә тәнтәнилик мәрасим өткүзүлүп, униңға “Алаш” Хәлиқара мукапитиниң лауреати Мархабат Байғут, “Егемен Қазақстан” җумһурийәтлик гезити” акционерлиқ җәмийитиниң башқарма рәиси Дархан Қыдырәли, шәһәр җамаәтчилигиниң вәкиллири билән турғунлири қатнашти.
Кочиға нам беришқа беғишланған тәнтәнилик мәрасимни язғучи-журналист Мархабат Байғут ачти. У өзиниң тәбрик сөзидә 100 жилдин ошуқ тарихқа егә мәмликәтниң баш нәшриниң шәрипигә кочини аташниң чоң әһмийәткә егә екәнлигини тәкитлиди. Гезит бир әсирдин буян милләтниң роһий тиклинишиниң асаси болди, барлиқ муһим вақиәләрни һәққаний түрдә оқуғучиларға йәткүзди, җәмийәтлик пикир минбири болди.
Чимкәнт шәһәрлик мәслиһәтниң депутати Нурғанзы Бухарбаев, “Егемен Қазақстан” җумһурийәтлик гезити” акционерлиқ җәмийитиниң башқарма рәиси Дархан Қидирәли өз сөзлиридә кочиға гезит наминиң берилишиниң муһим әһмийәткә егә екәнлигини тәкитләп, униң турғунлириға изгү тиләклирини йәткүзди.
 Шундақ қилип, әнди мәмликәттики үчинчи мегаполиста 100 жилдин ошуқ тарихқа егә җумһурийәтлик нәшир нами билән аталған коча бар.