• Хуш хәвәр
• 13 Қазан, 2022

Қедимий Довундики йеңи иншаәтләр

Өткән шәнбә күни өзи кичик болсиму, нами улуқ Довун йезисида қош-қош хошаллиқ йүз бәрди. Йәни, бир күндә үч бирдәк йеңи  объектниң  лентиси қийилип, 8-октябрь жут үчүн тарихий бир күнгә айланди.  

Сабирәм ӘНВӘРОВА, 
«Уйғур авази» 

Ениғирақ ейтсақ, тонулған меценат, ҖУЭМ йенидики «Нураний анилар» кеңишиниң рәиси Җаһангир Муратованиң һамийлиғида селинған равақниң, көрнәклик җәмийәт әрбаби Владимир Тохтасуновниң һамийлиғида селинған икки спорт мәйданчисиниң вә миллий мәдәнийитимизниң җанкөйәри, Уйғур наһийәсиниң Пәхрий граждини Зиләхәм Җәлилованиң  рәһбәрлигидә ишқа қошулған «Лоло» балилар бағчисиниң ечилиш мәрасими уюштурулуп, жирақ-йеқиндин кәлгән меһманлар әстин чиқмас бу күнниң гувачиси болди.  
Көптин күткән тәнтәнә жут турғунлири тәрипидин тәйярланған сәһнә көрүнүши билән башланди. Йезиниң тәрәққияти, Довунни гүлләндүрүш үчүн көп күч чиқарған жутдашларниң әмгиги әкис етилгән ихчам қоюлумда тарихи чоңқур, қедимий йезини қайта тикләштә нурғун күч сәрип қилғучилар, йәни  тәшәббус көтирип мәктәпниң селинишиға түрткә болған Тохтасун Мәрипов вә шу мәктәпни заман тәливигә лайиқ мурәккәп җөндәштин өткүзүш ишлирини зиммисигә елип, жутқа йеңи мечит селип бәргән Нурмәһәммәт Палтахуновларниң исми билән бир қатарда мәзкүр тарихий пәйтниң сәвәпчиси болуватқан Җаһангир ана Муратова,  Зиләхәм ана Җәлилова вә Владимир Тохтасуновниң әмгиги һөрмәт билән  тилға елинди. 
Дәсләпки тәбрик сөзгә чиққан наһийә һакиминиң орунбасари Қадиржан Бағбаев наһийә һакими Шөһрәт Нурахуновниң салимини йоллап, Довун жутини қош хошаллиғи билән тәбриклиди. Шундақла, шу хошаллиқниң сәвәпчиси болған җанкөйәр инсанларниң әмгигини жуқури баһалап, Җаһангир ана Муратоваға «Уйғур наһийәсиниң Пәхрий граждини»  пәхрий намини берилгәнлигини қәйт қилди. 
Наһийә һакиминиң орунбасаридин кейин Дардамту йезилиқ округиниң һакими Кеңес Бақтыбаев өзиниң иллиқ ләвзини билдүрди. 
Андин ҖУЭМ рәисиниң орунбасари, җумһурийәтлик «Уйғур авази» гезитиниң баш мурәһәррири Ершат Әсмәтов башлиған биртоп делегация  әзалири сәһнә төригә тәклип қилинди. Ершат Моллахуноғли ҖУЭМ рәиси, Қазақстан Җумһурийити Президенти йенидики Миллий Қурултай вә Қазақстан хәлқи Ассамблеяси Кеңишиниң әзаси  Шаһимәрдан Нурумовниң салимини йоллап, Җаһангир Муратова билән Зиләхәм Җәлиловаға ҖУЭМ рәисиниң тәшәккүрнамисини тапшурди.
Мизангүл Авамисимова башчилиғидики «Җанан» фондиниң ханим-қизлири әмгиги көпкә үлгә анилиримизниң үстигә чапан, бешиға ромал  йепип һөрмәт көрсәтти. Шуниң билән биллә, ҖУЭМ йенидики «Уйғур мәктәплири билән һәмкарлишиш» аналитикилиқ мәркизи  билән «Мәрипәт» мәшривиниң намидин «Лоло» балилар бағчисиға рәң бериш дәптәрлири билән қолланмилар соға қилинди. Қисқиси, йеза егилиги пәнлириниң доктори, академик Мәһәмәтҗан Абдуллаев, Панфилов наһийәлик Уйғур этномәдәнийәт мәркизи йенидики ханим-қизлар кеңишиниң рәиси, «Панфилов наһийәсиниң Пәхрий граждани» Маһинур Аюпова, Уйғур наһийәлик Уйғур этномәдәнийәт мәркизиниң рәиси Арлен Һосманов, Уйғур наһийәлик «Әжелер» кеңишиниң рәиси Рая Сартоловаму иллиқ ләвзини билдүргүчиләрниң қатарида болди. 

Әнди йеза турғунлири намидин сөз алған мәктәп мудири Халима Малибаева,  жигитбеши Әзиз Розахунов, йезилиқ Ақсақаллар кеңишиниң рәиси Сайипҗан Тохтахунов йезидин жирақта жүрсиму, киндик қени тамған диярини әзизләп, Довунниң тәрәққияти үчүн аянмай күч чиқириватқан жутдашлириға дегән чәксиз миннәтдарлиғини изһар қилип, пүтүн жут намидин рәхмәт ейтти.
Мәрасим давамида оқуғучилар тәрипидин тәйярланған концертлиқ программа тамашә қилинди. Биридин-бири талантлиқ оқуғучилар ипадилик ядқа ейтқан шеирлири, орунлиған нахша-уссуллири билән  көпчиликни қайил қилди.   Шундақ қилип, авал истираһәт беғиниң алдидики равақниң, кейин спорт мәйдани билән балилар бағчисиниң лентиси қийилип, чачқиси чечилди. Кәлгән меһманлар йеңи мәркәзләрни зиярәт қилип, заманға хас бой көтәргән равақ, спорт мәйдани вә балилар бағчисиға жуқури баһа бәрди. 
Хош, ейтилмиған тиләкләр  Халима Шаваеваниң риясәтчилигидә ақ дәстихан бешида давамини  тапти. Меһманлар жут турғунлири вә мәрһум Тохтасун Мәриповниң рәпиқиси Почунай  Молотова тәрипидин йейилған  бәрикәтлик дәстихандин еғиз тәккәч, «Арзу» вә «Жазерке» ансамбльлириниң сәнъәткарлири орунлиған йеқимлиқ вә шох нахшилар билән әвиршим усулларни тамашә қилди. 

 «Балилар жили» һарписида ишқа қошулған «Лоло» балилар бағчиси әсли 75 орунлуқ болуп, һазирчә 50 бала билән икки топ ечилди. Бағчидә җәми он бәш адәм иш билән тәминләнди. Дәрһәқиқәт, кочилири астфальлинип, сүйи киргүзүлүп, мәктиви мурәккәп җөндәштин өтүп, йеңи дохтурханиси селинған Довун йезисиға бир йетишмәйватқини  – балилар бағчиси еди. Әндиликтә, төрт теми түгәл болған довунлуқларда қилчә арман йоқ, десәк мубалиғә болмас. 
 Қошумчә қилимизки, бүгүнки күндә Уйғур наһийәсидә балилар бағчиси билән тәминләш көрсәткүчи – 99,8 пайизға йәтти. Наһийәдә 4 дөләтлик, 38 шәхсий балилар бағчиси билән 7 ихчам мәркәз паалийәт елип бериватиду.